Jan 012002
Gikaingon ko’g nagbatil og itlog
Ang mga kaisdaan sa kalaworan
Dihang mipanaw ako sa unang higayon
Paingon sa Iloilo, Ilonggong dakbayan
Abi ko pa gani’g nanglaba ang mga sirena
Sa sinina nilang pilak nga naggilak-gilak.
Mangitngit ang dalan nga gihiwa sa barko
Niadtong dakong wanang nga baybayon ra’y utlanan.
Namasin ko nga ang akong nakita
Tinigom ug nagpundok nga usa ka libong luwa,
Apan sayop diay ang pangagpas ni’ng bata
Tungod kay ang tuyok sa palabad sa barko
Nagpabukal sa dagat, naghimo’g buwa-buwa.
Busa mipadayon ang panaw niining pasahero
Ug nagbilin og buwa-buwang manindot sa dalan–
Mga yanong katingalahan, mga lab-as nga larawan,
Nga sa kalit lang sa mga balud ug gapnod banlasan.
Ipaambit kini! (Share this!)
Haring Wati
Haring Wati (King Earthworm) is the idiosyncratic and eccentric king of Saksaksinagol.com, but before anything else, he is many things rolled into one. He writes for pleasure and incidentally makes a living out of it. He is die-hard Cebuano. He is also known as Elmer Montejo.