VCDeoke

Pareho man gyud tang duha, Bay. Hilig man ta og kanta-kanta. Kahinumdum ko kaniadto nga gitara lang ang atong kontra, apan karon, dala sa kabag-ohan, aduna na’y videoke. Sa tinuoray lang, gikan sa gitara, ang atong kalingawan sa pagkanta-kanta milambo ngadto sa karaoke. Dayon, pagdagsa sa VHS, videoke na pud. Karon, miabot na ang mga VCD, busa, VCDeoke na pud kita.

Ma-gitara o ma-VCD ang atong gamiton sa atong pag-awit sa atong mga paboritong awit, wala mawala ang usa ka butang–nga kita gigasahan og bulawanong paghigugma sa mga honi. Tinuod kini sa kadaghanan sa mga Filipino, labi na sa mga Sugbuanon sama nato.

Bantayi lang gud ang linibo ka mga pirated VCDs nga gihiklad diha sa mga ginagmay’ng estante sa Colon. Usa kana ka pagmatuod nga adunay daghang mamamalit sa mga videoke CD.

Ug tungod sa kamahal sa mga orihinal ug legal nga mga kopya niini, kadaghanan sa mga mamalitay matintal pagpili na lang niadtong pirated CD. Mogasto ka’g labaw sa P300 alang lamang sa usa ka orihinal ug legal nga kopya, apan menos sa usa ka gatos ka pesos lamang ang imong iduga alang sa usa ka pirated nga kopya. Mao-mao ra ang kalidad sa pirated nga kopya ug sa orihinal. Alang sa kadaghanan sa mga Sugbuanon, basta makakita lang sila og salida, nya mahimo pa gyu’ng mosabay og awit, payts na kaayo.

Alang sa mga hilig sa mga salida, aduna pu’y mga VCD movies. Usahay, mag-una pa gani og abot ang mga VCD sa mga salida nga wala pa ikapakita sa mga sinehan dinhi sa Sugbo. Ang nakaparat lang sa kasagaran niining mga pirated nga VCD mao nga ang kopya kinuha gikan sa sinehan. Mao nga ayaw lang kahibulong nga inig kahuman sa imong gilantaw nga salida, kalit lang duna’y ulo nga motuyhakaw. O dili ba kaha, samtang nagtan-aw ka og comedy sa pirated nga VCD, duna lang kalit mokatawa. Dugang pa, kasagaran sa mga pirated nga kopya wala na lakipi og end credits. Kasabot ka’g end credits? Kana bitaw’ng talaan sa mga artista sa salida, lakip ang director, ug ang mga tawong nagpaluyo sa pagmugna sa salida. Mao kana’y end credits. Busa, kung naagni ka sa usa ka artista sa salida nga imong gitan-aw, ayaw na la’g pangitaa ang iyang pangalan sa end credits kay wala’y end credits and kasagaran sa mga pirated VCDs.

Usa pud ka risgo sa mga ilegal nga kopya mao ang mga dili kapugngan nga daot sa VCD mismo. Usahay duna’y mga garas o hugaw nga nipilit sa VCD, mao nga molukso ang salida, o mobalik ba kaha sa sinugdanan. Usahay sab, mauwahi ang lihok sa baba sa tingog nga imong madungog–kahinumdum lang hinuon ko sa mga salida sa RPN 9 nga sama sa Marimar diin dili magtakbo ang buka sa baba sa tingog nga mabati. Kahinumdum pud ko sa usa ka bastos nga kasinatian bahin sa usa ka pirated audio CD nga akong napalit diha sa daplin-daplin. Mga awit kadto ni Pilita ug akong gipaminaw ang iyang kanta nga “Usahay.” Nakugang ko dihang mikalit siya’g awit, “…Nganong giti…giti…giti…giti…” Abi nako’g X-rated ang CD nga akong napalit. Diay to, diha diay garas sa CD mao nga magbalik-balik ang maong bahin sa awit. Akong gipailisan ang kopya sa akong gipalitan ug tama na ang awit ni Pilita, “…Nganong gitiaw-tiawan? Ang gugma ko kanimo, kanimo da…”

Kung mopalit sab ka’g mga audio CD nga pirated, wala pu’y kopya sa mga lyrics nga sarang gilakip sa mga orihinal. Subo kaayo, kay kung aduna ka’y awit nga mauyonan, dili nimo makaplagan ang kopya sa lyrics. Apan sagad nga kontento lamang ang mamalitay sa mga pirated nga audio CD. Bahala na’g wala’y kopya sa lyrics basta makadungog lang sila sa ilang mga paboritong awit.

Bay, kanus-a man ka moduaw diri nako aron magkanta-kanta na sab ta? Nangaputol na ang kwerdas sa akong gitara kay dugay na nako wala gamita. Tugawon na pud nato ang among mga silingan sa atong mga yabag nga tingog nga malanugon kaayo sa lawom nga gabii.