Paningkamot og Sikad

Bay, nakit-an nako kini ganina, ug dayong hulbot nako sa akong phone aron hulagwayan. Lima ka adlaw na lang, Pasko na, ug nakapamalandong ko sa pulong nga “trysekad.”

Niining panginabuhia, ang pag-try gayud mao ang sikreto. Kay kun dili mo-try, aw, maghunong ra ang sakyanan ug wala mo’y padulngan. Kinahanglan gyud ni’ng trabahoa og dakooooo kaayo’ng try, labi na’g duha mo ka pasahero, unya sakahón ang dalan. Sama ra na’s gugma, Bay, prangkahay lang — lisod dad-on ang duha, ug bug-at sab.

Busa, kamong mga hinawayon ug mga mabiay-biayon kanila nga nanginabuhi niining paagiha, palihug, undangi na ang pagbagolbol:

• kun sila hinay kaayo modagan ug maglaray mo ug ang ubang sakyanan sa ilang luyo;
• kun wala’y handbrake ang ilang sakyanan (kay siguro gyud nga naa’y goma nga brake sa luyo’ng ligid nga ila ra’ng tumban — safe ra tingali na);
• kun wala’y atup-atup ang ilang sakyanan, kay mahal ang trapal;
• kun karaang tarpaulin ra sa MX3 o sa Sun Cellular ang gitabon sa ibabaw isip atup-atup, kay lagi mahal ang trapal;
• kun mosamot kahinay ang ilang pagtindak kun moagi mo sa hanginon nga lugar, kay ang ilang beach umbrella nga giatup-atup mahimo’ng daw layag sa bangka sa mamalâ;
• kun maningil sila og lapas pa sa minimum fare sa traysikol bisan duol ra kaayo ang gihatdan (kay basin — basin lang — nanginom ni sila og gasolina pangdugang sa ilang kusog ug resistensya, unya mahal na ra ba ang gasolina);
• kun ubos ra kaayo ang lingkoranan ug mag-abot ang imong suwang ug mga tuhod inig lingkod;
• kun ubos ra kaayo ang frame sa atup-atup, mao’y hinungdan nga inig untol nimo sa libaong, aw, bukol dayon;
• kun mopasakay sila og laing tambokikoy bisan og ikaw mismo tambokikoy na daan;
• ug uban pa.

#SaferThanAngkas
#TryAndTryUntil

Busa, Bay, try lang ta og sabot nila panagsa.