Ikaduhang Duminggu sa Adbintu

Niadtung adlawa gikuha mu ang mga hinagiban gikan sa Balay sa Lasang nga gibutangan niini. Ug nakita mu ang daghan nga mga buslut sa kuta sa Jerusalem ug gikan sa ubus-ubus nga linaw gitigum mu ang mga tubig ug giihap mu ang kabalayan sa Jerusalem ug unya gipangguba ug gigamit mu arun paglig-un sa kuta. Ug gibuhat mu ang usa ka tangki sa tungatunga sa duha ka kuta arun ipatubig sa karaang tangki. Apan wala ka mudangup u magtagad sa Dyus nga mauy nagplanu niini kaniadtu pa.

Niadtung adlawa awhagun sa Ginuung Dyus nga Labing Gamhanan
ang mga tawu sa paghilak ug pagbangutan,
sa pagpakiskis sa ilang ulu ug pagbistig saku.

Apan magsadya ug maglipay hinuun sila
ug mag-ihaw silag mga baka ug mga karniru
ug mag-ingnanay, “Hala, mangaun ug mag-inum kita tutal mangamatay ra man gihapun kita.”
Giingnan aku sa Ginuung Dyus nga Labing Gamhanan,
“Dili ku gayud pasayluun kining ilang sala samtang buhi pa sila.
Aku, ang Ginuung Dyus nga Labing Gamhanan, mauy nagsulti niini.”

Mau kini ang giingun sa Ginuung Dyus nga Labing Gamhanan,
“Adtua kining tinugyanan nga si Sebna
nga mauy nagdumala sa palasyu sa hari ug ingna siya:
‘Si kinsa ka man nga nagbuhat ka mag lubnganan
alang sa imung kaugalingun dinhi niining pangpang?’
Hibaw-i nga ilabay ka sa Ginuu, bisan pag gamhanan ka.
Gunitan ka niya ug ituyuktuyuk
ug ilambuyug ngadtu sa patag sama sa bula.
Didtu mamatay ka tupad sa mga karwahi nga imung gipasigarbu,
ikaw nga nagpakaulaw sa banay sa imung agalun.’

‘Palagputun ka sa Ginuu gikan sa imung katungdanan ug gikan sa imung nahimutangan.
Niadtung adlawa paanhiun ku ang akung suluguun
nga si Eliakim nga anak ni Hilkias.
Sul-uban ku siya sa imung bisti
ug baksan ku siya sa imung bakus.
Unya itugyan ku kaniya ang imung gahum
ug mahimu siyang amahan
sa mga lumulupyu sa Jerusalem ug sa Juda.

Ug isangun ku sa iyang abaga ang yawi sa balay ni David.
Siyay muabli niini ug walay makasira;
musira siya niini ug walay makaabli.
Ibutang ku siya sa usa ka lig-un nga dapit daw usa ka ugsuk
ug mahimu siyang garbu sa iyang banay.’”

Ang tingug sa nagsinggit didtu sa kamingawan: Andama ang dalan sa Ginuu, tul-ira ang mga agianan sa Dyus. Gipatin-aw sa panagna nga mahitabu gayud kini, dili sa Jerusalem, apan sa kamingawan: didtu mupakita ang himaya sa Ginuu, ug ipahibalu ngadtu sa tanang katawhan ang kaluwasan gikan sa Dyus.

Didtu sa kamingawan gisangyaw ni Juan nga Magbubunyag ang makaluwas nga pagkaanaa sa Dyus, ug didtu sab gipadayag ang kaluwasan gikan sa Dyus. Natuman ang panagna sa dihang si Cristo ug ang iyang himaya nahimung dayag sa tanan: human siya bunyagi mibukas ang langit ug ang ispiritu Santu nga nagpanagway ug salampati mitugdun kaniya, ug nabati ang tingug sa Amahan nga mipanghimatuud sa iyang Anak: Kini ang pinangga kung Anak, paminawa siya.

Nagpasabut ang panagna nga ang Dyus muabut sa awaaw nga dapit nga tuyuun sukad pa sa sinugdanan. Walay alam ang mga paganu bahin sa Dyus kay ang iyang balaang mga alagad ug mga prupita gidid-an man sa pagduul kanila. Ang tingug nagsugu nga andaman ug agianan ang Pulung sa Dyus: ang libaungun ug walay dalan nga yuta pagapatagun arun ang atung Dyus may lapad nga agianan inig abut niya. Andama ang agianan sa Ginuu: ang dalan mau ang pagsangyaw sa Maayung Balita, ang bag-ung makahupay nga minsahi, andam nga magtudlu sa tanang katawhan mahitungud sa makaluwas nga gahum sa Dyus.

Tungas sa habug nga bukid, tagdala sa maayung balita sa Sion. Singgit ug kusug, tagdala sa maayung balita sa Jerusalem. Miayun kining mga pulunga sa kahulugan sa nahauna. Nagpunting kini sila sa mga ibanghilista ug nagsangyaw sa pag-abut sa Dyus taliwala sa katawhan, human naghisgut kabahin sa tingug nga nagsinggit sa kamingawan. Haum ang paghisgut bahin sa mga ibanghilista human sa panagna mahitungud ni Juan nga Magbubunyag.

Unsa’y gipasabut sa Sion kundili ang syudad nga kanhi gitawag ug Jerusalem? Kining bukira ang gihisgutan sa maung tudling sa Kasulatan: Ania ang Bukid sa Sion diin ikaw nagpuyu. Ang Apustul nag-ingun: Mianhi ka sa Bukid sa Sion. Wala ba kini magpasabut sa hugpung sa mga apustul nga pinili gikan sa mga Judiu nga nanga-Kristyanu?

Kini ang Sion, ang Jerusalem, nga nakadawat ug kaluwasan gikan sa Dyus. Nagtungtung siya sa bukid sa Dyus, sa atu pa, gibayaw siya sa bugtung Pulung sa Dyus. Gisugu siya sa pagtungas sa habug nga bukid ug pagsangyaw sa balita sa kaluwasan. Kinsa’y tagdala sa maayung balita kundili ang punduk sa mga ibanghilista? Unsa ba diay ang pasabut sa pagdala sa maayung balita kundili ang pagsangyaw ngadtu sa tanang kanasuran, sugud sa kalungsuran sa Juda, mahitungud sa pag-anhi ni Cristo sa kalibutan?