Unang Duminggu sa Kwarisma

Unya si Moises ug si Aaron miadtu sa hari sa Ehipto ug miingun, “Kini ang gisulti ni Yahweh, ang Dyus sa Israel, ‘Tuguti ang akung katawhan sa pag-adtu sa kamingawan arun paghimug kasaulugan pahinungud kanaku.’ ”

Ang hari mitubag, “Kinsa man kana si Yahweh? Nganung paminawun ku man siya ug palaktun ku ang mga Israelita? Wala aku makaila kaniya ug dili ku gayud palaktun ang mga Israelita.”

Mitubag si Moises ug si Aaron, “Ang Dyus sa mga Hebreo nagpakita kanamu. Paadtua intawun kami sa kamingawan nga laktunug tulu ka adlaw arun maghalad kami ngadtu sa Ginuu nga amung Dyus. Kun dili namu kini buhatun, patyun kami niya pinaagi sa sakit u sa gubat.”

Ang hari mitubag, “Nganung gipahunung man ninyu ang mga tawu sa ilang trabahu? Balik kamu sa inyung mga trabahu! Ang inyung katawhan mas daghan pa kay sa mga Ehiptohanun ug buut ninyu silang paundangun sa ilang mga trabahu?”

Niadtu gihapung adlawa gisugu sa hari ang mga Ehiptohanun nga nagdumala sa mga ulipun ug ang mga kapatas nga mga Israelita: “Ayaw na ninyu hatagig dagami ang mga tawu nga magamit nila sa paghimug tisa. Sila mismu ang pakuhaa niana. Apan mau gihapung gidaghanun sa tisa ang ipahimu kanila ug ayaw kini kunhuri. Mga tapulan sila busa naghangyu nga tugutan ku sila pag-adtu sa kamingawan arun maghalad ngadtu sa ilang Dyus. Dugangi pa hinuun ang ilang trabahu arun magkapuliki sila sa ilang mga buluhatun ug dili na mamati sa mga bakak nga mga sulti.”

Busa ang nagdumala sa mga ulipun ug ang mga kapatas migula ug miingun sa mga Israelita, “Nagsugu ang hari nga dili na kamu hatagag dagami. Kamu na ang magkuha niini bisan asa apan mau gihapung gidaghanun sa tisa ang inyung himuun.” Busa nalukup pagsuruy sa mga Israelita ang tibuuk Ehipto arun pagkuhag dagami. Giapura sila sa mga nagdumala kanila sa paghimu ug mau gihapung gidaghanun sa tisa matag adlaw ingun sa ilang gihimu kaniadtu. Gipanglatus sa mga nagdumala sa mga ulipun ang mga kapatas nga Israelita ug gipangutana, “Nganung wala man kamu makahimu karung adlawa sa samang gidaghanun sa tisa nga inyung gibuhat kaniadtu?”

Unya miadtu sa hari ang mga kapatas nga Israelita arun pagpadayag sa ilang mulu, “Kamahalan, nganung gibuhat mu man kini kanamu? Wala nay dagami nga gihatag kanamu apan gipabuhat gihapun kamig tisa ug gilatigu pa gayud kami! Ang imung mga tawu ang sad-an.”

Mitubag ang hari, “Labihan kamu katapulan busa mihangyu kamu nga palaktun arun maghalad ngadtu sa Ginuu. Balik kamu sa inyung mga trabahu! Walay dagami nga ihatag kaninyu apan kinahanglan nga maghimu kamu sa samang gidaghanun nga tisa.”

Nakita sa mga kapatas nga Israelita nga nahimutang sila sa lisud nga kahimtang sa dihang gipahimu sila sa samang gidaghanun nga mga tisa matag adlaw. Sa pagbiya nila sa hari, gikasugat nila si Moises ug si Aaron nga naghulat kanila. Miingun ang mga kapatas nga Israelita, “Makita unta ni Yahweh ang inyung gibuhat ug silutan kamu niya kay tungud kaninyu ang hari ug ang iyang mga upisyal napungut pag-ayu kanamu. Daw gihatagan ninyu silag ispada arun ila kaming patyun.”

Unya midangup na usab si Moises sa Ginuu ug miingun, “Ginuu, nganung gipaantus mu man kining katawhan? Nganung gipadala mu man aku? Sukad gayud sa akung pagsulti sa imung ngalan ngadtu sa hari misamut hinuun ang iyang pagdaugdaug sa imung katawhan ug wala kay gikatabang kanila!”

Ang Ginuu miingun kang Moises, “Karun makita mu ang buhatun ku sa hari sa Ehipto. Pugsun ku siya sa pagpalakaw sa akung katawhan. Gani, mapugus gayud siya sa paghingilin kanila.”

Dungga, ay! Dyus, ang akung pangamuyu, paminawa ang akung pag-ampu. Kinsa man ang namulung niini? Mura’g usa ka tawu lang. Susiha kun usa lang ba ka tawu: Nagpakitabang aku kanimu gikan sa tanang mga utlanan sa kalibutan samtang nagsákit ang akung kasingkasing. Di man usa lang diay ka tawu; hinunua, usa siya sama nga si Cristo usa ra ug kita mga sakup niya. Kinsang nag-inusara nga tawu ang makapakitabang gikan sa tanang tumuy sa kalibutan? Ang maung tawu way lain kundili ang kabilin sa Anak. Giingnan siya kaniadtu: Pangayua kanaku, ug ihatag ku kanimu ang kanasuran isip kabilin, ug panag-iyahun mu ang tanang suuk sa kalibutan.

Kining gipanag-iya ni Cristo, kining kabilin ni Cristo, kining lawas ni Cristo, kining usa ka Simbahan ni Cristo, kining atung pagkahiusa mau ang nagpakitabang gikan sa tanang utlanan sa kalibutan. Unsay gitiyabaw niini? Sa giingun ku na: Dungga, ay! Dyus, ang akung pangamuyu, paminawa ang akung pag-ampu; nagpakitabang aku kanimu gikan sa tanang mga utlanan sa kalibutan. Buut ipasabot, kining akung tiyabaw paingun kanimu gihimu ku gikan sa tanang utlanan sa kalibutan; sa atu pa, sa tanang kilid.

Nganung nagpakitabang man aku? Samtang nagsákit ang akung kasingkasing. Ang nagsulti niini nagpaila nga anaa siya uban sa tanang nasud sa kalibutan nga nahimutang dili sa himaya apan sa hilabihang pagsulay.

Sa atung pagpanaw niining kalibutana, dili kita makaikyas sa pagsulay. Muuswag kita pinaagi sa pagsulay. Walay bisan kinsa nga makaila sa iyang kaugalingun gawas kun sulayan, ni makadawat ug kuruna gawas kun magmadaugun, ni maningkamut gawas kun batuk sa kaaway kundili ba kaha sa mga pagtintal.

Siya nga nagpakitabang gikan sa tanang utlanan sa kalibutan nagsákit apan wala siya biyai. Mibuut si Cristo nga magpakasumbanan alang kanatu nga iyang lawas, pinaagi sa iyang kaugalingung lawas diin siya namatay, nabanhaw, ug misaka sa langit, arun ang mga sakup sa iyang lawas makalaum sa pagsunud ngadtu sa asa nag-una ang ilang ulu.

Gihiusa kita niya sa iyang kaugalingaun sa dihang misugut siya nga sulayan ni Satanas. Nabati natu sa ibanghilyu giunsa pagsulay sa yawa ang atung Ginuung Jesucristo didto sa kamingawan. Di kaduhaduhaan nga gisulayan gayud sa yawa si Cristo. Dinha ni Cristo gitintal kamu, kay nadawat ni Cristo ang iyang lawas gikan sa inyung kinaiya, apan pinaagi sa iyang kaugalingung gahum mikab-ut siya ug kinabuhi alang kaninyu. Gisagubang niya ang pagtamay dinha sa inyung kinaiya, apan pinaagi sa iyang kaugalingung gahum midaug siyag himaya alang kaninyu. Busa, miantus siya sa pagsulay dinha sa inyung kinaiya, apan pinaagi sa iyang kaugalingung gahum midaug siya alang kaninyu.

Kun dinha ni Cristo gisulayan kita, dinha kaniya midaug sab kita sa dautan. Ang mga pagsulay ni Cristo lang ba ang inyung mahunahunaan apan taligam-an ang iyang kadaugan? Isipa ang imung kaugalingun nga gisulayan dinha kaniya, ug isipa sab ang imung kaugalingun nga madaugun dinha kaniya. Mahimu ra unta nga ipalayu niya sa iyang kaugalingun ang yawa, apan kun wala siya sulayi, di kamu niya matudluan unsaun pagdaug ang mga pagsulay.