Suroy-suroy sa SM

Init ang panahon karon, busa miadto ko sa SM aron magpabugnaw. Tuod man, Bay, mikuray ko sulod sa SM kay kusog kaayo ang bulhot sa ilang aircon. Ambot lang ngano, Bay, mas ganahan man ko molaag sa SM kaysa sa Ayala. Tingali, para nako, mas pang-masa man gud ang appeal sa SM kontra sa Ayala. Didto’s Ayala, Bay, pastilan, kada lingi nimo puro dato imong makit-an. Medyo mahadlok pud ko molaag sa Ayala, Bay, kay basin makasaghid unya ko’g dato nga tawo, dayon pasakaan ko’g kaso sa husgado kay nagaras nako ang iyang panit. Kahibalo na baya ka’s kasagaran sa mga dato, Bay, mangita gyu’g sala bisan gamay rang sayop ang imong nabuhat.

Daghan ang akong namatikdan sa SM, Bay. Mahimo ra diay ka’ng mag-tsinelas lang didto. Diha pud ko’y nakit-ang batan-on nga, ambot, init man unta ang panahon, baga kaayo ang iyang gisul-ob nga sinina (nagsul-ob pa gyud siya’g shades). Nagsapaw-sapaw ang iyang mga sinina. Nagsul-ob siya’g t-shirt sa ilawom, dayon gisapawan og polo shirt nga pwerteng lu-aga, dayon gisapawan pa gyud og jacket. Ang iyang karsones, lawlaw pud kaayo, mora’g nanobra ang panapton. Nabantayan pud nako ang sapatos niya. Nakakita ka anang sapatos nga gisul-ob ni Ronald McDonald? Mora’g ingon ana to kadako ang sapatos nga gisul-ob sa batan-on nga akong nakita, Bay. Pastilan! Ug dugang pa, duna pa gyu’y nagbitay nga kadena sa iyang bulsa. Sa pikas bulsa niya gipaslak ang iyang cellphone. Ang iyang dunggan pud, Bay, napuno sa ariyos (nasayop tingali siya’g taod sa iyang ariyos, Bay, kay lakip iyang ilong nagsul-ob og ariyos). Ang iyang usa ka bukton giputos sa pito ka Buddha beads, ug sa pikas bukton, ang iyang relo nga manghod la’g gamay sa wall clock ang gidak-on.

Hilabihang tugnawa sa SM, Bay. Nagmahay ko nga wala ko magsul-ob og baga nga sinina sama sa batan-on nga akong nasugatan didto. Kay lagi tugnaw man, sige lang ko’g duaw sa CR. Daghan baya pud ko’g namatikdan aning mga CR nga pampubliko, Bay. Kahibalo na man tingali ka nga sa CR sa mga lalaki, nagbitay ra ang mga ihianan sa bungbong. Kung duna’y buot mangihi, mopaduol ra sa bungbong ug adto ipabuhagay ang iyang ihi sa gitawag og urinal. Busa didto ko mipahipi sa pinakatumoy nga urinal, Bay. Pastilan, mipaduol gyud ko’g maayo sa urinal ug pwerte nakong tabun-tabon sa akong ku-an, kay ang lalaki nga nangihi sa tapad nako, nagsige’g pasiplat og tan-aw sa akong ku-an. Aguy! Lain man tingali’g tuyo.

Ambot lang pud ning kasilyas sa mga lalaki, Bay, daghan man gyud kaayong mahabilin nga kulot nga buhok sa urinal. Nganong dili man sad na nila paputlan sa barbero ang ilang kulot nga buhok uy. Unya, duna pud ubang mga lalaki nga dili kamaong mo-flush sa CR. Adto na didto sa urinal magsagol ang ihi, mga kulot nga buhok, luwa nga tin-aw, luwa nga hilaw, ug luwa nga hinog. Usahay duna’y masaag nga upos sa sigarilyo.

Nahimuot pud ko’g maayo, Bay, kay duna man pu’y mga anidoro nga gisulod og mga cubicles. Sa usa ka cubicle duol sa urinal nga akon giihian, pwerteng utong sa tawo nga naa sa sulod. Apan sa tapad nga cubicle, nabati nako ang newspaper nga gipilo, dayon gipahid. Kahibalo na ka’g asa gipahid, Bay. Sa sunod pa gyud nga cubicle, nabati nako ang nagbusagak nga tubig. Abi nako’g duna’y leak sa anidoro ngadto. Pagkataud-taod, migawas ang lalaking nagsira pa sa iyang zipper–nagngisi siya’g ngisi sa kahayahay.

Bay, dili lang ko mohisgot bahin sa unsa’y dagway sa kasilyas sa mga babaye kay wala pa man ko mangahas og sulod didto. Pero matag higayon nga moagi ko sa kasilyas sa mga babaye, mopasiplat pud ko’g tan-aw sa mga panghitabo didto sa sulod, uy. Pastilan, Bay, abi nako’g kitang mga lalaki ra ang dugay maibot atubangan sa samin–apil man pud diay ang mga babaye. Unya, mas dugay pa gyud mahuman og pangihi kining mga babaye, Bay. Pastilan, dili gud na sila mahimong mangihi nga magtindog sama nato. Kinahanglan pa gud na gyud nila huboon ang ilang pantalon o sayal, dayon mopungko pa gyud aron mangihi. Duna ba sad kaha sila’y urinal nga nagsandig sa bungbong, Bay, no? Ambot lang. Dungag pa, kalas kaayo ning mga babaye og tissue, Bay. Kada pangihi nila, mamahid gyud na sila og tissue. Nakapangutana lang ko, Bay, nganong kitang mga lalaki dili mamahid og tissue matag human nato og pangihi.

Gilibot nako ang SM, Bay. Pastilan pud ning ubang mga tawo didto, Bay, hilabihang hinaya maglakaw, mora’g nagsunod og prusisyon. Nakasunod ko’g pundok sa mga estudyante, Bay, nga hinay kaayo naglakaw, mora’g gipangdanlak. Kantahan ko pa bitaw sila’g “O Birhen Maria, ig-ampo mo kami…”, da, nakabantay lagi nga duna diay nagsunod nila. Busa, miiway na lang sila ug nakaagi na ko.

Gitugotan ra pud ang pagpanigarilyo sa sulod sa SM, Bay. Kapila gyud ko duola og mga wail (wa ilhi) kay modagkot sa akong nagbagang sigarilyo. Usahay, mahinumdum sila pagpasalamat. Kasagaran, ako na la’y mopasalamat nga gi-uli pa nila ang akong sigarilyo. Makabantay ra pud baya ang uban nga nakalimot sila pagpasalamat, nya mongisi, dayon mopasalamat na lang. Pastilan, Bay, naa ra man unta sila sa SM, nganong dili na man lang sila moduaw sa grocery section ug mopalit ngadto og posporo.

Pipila ra ni sa imong mga masinati kung moduaw ka’g SM, Bay. Duna pa’y daghan. Sa pagkakaron, anhi lang ko kutob kay taas-taas na ang akong asoy sa akong kasinatian didto. Akong tambag nimo, Bay, sa sunod moadto ka’g SM, ayaw pagtext samtang naglakaw ka kay basin makadasmag ka’g babaye nga gwapa. Kini ra bang mga babaye nga nasayod nga gwapa sila, mga isnabera ra ba kaayo. Magsuko-suko pa dayon kung madam-agan sila bisan wala tuyoa. Busa, kung mangatol ang imong kamot sa pag-text, hunong ug padaplin. Ayaw pag-text nga maglakaw kay basin dili lang unya babayeng gwapa ang imong madasmagan, basin makadasmag pud unya ka’g bildo o estante nga naninda og sago. Pastilan, makabayad ka’g di oras.