Makabusog nga Pasko

Bisan sa naghingutas nga ekonomiya sa atong nasud karon, nabusog gihapon ko sa mga butang Paskohanon.

Una, nabusog ko sa noche buena. Nagkapundok ang akong pamilya panahon sa noche buena, ug kana makabusog sab nga talan-awon. Nahinumdum hinuon ko’s Balaang Banay didto sa Nasaret. Pastilan!

Ikaduha, nabusog ko sa pulbura. Pipila ka gutlo sa wala pa mag-tungang gabii, nagsugod na’g dagkot ang among mga silingan sa ilang whistle bomb, kwitis, rebintador, Judas belt, fountain, butterfly, ug uban pa isip malipayong pagsugat sa Pasko. Abi ba nako’g aduna’y buslot ang bulsa sa mga Pinoy karong tuiga? Nagpaka-paka sa mga pabuto sa among mga silingan, Bay. Pastilan, kung huyang lang tingali ko’g kasingkasing, tingali’g nalisang na ko ug gihubag-hubagan. Nanghinaut na lang ko nga gawas sa mga pabutong gidagkotan sa among mga silingan, aduna sab sila’y pagakan-on alang sa noche buena. Pastilan, sila ang nagpabuto apan kami ang mihanggab sa aso sa pulbura. Kining mga pabuto sab ang hinungdan nganong wala na lang ko mosimba sa misa de aguinaldo, Bay, kay basin hitapsingan unya ko og nasaag nga kwitis.

Ikatolo, nabusog ko sa mga daygon sa mga bata. Pastilang alingisngisa sa gi-uyog-uyog nga tansan sa mga bata! Diha’y nag-inusarang batang lalaki nga mi-awit og “We wish you a merry Christmas” ug “Ania kami”. Nagtoo tingali siyang daghan siya; o basin aduna siya’y multiple personality disorder, Bay no? Paghuman niya’g awit, misiyagit dayon siya’g “Maayong Pasko!” Wala mi mitubag, busa misiyagit siya’g “Maayong Pasko uy!” Pastilan, mamugos man diay! Busa mili-li ko sa among bintana ug mibalos og siyagit, “Balik lang inig baynte singko, Dong!” Dinhi sa among balay, Bay, naanad man gud mi nga dili manghatag sa mga mananaygon kung dili pa molapas ang Pasko. Natagam na man gud mi kaniadto niadtong mga bata nga magbalik-balik og daygon sa among balay sa usa lamang ka gabii. Ang nakapait pa gyud kay mamalita dayon sila sa ilang mga kaubang mananaygon (kay magpunduk-pundok man ni sila, sama’s pasayan sa tiyangge), “Adto mo anang ilang ku-an ay, manghatag na sila.” Pastilan ning mga bataa! Lingaw kaayo sila, Bay, apan wala ko masayod kung nakasabot sila sa ilang gibuhat o sa tinuod nga kahulugan sa ilang pagpanaygon.

Ikaupat, nabusog ko sa mga daygon sa mga pastores nga gikan sa kabukiran ug probinsiya. Uban sa popular nga “Kasadya Ning Taknaa” ug “Ania Kami,” giawit sab nila ang mga wala kaayo hi-ilhing mga Paskohanong honi nga Sugbuanon sama sa “Sumad karon ang kalibutan magpangilin…,” “Gloria in excelsis Deo! Awit sa atong Ginoo nga natawo niarong panahona…,” “Ania kami karon kaninyo nanaygon, ayaw’g hikalimti ang Paskong halandumon…,” “Pasko na man usab karon, ang tanan magmalipayon…,” ug uban pang nga maanindot nga Paskohanong awit.

Ikalima, nabusog ko sa mga pinaskohan nga akong nadawat gikan sa mga kahigalaan, kabanay, ug kaparyentihan. Klaro na tingali kaayo nga naglaylay na ang akong lagay, Bay, kay kasagaran sa ilang gihatag nako mga brief man. Pili lang, aduna’y Calvin Klein, Calvin Klein kunohay, Hanford, Bench, Bench kunohay, Hanes, Hanes kunohay… Pastilan!

Ika-unom, nabusog ko sa panagway sa Balaang Banay sa among Belen. Kumpleto pa ang among Belen, Bay. Anaa pa ang kabaw ug baka, ang tolo ka hari, ang anghel, ang mga magbalantay ug mga karnero, ug anaa pa sab si Susmaryosep (Jesus, Maria, ug Jose)! Tungod sa maayong paghipos sa akong Nanay, wala pa intawon mangapunggot ang mga ulo sa mga figurine.

Ikapito ug ang hilabihang nakabusog nako, Bay, mao ang kalipay sa Pasko. Tinuod, nabusog ko sa mga kalibutanong butang, apan mga pinisik lamang kini sa dako kaayong kalipay nga dala sa Manunubos nga natawo sa Belen mga duha ka libo ka tuig na ang milabay. Wala ko malimot sa tinuod nga kahulugan sa Pasko, Bay uy! Ug ang kahulugan sa Pasko mao kini: Tungod sa dakong paghigugma sa Dios sa Iyang katawhan, Iyang gipadala ang Iyang bugtong anak nga si Jesus, aron nga si kinsa ang motuo sa Iyang mensahe sa kalingkawasan maluwas. Makakurat, Bay no? Gilaliman ka’g huboan nimo ang imong kaugalingon sa imong gahum ug himaya, mopuyo isip tawo–huyang ug puno sa kasakit–dinhi sa kalibutan, tungod ug tungod lamang sa wala’y pu-as nga gugma? Apan ingon niana kalapad ang gugma sa Dios alang kanimo, Bay. Mao kana’y matang sa gugma nga dili matukib. Mao kana ang gugma nga gisaulog nato matag Pasko. Nanghinaut ko nga mapuno sa kalipay sa Pasko ang imong mga adlaw, Bay, ug nga mabusog sab ka sa mga butang Paskohanon.