Iniru 6 sa naandan, kun dili, sa Duminggu taliwala sa Iniru 2 ug 8

Ang Epipaniya sa Ginuu (Sulimnidad)

Bangun, Jerusalem!
Sidlak kay miabut na ang imung kahayag,
ug ang himaya sa Ginuu nagdan-ag na kanimu.
Tabunan sa kangitngit ang kalibutan,
ug ang katawhan tikyupan sa kangiub.
Apan ang Ginuu musidlak kanimu,
ug makita diha kanimu ang iyang himaya.
Ang kanasuran muduul sa imung kahayag,
ug ang mga hari muduul sa lamdag sa imung kahayag.

Tan-awa ang imung palibut;
makita mu nga nagtigum na sila ug muduul kanimu;
gikan sa layung dapit mangabut ang imung mga anak nga lalaki,
ug kugusun ang imung mga anak nga babayi.
Malipay ka gayud inigkakita mu niini;
tungud sa kahinam mupaspas pagpitik ang imung kasingkasing,
kay ang bahandi sa kanasuran mahianha man kanimu;
muabut kini kanimu latas sa kadagatan.

Malukup ka sa daghang kamilyu gikan sa Midia ug sa Epa;
ang tanan nga gikan sa Sheba magdalag bulawan ug insinsu
ug mag-awit silag mga pagdayig alang sa Ginuu.
Dad-un nganha kanimu ang tanang kahayupan sa Kedar,
ug ang mga laking karniru sa Nebaiot;
kini mauy imung mga halad nga akung kahimut-an
ug himuun kung mahimayaun ang akung Timplu.

Unsa ba kining naglupad nga daw panganud,
ug daw mga salampati nga paingun sa ilang mga puy-anan?
Ang mga barku gikan sa kapuluan naghulat kanaku,
ug mag-una kanila ang mga barku sa Tarsis
arun kuhaun ang imung mga anak gikan sa layung dapit,
dala ang ilang bulawan ug plata
arun pagpasidungug sa Ginuu nga imung Dyus,
ang Balaang Dyus sa Israel,
kay gipasidunggan ka man niya.

Miingun ang Dyus,
“Ayuhun sa mga langyaw ang imung mga kuta
ug alagaran ka sa ilang mga hari;
kay bisag gikastigu ku ikaw tungud sa akung kasuku,
karun gikaluy-an ku na ikaw.
Kanunayng bukas ang imung mga ganghaan;
dili sila sirhan adlaw ug gabii,
arun panad-un nganha kanimu ang bahandi sa kanasuran,
ug manulud ang ilang mga hari kinuyugan sa ilang mga alagad.
Mangalaglag ang nasud ug gingharian nga dili mualagad kanimu;
ang maung nasud magun-ub gayud sa hingpit.

“Muanha kanimu ang garbu ug dungug sa Lebanon—
ang sipri, ang platanu ug ang maribuhuk
arun idayandayan sa akung Timplu;
himuun kung matahum ang akung tumbanan.
Ang mga anak niadtung nagdaugdaug kanimu
muanha kanimu nga magyukbu;
muyukbu sa imung tiilan kadtung tanang nagbugalbugal kanimu;
tawgun ka nila nga Syudad sa Ginuu, ang Sion sa Balaang Dyus sa Israel.

“Bisag gibiyaan ka ug gikasilagan ug gilikayan,
himuun ku ikawng halangdun hangtud sa kahangturan
ug kalipay sa tanang kaliwatan.
Ang kanasuran ug mga hari muatiman kanimu
sama sa usa ka inahan nga nagpasusu sa iyang anak.
Unya masayud ka nga aku, ang Ginuu, ang nagluwas kanimu.
Ang gamhanang Dyus sa Israel nagluwas kanimu.

“Dad-an ku ikawg bulawan inay brunsi,
plata inay puthaw, brunsi inay kahuy, puthaw inay batu.
Himuun kung malinawun ang inyung gingharian
ug manduan kamu sa hustisya.
Wala nay pinatyanay diha kaninyu,
ug wala nay kadaut diha sa inyung yuta;
nganlan ninyug Kaluwasan ang inyung mga kuta,
ug ang inyung mga ganghaan nganlan ninyug Pagdayig.

“Ang adlaw dili na mauy inyung kahayag
sa panahun sa adlaw.
Dili na musubang pa ang bulan
arun paglamdag kaninyu sa gabii,
kay ang Ginuu mau na man
ang inyung kahayag nga walay pagkapalung,
ug ang Dyus mau nay inyung himaya.
Dili na musalup ang inyung adlaw ingun man ang inyung bulan
kay ang Ginuu mau na man ang inyung kahayag hangtud sa hangtud,
ug matapus na unya ang inyung pagbangutan.
Pulus na unya matarung ang inyung katawhan;
sila na ang manag-iya sa nasud hangtud sa kahangturan;
sila nga mauy saha sa akung tinanum,
ang akung mga binuhat mismu arun aku kapasidunggan.
Musanay ang labing diyutay kanila
ug mahimung gamhanang nasud.
Inig-abut sa hustung panahun daliun ku kini pagbuhat.
Aku mau ang Ginuu!”

Ang mahigugmaung pag-alima sa Dyus ang hinungdan nga sa katapusang mga adlaw pagatabangan niya ang kalibutan nga naghagurus paingun sa kaparutan.  Mibaud siya nga angay maluwas ang tanang kanasuran pinaagi ni Cristo.

Gisaaran ang katigulangan nga si Abraham mahitungud niining mga nasura.  Gihatagan siya ug di-maihap nga kaliwat dili gikan sa iyang kaugalingung lawas apan gikan sa binhi sa pagtuu.  Busa, ang iyang mga kaliwat gipakasama sa kabituunan.  Ang amahan sa kanasuran gipalaum dili sa kalibutanung kaliwat apan sa kaliwat nga gikan sa kahitas-an.

Patipuna ang tanang nasud karun sa banay sa mga patriyarka.  Ang mga anak sa saad padawata na sa panalangin sa binhi ni Abraham, ang panalangin nga gisalikway sa mga anak sa iyang unud.  Pinaagi sa mga Magu, payukbua ang tanang tawu sa Magbubuhat sa kalibutan; ipaila ang Dyus, dili sa Judea lamang, apan sa tibuuk kalibutan, arun mabantug ang ngalan niya sa tibuuk Israel.

Mga pinangga kung higala, karun nga  natudluan na kita mahitungud niining pagpadayag sa grasya sa Dyus, saulugun ta uban sa kalagnung kalipay ang adlaw sa atung unang pag-ani, sa unang pagtawag sa mga Hintil.  Pasalamatan ta ang maluluy-ung Dyus — nga sumala pa sa Apustul — naghimu kanatung takus nga muambit sa mga panulundun sa mga balaan dinha sa kahayag, nga nagpalingkawas kanatu gikan sa gahum sa kangitngit, ug nagdala kanatu ngadtu sa gingharian sa iyang pinalanggang Anak.  Sumala sa tagna ni Isaias: ang mga Hintil nga nagpuyu sa kangitngit nakakita ug dakung kahayag, ug kanila nga nagpuyu sa landung sa kamatayun midan-ag ang kahayag.  Namulung siya bahin kanila ngadtu sa Ginuu: Ang mga Hintil nga wala makaila kanimu musangpit kanimu, ug ang katawhan nga wa makaila kanimu mudangup kanimu.

Kini ang adlaw nga nakita ug gikalipay ni Abraham, sa dihang nasayud siya nga ang iyang mga anak sa pagtuu pagbulahanun pinaagi sa iyang liwát nga si Cristo.  Kay mituu man siya nga mahimu siyang amahan sa kanasuran, nagsud-ung siya sa umaabut nga panahun ug nagdayig sa Dyus kay hingpit ang iyang pagsalig nga makatuman ang Dyus sa iyang gisaad.

Kini ang adlaw nga gitagna ni David sa mga salmu sa iyang pag-ingun: Ang tanang kanasuran nga imung gibuhat muduul ug muyukbu kanimu, Ginuu, ug daygun nila ang imung ngalan.  Ug, gipaila sa Ginuu ang iyang pagpangluwas; sa atubangan sa mga kanasuran gipadayag niya ang iyang katarungan.

Sayud kita nga natuman kini sukad niadtung gikamáy sa bituun ang tulu ka maalamung tawu gikan sa ilang halayu nga nasud ug gitultulan sila arun makasimba sa Hari sa langit ug yuta.  Ang kamasinugtanun sa bituun nagdapit kanatu sa pagsunud sa mapaubsanung panig-ingnan niini sa pagpangalagad, kutub sa atung mahimu, nianang grasya nga nagdapit sa tanang tawu nga mailhan si Cristo.

Mga pinalanggang higala, pagbatun kamu ug managsamang kadasig sa pagtinabangay arun nga sa gingharian sa Dyus, nga madangat natu pinaagi sa pagtuu ug mga maayung binuhatan, musidlak kamu isip mga anak sa kahayag: pinaagi sa atung Ginuung Jesucristo, nga buhi ug nagahari uban sa Dyus Amahan ug sa Ispiritu Santu hangtud sa kahangturan.  Amin.