(Office of Readings)
Pagpangdapit
Sinugdanan
Ginuu, ✠ buksan mu ang akung mga ngabil.
Ug ang akung baba magamantala sa imung pagdayig.
Dali kamu, simbahun ta ang Ginuu, ang Hari nga muabut.
Salmu 95
Dali kamu, simbahun ta ang Ginuu, ang Hari nga muabut.
Dali kamu, simbahun ta ang Ginuu, ang Hari nga muabut.
ang panun nga iyang giamuma.
Dali kamu, simbahun ta ang Ginuu, ang Hari nga muabut.
“Ayaw pagahia ang inyung ulu sama sa inyung katigulangan didtu sa Meriba
Dali kamu, simbahun ta ang Ginuu, ang Hari nga muabut.
Nagdumili sila pagtuman sa akong mga sugu!’
sa yuta nga akung papahulayan kaninyu.’ ”
Dali kamu, simbahun ta ang Ginuu, ang Hari nga muabut.
Dali kamu, simbahun ta ang Ginuu, ang Hari nga muabut.
Awit-Pagdayig (Imnu)
Duha ka hubad ang gihimu ku sa imnu nga “Verbum Supernum Prodiens, a Patre Lumen Exiens.” Ang una metrical, buut pasabut maawit kay may gisunud nga ihap sa mga silaba. Ang ikaduha litiral, buut pasabut gitumung nga mapahayag ang kahulugan sa imnu.
Ay! Pulung sa kahitas-an,
hayag gikan sa Amahan,
natawu sa kalibutan
sa panahun nga gimbut-an.
Sa kahayag kami pun-a,
sa imung gugma inita,
ug ang tingug sa tigsangyaw,
sa tanang lingla mubugaw.
Sa imung pagbalik puhun
arun hukman kaming tanan,
ang pagkasad-an timbangun,
ug ang katarung gantihan.
Ayaw ang sala tuguti,
sa kadaut mi gapusun.
Sa tunhay nga kinabuhi
paambita mi hinuun.
Himaya kanimu, Cristo,
Hari nga mapuangurun,
Amahan ug Ispiritu,
Gahapun, ugma, ug karun. Amin.
Ay! Pulung nga nagagikan sa kahitas-an,
kahayag nagsumikad sa kahayag sa Amahan,
nagpakatawu ka arun luwasun ang kalibutan
sa pag-abut sa gitakdang panahun.
Umanhi ka ug hupnga sa kahayag ang amung mga kasingkasing,
libuti sila sa masanagung kainit sa gugma mu,
ug kun madunggan na ang singgit sa magsasangyaw,
pagabugawun na unta ang tanang pagpanglingla.
Busa kun muanhi ka na gayud isip Hukum
aron susihun ang hunahuna ug buhat sa amung mga kasingkasing,
arun hukman ang tinaguang kasal-anan
ug gantihan ang mga matarung sa ilang binuhatan.
Ayaw pasagdi nga ang amung mga sala
magahawid kanamu sa pakig-uban sa mga dautan,
hinunua uban sa mga balaan paambita kami
sa langitnung kinabuhi sa kahangturan.
Ay! kanimo, Cristo, labing mapinanggaung Hari,
ug sa Amahan, ang himaya,
uban sa Ispiritu Paraklitu,
sa tanang katuigan hangtud sa kahangturan. Amin.
Pag-awit sa mga Salmu (Salmudiya)
Kini ang atung langitnung Hari; nagdala siya’g gahum ug kusug arun luwasun ang kanasuran, aliluya.
Salmu 1
u makig-abin kanila nga wala muila sa Dyus.
ug ang dahun niini dili malaya.
Kini ang atung langitnung Hari; nagdala siya’g gahum ug kusug arun luwasun ang kanasuran, aliluya.
Anak sa Jerusalem, paglipay ug pagsadya; muabut kanimu ang imung Hari. Ayaw’g kahadluk, Sion; nagdali pag-anha ang imung Manunubus.
Salmu 2
ug karung adlawa imu na akung amahan.
Anak sa Jerusalem, paglipay ug pagsadya; muabut kanimu ang imung Hari. Ayaw’g kahadluk, Sion; nagdali pag-anha ang imung Manunubus.
Hinluan ta ang atung mga kasingkasing alang sa pag-abut sa atung dakung Hari, arun andam kita sa pag-abiabi kaniya; nagsingabut siya ug dili siya maglangan.
Salmu 3
ug gipahiuli mu kanaku ang kadasig.
Hinluan ta ang atung mga kasingkasing alang sa pag-abut sa atung dakung Hari, arun andam kita sa pag-abiabi kaniya; nagsingabut siya ug dili siya maglangan.
Tudling (Birsikulu)
Panghangad kamu ug tan-awa.
Haduul na ang inyung kaluwasan.
Mga Pagbasa
Unang Pagbasa
Gikan sa sinugdanan sa basahun sa prupita nga si Isaias
1:1-18
Ang pagbadlung sa katawhan
Mau kini ang minsahi nga gipadayag sa Dyus kang Isaias nga anak ni Amos bahin sa Juda ug sa Jerusalem sa mga panahun nila ni Uzias, ni Jotam, ni Ahaz ug ni Ezequias nga mga hari sa Juda.
Ay! Pamati, kalangitan, ug patalinghug, yuta,
kay nagsulti ang Ginuu,
“Giatiman ug gipatubu ku ang akung mga anak,
apan misukul sila kanaku.
Ang baka nakaila sa iyang tag-iya
ug ang asnu nahibalu sa pasungan sa iyang agalun,
apan ang Israel nga akung katawhan wala makasabut
ug wala makaila kanaku.”
Alaut ka, ay! nasud nga makasasala,
katawhan nga malapasun kaayu ug dautan,
kaliwat nga mga tikasan!
Gisalikway ninyu ang Ginuu, ang balaang Dyus sa Israel,
ug mitalikud kamu kaniya.
Nganung magpadayun man kamu pagsukul kanaku?
Gustu ba kamu nga dugangan ang inyung silut?
Israel, nalukup na ug samad ang imung ulu,
ug ang imung kasingkasing lakip ang imung hunahuna luya na kaayu.
Gikan sa lapalapa ngadtu sa ulu,
wala gayuy gisayluan, pulus pangus, bun-ug ug nagdugu nga mga samad;
wala kini hugasi, u tambali, u hidhirig lana.
Biniyaan na ang inyung nasud,
gisunug ang inyung mga syudad samtang kamu nagtan-aw;
giamung-amungan sa mga langyaw ang inyung kaumahan
ug nangagun-ub ang tanan.
Ang Jerusalem mau na lamang ang nahibilin,
sama ka huyang sa usa ka payag-bantayanan diha sa kaparasan,
sama sa silunganan diha sa tanaman sa mga pipinu,
sama sa syudad nga gilibutan sa mga kaaway.
Kun ang Ginuu nga Labing Gamhanan
wala pa magbilin ug pipila kanatu,
sama na unta kita sa Sodoma ug Gomora.
Kamung mga pangulu ug katawhan sa Jerusalem
nga walay kalainan sa mga taga-Sodoma ug Gomora:
Pamatia ninyu ang pulung sa Ginuu
ug patalinghugi ang iyang mga gitudlu kaninyu.
Nag-ingun ang Ginuu,
“Walay bili alang kanaku ang daghan ninyung mga halad;
gipul-an na aku sa mga halad nga mga karniru nga inyung gisunug
ug sa mga tambuk sa mga mananap;
wala aku mahimuut sa dugu sa turung baka
u sa nating karniru u sa mga laking kanding.
Kinsay nagsugu kaninyu
sa pagdala niining tanan inigsimba ninyu kanaku?
Kinsay nagsugu kaninyu
sa pagtunubtunub sa hawanan sa akung Timplu!
Ayaw na kamu pagdala sa mga halad nga walay kapuslanan.
Wala akuy gustu sa insinsu;
dili na aku makaagwanta sa inyung pagsaulug sa Bag-ung Bulan ug sa Adlawng Igpapahulay
tungud sa inyung mga sala ug sa inyung pagsimba.
Ang inyung mga kasaulugan sa Bag-ung Bulan
ug ang naandan nga mga kasaulugan ngil-ad na alang kanaku;
gisamukan aku ug gipul-an na niini.
“Sa dihang ibayaw ninyu ang inyung mga kamut,
dili aku mutan-aw kaninyu;
dili aku mamati bisan pag kapila kamu mag-ampu,
kay naduhig sa dugu ang inyung mga kamut.
Panghugas kamu ug hinlui ninyu ang inyung kaugalingun;
hunung na sa pagbuhat ug dautan sa akung atubangan,
ug buhata ang maayu;
patunhaya ang hustisya ug tabangi ang gidaugdaug;
panalipdi ang mga ilu ug labani ang mga biyuda.”
Nag-ingun ang Ginuu,
“Ngari kamu ug maghusay kita.
Bisag unsa ka pula ang inyung sala, maputi kini kaayu;
bisan pa kinig dagtum-pula, maputi kini sama sa balhibu sa karniru.”
Tudling-Tubag (Rispunsuryu)
Is 1:16, 18, 17
Panghugas kamu ug pagmahinlu kamu. Palayasa ang kadautan gikan sa inyung mga kasingkasing, ipalayu sa akung panan-aw.
Bisan pa ug pula kaayu ang inyung sala, himuun ku silang maputi kaayu.
Hunung sa pagbuhat ug dautan ug pagkat-un sa pagbinuutan, pangita kanunay sa kaangayan.
Bisan pa ug pula kaayu ang inyung sala, himuun ku silang maputi kaayu.
Ikaduhang Pagbasa
Gikan sa katikisis ni San Cirilo sa Jerusalem, ubispu
(Cat. 15, 1-3: PG 33, 870-874)
Mahitungud sa duha ka pag-anhi ni Cristo
Wala kita magsangyaw sa usa lang ka pag-anhi ni Cristo apan sa ikaduha sab nga labi pang mahimayaun sa nahauna. Ang unang pag-anhi mipasundayag sa iyang pailub; ang ikaduha magdala sa kuruna sa dyusnung gingharian.
Bisan unsang butanga mahitungud sa atung Ginuung Jesucristo kasagaran may tagurha ka bahin. May pagkatawu gikan sa Dyus sa wala pa ang mga katuigan, ug may pagkatawu gikan sa usa ka birhin sa kahingpitan sa panahun. May tinagu nga pag-anhi, daw ulan sa balhibu sa karniru, ug may pag-anhi nga masaksihan sa tanan, apan sa umaabut pa.
Sa una niyang pag-anhi giputus siya ug lampin ug gipahiluna sa pasungan. Sa iyang ikaduha, pagasaputan siya sa kahayag. Sa unang pag-anhi giantus niya ang krus ug wala igsapayan ang kaulaw; sa ikaduhang pag-anhi magmahimayaun siya, uban sa dakung panun sa mga anghil. Busa, dili lang kutub sa unang pag-anhi ang atung pagsud-ung apan magpaabut sab kita sa ikaduha. Sa unang pag-anhi miingun kita: Bulahan siya nga nagaanhi sa ngalan sa Ginuu. Usbun natu kini paglituk sa ikaduhang pag-anhi; manag-ambahan kita uban sa mga anghil arun sugatun ang Ginuu ug managtuaw sa pagsimba: Bulahan siya nga nagaanhi sa ngalan sa Ginuu.
Dili muanhi ang Manunubus arun siya hukman pag-usab apan arun hukman sila nga mihukum kaniya. Kaniadtung gihukman siya, nagpatara siya; unya puhun sudyaan niya kadtung mga nagpasipala sa pagpalansang kaniya sa krus: Gibuhat ninyu kining mga butanga, ug nagmahilum aku.
Tumung sa iyang unang pag-anhi ang pagtuman sa iyang laraw sa gugma, sa pagpanudlu sa katawhan pinaagi sa mahigalaung pagpangdani. Apan niining higayuna, uyun man ang katawhan u dili, kinahanglan silang mahisakup sa iyang gingharian. Naghisgut si Prupita Malaquias ug duha ka pag-abut. Ug ang inyung gihulat nga Ginuu mubuthu sa iyang timplu: kini ang usa sa mga pag-abut.
Naghisgut sab siya ug usa pa ka pag-abut: Tan-awa, muabut ang Ginuu nga labing makagagahum, ug kinsa ang makasugakud sa adlaw sa iyang pagsulud, u kinsa ang makabarug sa iyang atubangan? Kay sama siya sa kalayu nga mulunsay sa puthaw, u sa sabun, ug manglunsay siya ug manghinlu.
Misulat sab si Pablo ngadtu ni Tito kabahin niining duha ka mga pag-abut: Ang grasya sa Dyus nga Manluluwas mipadayag ngadtu sa katawhan ug nagsugu kanatu nga talikdan ang pagkatampalasan ug mga pagkamakakalibutanun ug nga magmapinugnganun, magminatarung, ug magmakidyusnun kita niining panahuna, samtang nagpaabut kita sa malipayung gilauman natu — ang pagtungha sa himaya sa atung halangdung Dyus ug Manunubus nga si Jesucristo. Matnguni nga si Pablu naghisgut bahin sa unang pag-anhi (ug mapasalamatun siya niini) ug sa ikaduhang pag-anhi nga atung gipaabut.
Tungud niana, ang atung gipahayag nga pagtuu nadawat ninyu pinaagi niining mga pulunga: Misaka siya sa langit, ug nagalingkud sa tuu sa Amahan, ug mubalik siya pag-usab nga mahimayaun arun paghukum sa mga buhi ug mga minatay, ug ang iyang gingharian walay katapusan.
Sa atu pa, ang atung Ginuung Jesucristo magagikan sa langit. Mubalik siya nga mahimayaun sa katapusan sa kalibutan, sa katapusang adlaw. Kay may pagkatapus kining kalibutana, ug bag-uhun ang minugna nga kalibutan.
Tudling-Tubag (Rispunsuryu)
Cf. Sal 49, 3; 80, 2; 24, 7-9
Gikan sa halayu, nakita ku ang gahum sa Dyus nga nagsingabut, ug ang tibuuk kalibutan gilukuban sa panganud. Sugata siya ninyu nga nanagtuaw:
Sultihi kami kun ikaw ba ang maghari sa katawhan sa Israel.
Ang tanang katawhan sa kalibutan, ang tanang anak sa tawu,
adunahan man u kabus, sugata siya ninyu nga nanagtuaw:
Magbalantay sa Israel, dungga kami, ikaw nga migiya sa kaliwat ni Jose ingun ug mga karniru,
sultihi kami kun ikaw ba ang maghari.
Pangangaha ang mga ganghaan, kamung mga prinsipi, padayuna ang Hari sa himaya,
nga maghari sa katawhan sa Israel.
Gikan sa halayu, nakita ku ang gahum sa Dyus nga nagsingabut, ug ang tibuuk kalibutan gilukuban sa panganud. Sugata siya ninyu nga nanagtuaw:
Sultihi kami kun ikaw ba ang maghari sa katawhan sa Israel.
Ang Te Deum
Ay! Dyus, nagasimba kami kanimu;
ay! Ginuu, nagapasidungug kami kanimu.
Amahan nga walay katapusan,
nagyukbu kanimu ang tibuuk kalibutan.
Ang kaanghilan, ang kalangitan, ug ang Kagahuman sa langit,
ang mga Kirubin ug Sirapin, sa pagdayig kanimu way hunung nga nanagsinggit:
Balaan, Balaan, Balaang Ginuung Dyus sa kagahuman,
napunu sa kaharianun sa imung himaya ang yuta ug kalangitan.
Ang mahimayaung panun sa Apustulis nagaawit kanimu,
ang halangdung kahugpungan sa mga prupita nagadayig kanimu,
ang kasundaluhan sa mga martir nga nanagputi naghimaya kanimu,
ang Balaang Simbahan sa tanang bahin sa yuta nagapasidungug kanimu,
Amahan kansang kahalangdun walay kinutuban,
uban sa matuud ug bugtung mung Anak, nga takus pagahalaran,
ug ang Ispiritu Santu, Manlalaban.
Ay! ikaw, Cristo, ang Hari sa kahimayaan,
ikaw sa kahangturan ang Anak sa Amahan;
sa dihang gimbut-an mung tubsun ang katawhan,
wa mu gisalikway ang sa Birhin nga taguangkan;
sa iyang kalala ang kamatayun imung giilugan,
ug gibuksan ang Langitnung Gingharian
alang kanila nga ikaw ang gisaligan.
Sa tuu sa Dyus ang imung lingkuranan
uban sa himaya sa Amahan.
Nagatuu kami nga ikaw ang Hukum nga muanhi.
Ug busa nangaliyupu kami,
ang imung mga alagad tabangi,
nga sa labing mahal mung dugu gitubus.
Paubana sila sa imung mga santus
ngadtu sa himayang walay pagkatapus.
¶ Ang musunud nga mga tudling mahimung dili apilun:
Luwasa ang katawhan mu, Ginuu, ug ang imung kabilin panalangini.
Ibayaw sila sa kinabuhing dayun ug sila tultuli.
Nagdayig kami kanimu sa adlawng tanan,
ug nagsimba sa imung ngalan sa walay katapusang mga katuigan.
Magmapuangurun ka niining adlawa, Ginuu, ug sa tanang sala kami panalipdi.
Ay! Ginuu, kanamu maluuy ka, kaluy-i kami.
Maamua unta ang kaluuy mu, Ginuu,
kay misalig man kami kanimu.
Ay! Ginuu, kanimu ku gipahiluna ang akung paglaum:
Ayaw gayud aku pakyasa intawun.
Pag-ampu
Mag-ampu kita.
Hatagi ang imung mga matuuhun, nangamuyu kami, Dyus nga labing makagagahum,
sa kalig-un sa pagdagan arun tagbuun ang imung Cristo
ug mga buhat sa katarung,
arun, tinigum sa iyang tuung kamut,
magmatakus sila sa paghuput sa langitnung gingharian.
Pinaagi sa amung Ginuung Jesucristo, imung Anak,
nga buhi ug naghari uban kanimu,
diha sa panaghiusa sa Ispiritu Santu,
Dyus, hangtud sa kahangturan.
Amin.
Pagdayig
Daygun ta ang Ginuu.
Salamat sa Dyus.
Kining hubad Sinugbuanun ni Elmer Montejo pinasubay sa The Divine Office: The Liturgy of the Hours
(© 1974, 2023 International Commission on English in the Liturgy Corporation, all rights reserved).
Ang hubad sa Oratio (Katapusang Pag-ampu) pinasubay sa The Roman Missal (third typical edition, © 2010,
International Commission on English in the Liturgy Corporation, all rights reserved) ug ang hubad sa “Te Deum”
pinasubay sa kinabag-uhan ug aprubadung hubad Ininglis niini niadtong tuig 2020. Ang mga Salmu, unud sa Unang Pagbasa,
ug pipila ka mubu nga mga tudling sa Ikaduhang Pagbasa dili iya sa taghubad apan kinutlu sa Maayong Balita Biblia (Adunay Deuterocanon),
© 1999 Philippine Bible Society, ug gihulad, sama sa ubang bahin, sa gipasayung panitik (simplified spelling).
Kinaulahiang pag-usab: Nubimbri 18, 2024.
Unang paghubad: Uktubri 23, 2024.
If you like my work and want to say thanks — buy me a coffee! If you find my work useful and want to encourage me to keep going — buy me a coffee!
Any amount that you happily and willingly share supports my work and inspires a Cebuano writer and language advocate like me to work even harder.
If you’re in the Philippines, buy me a coffee via the following channels (scan the QR coode with your GCash, GoTyme, or banking app):
Or, if you're elsewhere, click/tap the button below and buy me a coffee using your credit card, Apple Pay, or Google Pay:
Please let me thank you, too, for giving to my coffee fund! After sending your support, contact me right away so that I can inscribe your name on Manuy Em’s Great Wall of Gratitude.