Jan 012002
 

Nakasuway na ka’g natuloan og laway sa imong katapad sa jeep? Pastilan Bay, hapit ko mabisbisi og laway ganina samtang nagsakay ko og jeep pauli sa amoa.

Ang akong katapad sa jeep, naggunit sa tayaon nga hawiranan, samtang iyang gitapion ang iyang agtang sa iyang bukton. Tungod tingali sa iyang kakapoy, Bay, nahinanok man ang amaw. Pastilan!

Maayo lang unta’g igo ra siyang natulog sa hilom. Maantus ra pud unta bisan mohagok siya. Apan nagtulo ang iyang laway, Bay! Unya, mikalit lang og untol ang jeep kay nakaagi og libaong, mao nga nakuratan siya ug nahigmata ug gibuhian ang tayaon nga hawiranan. Pagkataud-taod na pud, pastilan, nakatulog na pud siya’g balik. Apan wala na siya manggunit sa hawiranan–iya na lang gisandig ang iyang ulo sa upholstered nga bahin sa bintana sa jeep.

Ambot lang atong tawhana, Bay, mihinay-hinay man og pasandig sa iyang ulo sa akong abaga. Pastilan nakong kulbaa kay basin matuloan ko’s iyang laway. Na, mabunyagan man ko’g ikaduha niini–nakaingon gyud ko’s akong kaugalingon.

Aduna pu’y mama nga nagdamgo sulod sa jeep, Bay. Sigurado gyud ko nga gikan to siya namalit og grocery kay nagsabak siya’g duha kay dagkong plastic sa Gaisano South ug diha sa iyang bilahan, aduna’y karton (puno pud tingali to sa iyang mga gipamalit). Pastilan, naglumba lang sila’g pangatulog niadtong tawo nga naglaway.

Apan dili nako mabasol ang maong mga tawo, Bay. Nakasabot sab ko sa ilang kakapoy. Tataw man pud kaayo nga ordinaryong mamumuo lamang kadtong lalaki nga nagtulo ang laway kay nagdala man siya’g bag nga abog–duda nako puno to sa iyang mga kahimanan sa trabaho. Ang babaye sab, sa akong tan-aw, tag-iya to siya og sari-sari store kay namalit siya’g binulto nga mga igbabaligya.

Ako, dili ko mamumuo o tag-iya og sari-sari, Bay, apan bation ko ang samang kakapoy matag uli nako gikan sa dakbayan. Makalipong ang kadaghan sa mga tawo nga naghulmigas sa dakbayan. Makalabad sa ulo ang nagkadaiyang kolor sa siyudad (sus, tuo ka sa kantang “Downtown”!). Makasamot sa kagutom ang kusog nga tingog sa mga sound system sa mga tindahan. Idugang pa niana ang saba sa mga jeep ug ang makahabwa-tinai nga trapik. Pastilan, Bay, kinsa’y dili kapoyon niana? Ipuno pa gyud ang abog ug ang ka-alimuot sa dakbayan. Ayaw pud kalimti ang angso sa mga ginagmay ug dinagkong eskina diin ang mga tawo nga nagtoong iro sila, magpataka la’g pangihi–kulang na lang mo-isa sila sa ilang usa ka tiil.

Ug kung huyang ang imong kasingkasing, ayaw na lang patuga-tuga og tan-aw sa mga tawong magpataka’g labang, kay basin mosurok lang ang imong dugo. Kinsa’y dili mahutdan sa gininhawa samtang nagtan-aw sa tawong nagpataka og labang nga hapit hidumboli sa jeep? Kinsa’y dili molugwa ang kinaon samtang nagtan-aw sa nagli-undok nga basura sa Colon? Ug ang luwa! Ayaw’g kalimti ang plema–green, yellow, puti, usahay aduna’y pula–nga sagad nimo makit-an sa daplin-daplin sa sidewalk ug sa mga kanal. Ay oo, ang mga upos pud sa sigarilyo nitapad pud sa luwa nga iyang uyab. Aduna ra ba’y ordinansa nga multahan og P500 ang magpataka og labay’g basura sa Colon, Bay. Gituyo tingali sa gobyerno nga dili butangan og mga basurahan sa Colon aron daku-dako sila’g kita.

Usa pud nga akong gipasanginlan sa akong sip-on mao kanang kalit nga pag-usab sa temperatura inig gawas nako sa usa ka airconditioned nga tindahan. Bugnaw kaayo sa sulod sa tindahan, apan inig gawas nimo, hilabihang inita. Pastilan, mora’g ma-awp imong panan-aw sa kalit nga pag-usab sa temperatura, Bay.

Unya, dinha pud sa may eskina sa Gaisano Metro, pastilan, labi na kung kilomkilom na ug nanihapon pa ang pulis, hapit na lang magpataliwala sa dalan ang mga manindahay og tempura, fishball, mani, mangga, bayabas, Ponkan, siniguelas, lanzones, sigarilyo, Storck, White Rabbit, Maxx, Halls, Juicy Fruit, Snow Bear–pili lang.

Mao nga inig sakay nimo sa jeep pauli sa inyoha, dili nimo kapugngan nga bation ang kakapoy ug kaluya. Dili ko sab ikaw mabasol kung mahinanok ka sa imong pagpanaw, o kaha, magtulo ang imong laway samtang natulog ka tapad nako, o kaha itungtong ang imong ulo sa akong abaga. Pahuway kadiyot gikan sa kagubot sa dakbayan, Bay, kay ugma, inig mata nimo, laing adlaw na sab sa kalipay ug kasakit, katam-is ug kapait, ang imong atubangon dinhi niining atong pinalanggang Sugbo.

Ipaambit kini sa uban! / Share this to others!
  •  
  •  
  •  
  •  
  •  
  •  
  •  
  •  
  •  

Haring Wati

avatarHaring Wati (King Earthworm) is the idiosyncratic and eccentric king of Saksaksinagol.com, but before anything else, he is many things rolled into one. He writes for pleasure and incidentally makes a living out of it. He is die-hard Cebuano. He is also known as Elmer Montejo.

 Leave a Reply

(required)

(required)

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

 

Copyright © 2002 - 2015 Elmer F. Montejo, Saksaksinagol.com