Larsian: Sinugbang Pagkaon, Nangamay ang Aso

Humot kaayo ko nga migikan sa balay ganina kay aduna ko’y date sa akong uyab. Natural, aron dili siya makaingon nga nagpasagad ra ko sa akong panamit, gisul-ob nako ang akong pinakanindot nga polo og karsones. Pastilan, Bay, hapit nako mahurot og ligo ang akong pahumot. Labihan ra bang mahala ini.

Pastilan, Bay, sayo kong miabot sa among gisabotang lugar. Didto, naghulat ko sa akong uyab. Samtang wala, pa siya moabot, nakigchismis lang una ko sa gwardiya didto sa may pultahan sa opisina. Pila ka minuto ang milabay, miabot na gyud intawon ang akong gipaabot. Gatingsi pa gyud.

Pastilan, Bay, miingon bitaw na siya nga adto mi manihapon sa Larsian. Ako siyang giingnan nga sa dili pa mi mangadto sa Larsian, iya unang simhoton ang akong sinina (yawat na lang dili masayang ang akong giligo nga pahumot!). Dako kaayo siya’g ngisi, Bay.

Naglakaw ra mi libot sa dakong rotunda sa Fuente Osmena paingon sa Larsians. Layo pa gani mi, nasimhot na namo ang makatintal nga humot sa barbekyu.

Didto sa Larsian naglaray, Bay, ang sobra sa baynte ka barbekyuhan. Samtang naglakaw mi nga mora’g kinasal sa dalan, nag-ilog og pangagda ang mga tindera, “‘Migo, diri ra ta, ‘Migo.” Didto ra mi nalagpot sa barbekyuhan nga mingaw-mingaw. Nahibulong ko nganong dili kaayo tantong daghan ang nangaon didto–aso diay kaayo.

Pastilan, Bay, mora’g lungga sa kolesterol kining Larsian. Nagkadaiyang barbekyu ang matilawan nimo dinhi. Aduna’y pork belly, chicken skin, barbekyung gagmay, chorizo, longganisa, paa sa manok, IUD (tinae sa manok), atay, dugo sa manok, picho sa manok, isda ug uban pa. Barbekyu tanan.

Ikaw ra ang mopili sa imong buot ipaluto ug makita mo gayud nga magtungtong ang imong gipili ibabaw sa baga, samtang maghingos ka sa humot nga aso. Pastilan ang aso, Bay, mopilit gyud sa imong tibuok lawas, lakip sa imong mga sinina ug brief.

Pastilan, Bay, bisan pa’g de-kotse ka, o de-kurbata, patas ang tanang tawo nga mangaon dinhi. Wala’y kutsara og tinidor. Plastic ang tanang plato. Kinamot tang tanan. Simhot tang tanan sa aso. Kaon tang tanan sa kolesterol. Standard ang presyo sa tanang nagtinda og barbekyu.

Kay patas man hapit tanang butang sa Larsian, mag-indigay ra ang mga tindahan sa duha ka aspeto–ang timpla sa ilang mga barbekyu ug serbisyo sa kustomer. Aduna gyu’y ubang mga tindera, Bay, nga pasobrahan og sumada ang imong bayranan. Kanunay gyud nako matngonan kung pila ka buok ang akong gipalit aron sa panahon sa bayranay, makareklamo ko kung molapas. Diha gyud ko’y nalalis ganina, Bay. Gilaliman ka’g mi-order mi og duha ra ka pork belly apan sa iyang sumada, iya ming pabayron og para upat. Na, maglagot gani ko, ako man to siyang idangdang sa baga ba. Maayo ra gani kay nakumbinsi ra nako ang babaye.

Bay, anhi lang usa ko kutob kay nagdagook akong tiyan. Nagkalibanga ko, Bay. Sa sunod mokaon ka sa Larsian, intawon, Bay, panghunaw sa imong kamot sa dili ka pa mokaon.