Mar 052018
Pinitik sa kasingkasing mo’ng nagmahal
Dili makita.
Apan ang malipayong pahiyum sa imong pinalangga
Makita.
Mga pangako sa kasingkasing mo’ng naghigugma
Dili makita.
Apan ang pagtuman sa imong mga saad
Makita.
Kahangol mo sa pakig-uban sa imong pinalangga
Dili makita.
Apan ang imong aping nagsandig sa iyang abaga
Makita.
Mga pahayag mo sa paghigugma
Dili makita.
Apan ang pag-apong mo sa matag niyang pulong
Makita.
Naglagiting mo’ng pagbati sa paghigugma
Dili makita.
Apan ang pagtahod ug pagmanggad mo kaniya
Makita.
Liboan ka pulong sa paghigugma gibuhian sa imong dila
Dili makita.
Apan ang imong hapuhap kaniya sa takna sa kasubo
Makita.
O gugma mo, hain ka?
Gawas na sa imong gitagoan
Ug gaksa na ang kahayag
Aron ko ikaw
Makita.
(Feature image: “Broken Promises, Broken Hearts” by kahlee-kat on DeviantArt.com)
Ipaambit kini! (Share this!)
12
Haring Wati
Haring Wati (King Earthworm) is the idiosyncratic and eccentric king of Saksaksinagol.com, but before anything else, he is many things rolled into one. He writes for pleasure and incidentally makes a living out of it. He is die-hard Cebuano. He is also known as Elmer Montejo.