Nagpahangin mi sa baybayon. Naglantaw sa langit nga wala’y bahid sa panganod. Bugnaw ang hangin. Migunit sa akong kamot ang akong uyab ug mipaduol kanako. Gisandig niya ang iyang aping sa akong aping. Hinay-hinay, milingi siya kanako, mitutok sa akong mga mata…hinay-hinay, mipaduol sa iyang mga ngabil sa akong mga ngabil. Mihunong kadiyot ang akong ginhawa, ug nakalimot ko kung nagpitik pa ba ang akong kasingkasing sa dihang…
MEOOOOWWRRRRRRRR!!! Pastilan, Bay, nakamata ko gikan sa akong damgo. Ang mga iring sa among luyo nagsugod na sa ilang konsiyerto sa gugma.
Pastilan, Bay, kaadlawong dako, takna sa pagkahinanok sa tibuok namo banay. Gihugyaw kaming tanan sa lagubo sa atop diin nagbugno ang mga iring nga nagbiga.
NAAAAAAAAAAAWWWWWWWWRRR!!! Misiyagit ang usa. TOMAROOOOOWWWWWRR! Mitubag pud ang iyang hinigugma. Mipadayon sila sa ilang bugno sa gugma. Carino brutal kaayo ning mga iring.
Pastilan, Bay, ang ilang mga siyaok ra gyud ang nakatugaw sa kahilum sa kaadlawon. Ganina ra man to napalong ang saba sa diskoral gikan sa kalakbit nga sitio. Karon, mipuli na pud ang mga iring. Panahon na sa pagpasanay sa ilang kaliwat.
Lain laing mga kasikas ang imong madungog, Bay. Usahay, mora’g malaksi na ang among atop. Usahay pud, mora’g duna’y nagligid-ligid sa among atop. Kung anhi sila sa ubos mag-romansahay, pastilan, Bay, mahurot og kagisi ang mga plastic bag nga puno og basura sa among nataran.
Pagkabuntag, gisusi ko ang ilang gihimong motel sa luyo sa balay, pastilan, Bay, nangalarot ang among mga tanom. Nangabali ang mga tanom nga bag-o pang usbong. Gihimo man tingali nila’g matrimonial bed ang among tanaman, Bay.
Ambot, Bay, nganong dili sarang ang paghinigugmaay sa mga iring. Magkinawrasay na sila, Bay. Magbugno. Lahi ra gyud kanatong mga tawo nga kanunay’ng gusto nga hiluna ang atong pagbuhat sa buhat sa pagpasanay sa atong kaliwat.
Busa, Bay, ang akong tambag kanimo, kung dili ka buot matugaw ang imong pagkatulog nianang mga iring nga nagbiga, pagbuhi og iro.
Haring Wati
Haring Wati (King Earthworm) is the idiosyncratic and eccentric king of Saksaksinagol.com, but before anything else, he is many things rolled into one. He writes for pleasure and incidentally makes a living out of it. He is die-hard Cebuano. He is also known as Elmer Montejo.