Aug 252017
Haruson man sa unos ang imong kadahonan,
Piangon ang mga sanga sa mapintas nga hangin,
Hubsan og ilimnon atol sa tinghulaw,
Sa mga bunga ahat nga kutloan,
Panalingsing gihapon.
Samáran ka man sa nagsinaw nga sundang —
Tigbason, habasan, putlan, pul-ongan,
Nga ikapungkol sa imong mga bukton —
Ug bun-ogon ug binlan og mga uwat,
Panalingsing gihapon.
Ang diwa nga nagpuyo sa imong kinalubasan
Nga sa liboan ka pagsalop ug pagsubang sa adlaw
Nalig-on, mihamtong, mihingkod
Nagpabiling buhi ug mapailubon
Nga naghulat sa tukmang panahon
Aron ikaw pag-usab
Manalingsing.
Ipaambit kini! (Share this!)
30
Haring Wati
Haring Wati (King Earthworm) is the idiosyncratic and eccentric king of Saksaksinagol.com, but before anything else, he is many things rolled into one. He writes for pleasure and incidentally makes a living out of it. He is die-hard Cebuano. He is also known as Elmer Montejo.