Ikaduhang Duminggu sa Kwarisma

Sa dihang gipalakaw na sa hari sa Ehipto ang mga Israelita, wala sila dad-a sa Dyus agi sa dalan sa yuta sa mga Filistihanun bisan pag kini mau ang labing laktud. Miingun ang Dyus, “Dili ku gustu nga mausab ang hunahuna sa mga Israelita inigkakita nilag gubat kay tingalig mubalik sila sa Ehipto.” Busa gidala niya sila libut sa awaaw nga dapit paingun sa Dagat nga Pula. Armadu ang mga Israelita nga migikan sa Ehipto.

Gidala ni Moises ang mga bukug ni Jose sumala sa gipapanumpa ni Jose sa mga Israelita nga buhatun gayud nila kay si Jose miingun, “Mutabang gayud kaninyu ang Dyus; unya dad-a ninyu ang akung mga bukug.”

Mibiya sila sa Sucot ug nagkampu didtu sa Etam, sa daplin sa kamingawan. Sa adlaw, nag-una kanila ang Ginuu pinaagi sa panganud nga daw haligi arun paggiya kanila sa agianan. Sa gabii nag-una siya pinaagi sa kalayu arun paghatag kanila ug kahayag. Sa ingun makapanaw sila adlaw ug gabii. Ang panganud kanunayng diha sa ilang atubangan panahun sa adlaw ug ang kalayu panahun sa gabii.

Ang Ginuu miingun kang Moises, “Pabalika ang mga Israelita ug pakampuha sila atbang sa Pihahirot, tungatunga sa Migdol ug sa Dagat nga Pula duul sa Baalsepon. Ingna sila, ‘Kinahanglan nga magkampu kamu daplin sa dagat duul sa Baalsepon.’ Ang hari sa Ehipto maghunahuna nga ang mga Israelita nasalaag ug dili makagula sa dapit nga awaaw. Pagahiun ku ang kasingkasing sa hari ug gukdun niya sila ug sa ingun mapasidunggan aku sa akung kadaugan batuk sa hari ug sa iyang kasundaluhan. Unya mahibaluan sa mga Ehiptohanun nga aku ang Ginuu.” Ug gituman sa mga Israelita ang gisugu kanila.

Sa dihang ang hari sa Ehipto gisuginlan nga nanglakaw na ang mga Israelita, nausab ang hunahuna niya ug sa iyang mga upisyal bahin sa mga Israelita. Miingun sila, “Nganung gibuhian ta man ang mga Israelita? Wala na hinuun kitay mga ulipun!” Busa giandam sa hari ang iyang karwahing iggugubat ug ang iyang mga sundalu. Gidala niya ang 600 sa labing maayung karwahi ug ang uban pang mga karwahi nga gidumala sa mga upisyal. Gipagahi sa Ginuu ang kasingkasing sa hari ug gigukud niya ang mga Israelita nga maisugung namiya. Ang mga Ehiptohanung kasundaluhan uban sa ilang mga karwahi migukud kanila ug hiapsan nila ang mga Israelita sa ilang gikampuhan daplin sa Dagat nga Pula, duul sa Pihahirot ug sa Baalsepon.

Nagpadayag ang Ginuu sa iyang himaya atubangan sa mga piniling saksi. Sama ra sa lawas sa tanang katawhan ang iyang kaugalingung lawas, apan gipagilak niya kini sa hilabihang kasilak nga ang nawung niya nahisama sa adlaw nga mahimayaun ug ang iyang mga saput ingun kaputi sa nyibi.

Kining pagbag-u sa panagway (transpigurasyun) nahitabu arun papasun gikan sa dughan sa iyang mga sumusunud ang dautang dungug sa krus ug arun ang kaulaw sa iyang kinabubut-ung pag-antus mapugngan nga mutay-ug sa pagtuu sa mga nakasaksi sa nagpasulabing himaya nga dili dayag.

Gituyu sab niya nga muhatag ug lig-un nga sukaranan sa paglaum sa Santa Iglisya. Gilauman nga masabtan sa tibuuk lawas ni Cristo ang matang sa kabag-uhan nga madawat niini isip gasa gikan kaniya. Gilauman nga mga sakup nianang lawasa makapaabut nga makaambit sa himaya nga unang midilaab gikan ni Cristo nga ilang ulu.

Ang Ginuu gayud ang misulti niini sa dihang gitagna niya ang himaya sa iyang pag-abut: Unya ang mga matarung musidlak sama sa adlaw didtu sa gingharian sa ilang Amahan. Si San Pablo ang apustul misaksi sa maung kamatuurana sa dihang miingun siya: Giisip ku nga ang atung mga pag-antus niining panahuna dili gayud ikatandi sa himaya nga ipadayag unya kanatu. Ug sa laing dapit miingun siya: Kay namatay na kamu ug ang inyung kinabuhi natagu uban ni Cristo diha sa Dyus. Ang matuud ninyung kinabuhi mau si Cristo ug inigpakita niya, makita usab kamu uban kaniya ug muambit sa iyang himaya.

Kining kahibulungang pagkabag-u sa panagway naglakip ug laing pagtulun-an alang sa mga apustul arun lig-unun sila ug giyahan padulung sa hingpit nga kaalam. Si Moises ug Elias, ang balaud ug ang mga prupita, mipakita nga nakigsulti sa Ginuu. Gituyu kini arun tukma nga matuman, pinaagi niining lima ka mga lalaki, ang nahisulat: Atubangan sa duha kundili ba kaha tulu ka mga saksi ang matag pulung mamatud-an. Unsang pulunga ang labing lig-un pang napamatud-an ug lig-un ang sukaranan kun dili ang pulung nga gisangyaw sa karaan ug bag-ung mga kasabutan nga nanagbagay sa usa’g usa, ug sa mga gipangsulti sa karaang mga panagna ug gitudlu sa Ibanghilyu nga nagkahiuyunay sa usa’g usa?

Ang mga sinulat sa duha ka kasabutan nagsandiganay. Ang kasanag sa pagbag-u sa panagway tin-aw ug tataw nga nagpadayag kaniya nga gisaad pinaagi sa mga timailhan nga, tinabilan sa mistiryu, nagtagna kaniya. Sa ginaingun pa ni San Juan: Ang balaud gihatag sa Dyus pinaagi kang Moises apan ang grasya ug ang kamatuuran miabut pinaagi kang Jesucristo. Dinha kaniya ang saad nga gihatag ilawum sa landung sa panagna gipadayag uban sa tibuuk nga kahulugan sa mga kasuguan sa balaud. Siya ang nagtudlu sa kamatuuran sa panagna pinaagi sa iyang pagkaanaa ug nakapahimu nga matuman ang mga sugu pinaagi sa grasya.

Dinha sa pagsangyaw sa santus nga Ibanghilyu malig-un ang pagtuu sa tanan. Walay bisan usa nga angay maulaw sa krus ni Cristo nga nagtubus sa kalibutan.

Walay bisan kinsa nga angay mahadluk nga mag-antus alang sa kaangayan; walay bisan kinsa nga angay mawad-an ug paglaum sa ganti nga gisaad. Ang agianan paingun sa pagpahulay mau ang paghagu; ang agianan paingun sa kinabuhi mau ang kamatayun. Si Cristo gayud ang mipas-an sa tibuuk kahuyang sa atung talamayung tawhanung kinaiya. Busa, kun lig-un ang atung pagsalig ug pagmahal kaniya, maangkun natu ang kadaugan nga iyang naangkun ug madawat ang iyang mga gipangsaad.

Kabahin sa pagtuman sa mga sugu kun di ba kaha sa pagsagubang sa mga kalisdanan, ang mga pulung nga gilituk sa Amahan mau’y angay maglanuglanug sa atung mga dalunggan: Kini ang akung Anak, ang pinalangga, nga akung gikahimut-an pag-ayu; pamatia siya.