(Office of Readings)
Pagpangdapit
Sinugdanan
Ginuu, ✠ buksan mu ang akung mga ngabil.
Ug ang akung baba magamantala sa imung pagdayig.
Dali kamu, simbahun ta ang Ginuu, ang Hari nga muabut.
Salmu 95
Dali kamu, simbahun ta ang Ginuu, ang Hari nga muabut.
Dali kamu, simbahun ta ang Ginuu, ang Hari nga muabut.
ang panun nga iyang giamuma.
Dali kamu, simbahun ta ang Ginuu, ang Hari nga muabut.
“Ayaw pagahia ang inyung ulu sama sa inyung katigulangan didtu sa Meriba
Dali kamu, simbahun ta ang Ginuu, ang Hari nga muabut.
Nagdumili sila pagtuman sa akong mga sugu!’
sa yuta nga akung papahulayan kaninyu.’ ”
Dali kamu, simbahun ta ang Ginuu, ang Hari nga muabut.
Dali kamu, simbahun ta ang Ginuu, ang Hari nga muabut.
Awit-Pagdayig (Imnu)
Duha ka hubad ang gihimu ku sa imnu nga “Verbum Supernum Prodiens, a Patre Lumen Exiens.” Ang una metrical, buut pasabut maawit kay may gisunud nga ihap sa mga silaba. Ang ikaduha litiral, buut pasabut gitumung nga mapahayag ang kahulugan sa imnu.
Ay! Pulung sa kahitas-an,
hayag gikan sa Amahan,
natawu sa kalibutan
sa panahun nga gimbut-an.
Sa kahayag kami pun-a,
sa imung gugma inita,
ug ang tingug sa tigsangyaw,
sa tanang lingla mubugaw.
Sa imung pagbalik puhun
arun hukman kaming tanan,
ang pagkasad-an timbangun,
ug ang katarung gantihan.
Ayaw ang sala tuguti,
sa kadaut mi gapusun.
Sa tunhay nga kinabuhi
paambita mi hinuun.
Himaya kanimu, Cristo,
Hari nga mapuangurun,
Amahan ug Ispiritu,
Gahapun, ugma, ug karun. Amin.
Ay! Pulung nga nagagikan sa kahitas-an,
kahayag nagsumikad sa kahayag sa Amahan,
nagpakatawu ka arun luwasun ang kalibutan
sa pag-abut sa gitakdang panahun.
Umanhi ka ug hupnga sa kahayag ang amung mga kasingkasing,
libuti sila sa masanagung kainit sa gugma mu,
ug kun madunggan na ang singgit sa magsasangyaw,
pagabugawun na unta ang tanang pagpanglingla.
Busa kun muanhi ka na gayud isip Hukum
aron susihun ang hunahuna ug buhat sa amung mga kasingkasing,
arun hukman ang tinaguang kasal-anan
ug gantihan ang mga matarung sa ilang binuhatan.
Ayaw pasagdi nga ang amung mga sala
magahawid kanamu sa pakig-uban sa mga dautan,
hinunua uban sa mga balaan paambita kami
sa langitnung kinabuhi sa kahangturan.
Ay! kanimo, Cristo, labing mapinanggaung Hari,
ug sa Amahan, ang himaya,
uban sa Ispiritu Paraklitu,
sa tanang katuigan hangtud sa kahangturan. Amin.
Pag-awit sa mga Salmu (Salmudiya)
Kini ang atung langitnung Hari; nagdala siya’g gahum ug kusug arun luwasun ang kanasuran, aliluya.
Salmu 145 (I)
Kini ang atung langitnung Hari; nagdala siya’g gahum ug kusug arun luwasun ang kanasuran, aliluya.
Anak sa Jerusalem, paglipay ug pagsadya; muabut kanimu ang imung Hari. Ayaw’g kahadluk, Sion; nagdali pag-anha ang imung Manunubus.
Salmu 145 (II)
arun masayran sa mga tawu ang imung gamhanang mga buhat
Anak sa Jerusalem, paglipay ug pagsadya; muabut kanimu ang imung Hari. Ayaw’g kahadluk, Sion; nagdali pag-anha ang imung Manunubus.
Hinluan ta ang atung mga kasingkasing alang sa pag-abut sa atung dakung Hari, arun andam kita sa pag-abiabi kaniya; nagsingabut siya ug dili siya maglangan.
Salmu 145 (III)
Hinluan ta ang atung mga kasingkasing alang sa pag-abut sa atung dakung Hari, arun andam kita sa pag-abiabi kaniya; nagsingabut siya ug dili siya maglangan.
Tudling (Birsikulu)
Panghangad kamu ug tan-awa.
Haduul na ang inyung kaluwasan.
Mga Pagbasa
Unang Pagbasa
Gikan sa basahun sa prupita nga si Isaias
29:13-24
Gipahibalu ang paghukum sa Dyus
Ug miingun ang Ginuu,
“Kining mga tawhana nagpasidungug kanaku sa pulung lamang,
apan ang ilang mga kasingkasing halayu kanaku,
ug ang ilang pagtamud sa akung mga sugu
sama ra sa ilang pagtamud sa sugu sa mga tawu,
pinaagi sa pagsag-ulu.
Busa mahikurat na lamang sila
kay pahamtangan ku man sila sa nagsunudsunud nga hampak;
makawang ang kaalam sa ilang maalamun,
ug dili na makasabut ang masinabutun.”
Alaut kadtung nagtagu sa ilang planu gikan sa Ginuu,
ug gustu magbuhat diha sa kangitngit
ug nag-ingun, “Walay makakita kanamu u masayud sa amung gibuhat.”
Gibalit-ad nila ang mga butang!
Mas impurtanti ba diay ang lapuk
kay sa magbubuhat ug kulun?
Makaingun ba ang binuhat sa iyang magbubuhat,
“Dili ikaw mauy nagbuhat kanaku;
wala kay igung panabut?”
Dili na madugay nga ang Lebanon
mahimung usa ka uma nga daghag abut
ug mahisama na usab sa usa ka lasang.
Niadtung adlawa ang bungul makadungug na kun basahan siyag basahun,
ug ang mga buta nga nagpuyu sa kangitngit makakita na.
Makakaplag na usab ug kalipay diha sa Ginuu ang mga maaghup,
ug ang mga kabus magmaya tungud sa Balaang Dyus sa Israel.
Mahanaw ang mga tawung bangis
ug mawagtang ang mga mabugalbugalun,
ug puuhun ang tanan nga mahigugmaun sa pagbuhat ug dautan.
Puuhun sa Dyus ang nagbutangbutang sa iyang isigkatawu,
ug naglaang sa tawu nga naglaban sa katarung,
ug kadtung naghikaw ug hustisya
sa mga inusinti pinaagi sa paglimbung.
Busa mau kini ang gisulti sa Ginuu, ang Dyus sa Israel nga nagluwas kang Abraham sa iyang kalisdanan, mahitungud sa banay ni Jacob:
“Katawhan ku, dili na kamu maulawan pag-usab,
u mangluspad sa kaulaw.
Inigkakita ninyu sa inyung kaliwat nga akung ihatag kaninyu,
pasidunggan ninyu ang akung ngalan;
simbahun ninyu ang Dyus ni Jacob,
ug kahadlukan ninyu ang Dyus sa Israel.
Unya sila nga nangalibug makasabut na unya
ug ang mga gahig ulu mutuman na sa akung sugu.”
Tudling-Tubag (Rispunsuryu)
Isa 29:18,19; cf. Mat 11:4,5
Nianang adlawa makadungug na ang mga bungul sa mga pulung gikan sa basahun, ug sa pagbiya sa kangitngit ug pag-iway sa gabun, ang mga mata sa mga buta makakita na.
Ug magmaya ang mga kabus tungud kaniya nga Balaan sa Israel.
Balika ninyo si Juan ug suginli siya sa inyung nadungug ug nasaksihan: nakakita na ang mga buta, nakalakaw na ang mga bakul, nakadungug na ang mga bungul, ug ang mga kabus nasangyawan na sa maayung balita.
Ug magmaya ang mga kabus tungud kaniya nga Balaan sa Israel.
Ikaduhang Pagbasa
Gikan sa usa ka wali ni San Agustin, ubispu
(Sermo 293, 3: PL 38, 1328-1329)
Si Juan ang tingug, si Kristo ang Pulung
Si Juan ang tingug apan ang Ginuu ang Pulung nga dinha na sukad sa sinugdan. Kang Juan ang tingug nga milungtad makadiyut; sukad pa kaniadtu si Cristo na ang Pulung nga buhi sa kangturan.
Mag-unsa ra man ang tingug kun wala ang pulung, ang kahulugan — kun wala’y masabtan ug kawang nga tunug lamang ang anaa. Madunggan ra ang tingug nga wala’y pulung apan dili kini makadasig sa kasingkasing.
Apan, atung panid-an unsa’y mahitabu inig maninguha kitang lig-unun ang atung mga kasingkasing. Sa naghunahuna pa lang aku sa akung isulti, anaa na sa akung kasingkasing ang pulung u minsahi. Kun musulti aku kanimu, paninguhaun naku nga mapaambit sa imung kasingkasing ang unsa’y anaa na sa akua.
Sa akung pagpaninguha nga muabut kanimu kining minsahi arun ang pulung nga ania na sa akung kasingkasing mahiluna sab sa imuha, gamitun ku ang akung tingug arun musulti kanimu. Ang tunug sa akung tingug maglukdu ug maghatud nganha kanimu sa kahulugan sa pulung ug dayun mupahawa. Ang pulung nga gihatud sa tunug anaa na sa imung kasingkasing, apan anaa sab kana sa akua.
Inig nahatag na nganha kanimu ang pulung, dili ba daw mura’g muingun ang tunug: Angayang mutubu ang pulung ug aku mukunhud? Arun maalagaran ang pulung, ang tingug mipabati sa iyang kaugalingun, ug dayun mibiya, daw nag-ingun: Hingpit ang akung kalipay. Huptan ta ang pulung; di natu pasagdahang mawagtang ang pulung nga natisuk sa atung mga kasingkasing.
Nanginahanglan ba kamu’g pamatuud nga mahanaw ra ang tingug apan mulungtad gayud ang dyusnung Pulung? Asa na man karun ang bunyag ni Juan? Napahimuslan na kadtu, ug karun nawala na. Kang Cristo kitang tanan nagatuu; kaniya kita naglaum ug kaluwasan. Kini ang minsahi nga gisinggit sa tingug.
Lisud makita ang kalainan sa pulung ug sa tingug, maung bisan si Juan naalaan ug Cristo. Gituuhan nga ang tingug ug ang pulung usa ra. Apan miangkun man ang tingug sa iyang tinuud nga pagkasiya, ug nag-amping nga di makahimangud sa pulung. Miingun siya, Dili aku si Cristo, ni si Elias, ni ang prupita. Unya gipangutana siya: Kinsa man gayud diay ikaw? Mitubag siya: Aku ang tingug nga nagsinggit sa kamingawan: Andama ang agianan sa Ginuu.
Ang tingug nga nagsinggit sa kamingawan ang tingug nga mipusgay sa kahilum. Sa pag-ingun niya ug Andama ang agianan sa Ginuu daw nag-ingun sab siya: “Mitingug aku arun tultulan siya paingun sa inyung mga kasingkasing, apan dili siya musunud kanaku gawas kun andaman ninyu siya’g agianan.”
Ang pag-andam sa agianan nagpasabut sa pag-ampu ug maayu ug pagpakamapaubsanun. Angay kitang magkat-un gikan ni Juan nga Magbubunyag. Nagtuu ang uban nga siya ang Cristo; apan gilimud niya kini. Wala niya pahimusli ang ilang sayup arun siya mabulahan.
Kun miingun pa siya, “Aku ang Cristo,” dali kaayu siyang tuuhan kay mituu na man sila daan nga siya ang Cristo bisan wala pa siya muangkun. Apan wala gayud siya muingun niini; inay, gidawat niya kun kinsa siya. Gipatin-aw niya kun kinsa siya; nagmapaubsanun siya.
Nasayud siya kinsa ang manluluwas. Kahibalu siya nga usa siya ka lampara, ug nahadluk siya nga ang iyang dan-ag padparun sa hangin sa pagkamapahitas-un.
Tudling-Tubag (Rispunsuryu)
Jn 3:30; 1:27; Mar 1:8
Angay akung mukunhud, apan angay siyang muusbaw; siya nga nagsunud kanaku dinha na sa wala pa aku matawu;
Ug dili aku takus mubadbad sa higut sa iyang sandalyas.
Nagbunyag aku kaninyu sa tubig, apan bunyagan kamu niya sa Ispiritu Santu.
Ug dili aku takus mubadbad sa higut sa iyang sandalyas.
Ang Te Deum
Ay! Dyus, nagasimba kami kanimu;
ay! Ginuu, nagapasidungug kami kanimu.
Amahan nga walay katapusan,
nagyukbu kanimu ang tibuuk kalibutan.
Ang kaanghilan, ang kalangitan, ug ang Kagahuman sa langit,
ang mga Kirubin ug Sirapin, sa pagdayig kanimu way hunung nga nanagsinggit:
Balaan, Balaan, Balaang Ginuung Dyus sa kagahuman,
napunu sa kaharianun sa imung himaya ang yuta ug kalangitan.
Ang mahimayaung panun sa Apustulis nagaawit kanimu,
ang halangdung kahugpungan sa mga prupita nagadayig kanimu,
ang kasundaluhan sa mga martir nga nanagputi naghimaya kanimu,
ang Balaang Simbahan sa tanang bahin sa yuta nagapasidungug kanimu,
Amahan kansang kahalangdun walay kinutuban,
uban sa matuud ug bugtung mung Anak, nga takus pagahalaran,
ug ang Ispiritu Santu, Manlalaban.
Ay! ikaw, Cristo, ang Hari sa kahimayaan,
ikaw sa kahangturan ang Anak sa Amahan;
sa dihang gimbut-an mung tubsun ang katawhan,
wa mu gisalikway ang sa Birhin nga taguangkan;
sa iyang kalala ang kamatayun imung giilugan,
ug gibuksan ang Langitnung Gingharian
alang kanila nga ikaw ang gisaligan.
Sa tuu sa Dyus ang imung lingkuranan
uban sa himaya sa Amahan.
Nagatuu kami nga ikaw ang Hukum nga muanhi.
Ug busa nangaliyupu kami,
ang imung mga alagad tabangi,
nga sa labing mahal mung dugu gitubus.
Paubana sila sa imung mga santus
ngadtu sa himayang walay pagkatapus.
¶ Ang musunud nga mga tudling mahimung dili apilun:
Luwasa ang katawhan mu, Ginuu, ug ang imung kabilin panalangini.
Ibayaw sila sa kinabuhing dayun ug sila tultuli.
Nagdayig kami kanimu sa adlawng tanan,
ug nagsimba sa imung ngalan sa walay katapusang mga katuigan.
Magmapuangurun ka niining adlawa, Ginuu, ug sa tanang sala kami panalipdi.
Ay! Ginuu, kanamu maluuy ka, kaluy-i kami.
Maamua unta ang kaluuy mu, Ginuu,
kay misalig man kami kanimu.
Ay! Ginuu, kanimu ku gipahiluna ang akung paglaum:
Ayaw gayud aku pakyasa intawun.
Pag-ampu
Mag-ampu kita.
Ay! Dyus, nga nakakita sa matinud-anung pagpaabut sa imung katawhan
sa kasaulugan sa Pagkatawu sa Ginuu,
himua kaming angayan, nag-ampu kami,
nga makadangat sa mga kalipay sa ingun kadaku nga kaluwasan
ug saulugun sila kanunay
uban sa tinuuray nga pagsimba ug kasadya.
Pinaagi sa amung Ginuung Jesucristo, imung Anak,
nga buhi ug naghari uban kanimu,
diha sa panaghiusa sa Ispiritu Santu,
Dyus, hangtud sa kahangturan.
Amin.
Pagdayig
Daygun ta ang Ginuu.
Salamat sa Dyus.
Kining hubad Sinugbuanun ni Elmer Montejo pinasubay sa The Divine Office: The Liturgy of the Hours
(© 1974, 2023 International Commission on English in the Liturgy Corporation, all rights reserved).
Ang hubad sa Oratio (Katapusang Pag-ampu) pinasubay sa The Roman Missal (third typical edition, © 2010,
International Commission on English in the Liturgy Corporation, all rights reserved) ug ang hubad sa “Te Deum”
pinasubay sa kinabag-uhan ug aprubadung hubad Ininglis niini niadtong tuig 2020. Ang mga Salmu, unud sa Unang Pagbasa,
ug pipila ka mubu nga mga tudling sa Ikaduhang Pagbasa dili iya sa taghubad apan kinutlu sa Maayong Balita Biblia (Adunay Deuterocanon),
© 1999 Philippine Bible Society, ug gihulad, sama sa ubang bahin, sa gipasayung panitik (simplified spelling).
Kinaulahiang pag-usab: Disimbri 12, 2024.
Unang paghubad: Nubimbri 4, 2024.
If you like my work and want to say thanks — buy me a coffee! If you find my work useful and want to encourage me to keep going — buy me a coffee!
Any amount that you happily and willingly share supports my work and inspires a Cebuano writer and language advocate like me to work even harder.
If you’re in the Philippines, buy me a coffee via the following channels (scan the QR coode with your GCash, GoTyme, or banking app):
Or, if you're elsewhere, click/tap the button below and buy me a coffee using your credit card, Apple Pay, or Google Pay:
Please let me thank you, too, for giving to my coffee fund! After sending your support, contact me right away so that I can inscribe your name on Manuy Em’s Great Wall of Gratitude.