Ikatulung Duminggu sa Kwarisma

“Ang maghalad ngadtu sa laing dyus gawas kanaku, ang Ginuu, kinahanglan patyun.

“Ayaw ninyu palabilabihi ni daugdauga ang usa ka langyaw kay kamu usab mga langyaw man kaniadtu didtu sa Ehipto. Ayaw ninyu daugdauga ang mga biyuda ni ang mga wala nay ginikanan. Kun daugdaugun ninyu sila, tabangan ku sila inigpakitabang nila kanaku ug masuku aku pag-ayu ug pamatyun ku kamu pinaagi sa ispada. Mabiyuda ang inyung mga asawa ug mawad-an ug amahan ang inyung mga anak.

“Kun magpahulam kamug salapi sa akung katawhan nga mga kabus, ayaw kamu pagpangayug tubu sama sa gihimu sa tigpatantu. Kun kuhaun ninyu ang kupu sa usa ka tawu ingun nga garantiya nga mubayad siya kaninyu, kinahanglan nga iuli ninyu kini kaniya sa dili pa musalup ang adlaw kay mau ra kini ang iyang magamit arun mainitan siya inigkatulug niya. Tabangan ku siya inigpakitabang niya kanaku kay aku maluluy-un man.

“Ayaw kamu pagsultig dautan batuk sa Dyus ug ayaw ninyu tungluha ang usa ka pangulu sa inyung katawhan.

“Ayaw ninyu ihikaw kanaku ang paghalad sa inyung ani ug sa binu ug lana.

“Ihatag kanaku ang inyung kamagulangang anak nga lalaki. Ihatag usab kanaku ang panganay sa inyung baka ug karniru. Magpabilin usa kini uban sa inahan sulud sa pitu ka adlaw ug sa ikawalu ihalad ninyu kini kanaku.

“Kinahanglan nga ihalad ninyu kanaku ang inyung kinabuhi. Busa ayaw kamu pagkaun sa karni sa bisan unsang mananap nga gipatay sa ihalas nga mananap. Ipakaun kini sa mga iru.

“Ayaw kamu pagsulti ug tinumutumu nga tahu. Ayaw pakig-abin sa tawung sad-an pinaagi sa pagsaksig bakak. Ayaw kamu pagpahiuyun sa kadaghanan sa pagbuhat ug dautan ug ayaw pagsaksi sukwahi sa hustisya arun lamang sa pagpahimuut sa kadaghanan. Ayaw kamu pagpakitag dili makatarunganung pagdapig sa kabus kun husayun siya.

“Kun makit-an ninyu ang nakabuhi nga baka kundili ba kaha asnu sa inyung kaaway, dad-a kini balik kaniya. Kun ang asnu sa nagdumut kanimu natumba tungud sa kabug-at sa karga niini, ayaw siyag pasagdi. Tabangi hinuun siya sa pagpatindug niini.

“Ayaw hikawi ug hustisya ang mga kabus diha sa hukmanan. Likayi ang pagpamasangil. Ayaw patya ang tawu nga dili sad-an kay silutan ku ang tawu nga maghimu niining dautang buhat. Ayaw kamu pagdawat ug suburnu kay ang suburnu makabuta sa mga tawu nga anaa sa katungdanan ug makatuis sa katarungan niadtung dili sad-an.

“Ayaw palabilabihi ang usa ka langyaw. Nasayud kamu sa batiun sa usa ka langyaw tungud kay kamu mga langyaw man usab didtu sa Ehipto.

Usa ka babayi ang miduul. Nagsimbulu siya sa Simbahan nga padulung pa himuung matarung. Ang katarung misunud sa ilang kukabildu. Way alamag siya’ng miduul, nakaplagan niya si Cristo, ug nakigpulung siya kaniya. Lantawun natu unsa’y ilang gihisgutan ug tan-awun natu nganung usa ka Samaritana miduul arun magkalus ug tubig. Ang mga taga-Samaria dili sakup sa mga Judio: mga langyaw sila. Ang iyang pagkagikan sa katawhang langyaw may kalabutan sa kahulugan sa iyang pagkatimaan (simbulu), kay nagsimbulu siya sa Simbahan. Ang Simbahan gipaabut nga mahimugsu gikan sa mga Hintil, sa kaliwat nga dili Judio.

Busa, angay natu makita ang atung kaugalingun dinha mga pulung nianang bayhana ug sa iyang pagkatawu, ug uban niya pasalamatan ang Dyus. Simbulu siya, apan dili siya ang pagkatinuud (riyalidad); siya ang nag-unang timaan sa pagkatinuud, ug nahitabu ang riyalidad. Nakaplagan niya ang pagtuu dinha ni Cristo nga mihimu kaniyang timaan arun tudluan kita bahin sa umaabut. Nan, mipaduul siya arun magkalus ug tubig. Igu ra gayud siya miduul arun magkalus ug tubig sa naandang paagi.

Giingnan siya ni Jesus: Hatagi ku’g tubig nga mainum. Kay ang iyang mga tinun-an nangadtu man sa dakbayan arun mamalit ug pagkaun. Busa, miingun kaniya ang Samaritana: Unsa’ng hitabua man nga ikaw, bisan Judio, mangayu man kanaku ug tubig nga mainum bisan aku usa ka Samaritana? Kay ang mga Judio dili man makigsandurut sa mga Samaritano.

Mga langyaw ang mga Samaritanu; dili gayud mugamit sa mga Samaritanung himan ang mga Judio. Ang babayi nagdala ug timba nga pangkalus ug tubig. Natingala siya nga usa ka Judio ang nangayu kaniya ug tubig nga mainum — usa ka butang nga di mapaabut buhatun sa mga Judio. Apan ang nangayu kaniya ug tubig nga mainum giuhaw sa iyang pagtuu.

Busa paminawa karun ug sayri kinsa ang nangayu ug mainum. Mitubag si Jesus kaniya: Kun nasayud ka pa unta sa gasa sa Dyus ug kun kinsa kining nangayu kanimu’g tubig, mangayu ka gayud unta kaniya ug hatagan ka niya’g tubig nga naghatag sa kinabuhi.

Nangayu siya’g mainum, ug misaad ug mainum. Nanginahanglan siya, sama’g tawu nga naglaum makadawat, apan adunahan siya, sama’g tawu nga katagbawun sa kauhaw sa uban. Miingun siya: Kun nasayud ka pa unta sa gasa sa Dyus. Ang Ispiritu Santu ang gasa sa Dyus. Apan pinasumbingay ang mga pulung niya ngadtu sa babayi samtang inanay siyang midu’t sa iyang kasingkasing. Wa ba kaha siya magtudlu na kaniya? Unsa pay labing maaghup ug buutan gawas sa pagdasig nga gihatag niya? Kun nasayud ka pa unta sa gasa sa Dyus ug kun kinsa kining nangayu kanimu’g tubig, mangayu ka gayud unta kaniya ug hatagan ka niya’g tubig nga naghatag sa kinabuhi.

Unsa kining tubiga nga iyang gihisgutan kundili ang tubig nga giingun sa Kasulatan: Anaa kanimu ang tuburan sa kinabuhi? Unsaun pagbati ug kauhaw sila nga muinum gikan sa kabuhung sa imung balay?

Nagsaad siya sa Ispiritu Santu nga maghatag ug makatagbaw’ng kabuhung. Wala pa makasabut ang babayi. Napakyas siya sa pagtugkad sa kahulugan, ug unsa’y iyang tubag? Miingun ang babayi, Magtutudlu, hatagi aku niining ilimnuna arun dili na aku uhawun ni muanhi pa arun magkalus ug tubig. Panginahanglan ang nagtukmud niya sa paghimu niining buluhatuna, apan ang iyang kahuyang nagpugung kaniya. Kun nakadungug lang unta siya sa mga pulung: Dumuul kamu, tanan nga nagbudlay ug gibug-atan sa inyung gipas-an ug papahulayun ku kamu. Misulti kaniya niini si Jesus arun matapus na ang iyang kabudlay, apan dili pa siya andam makasabut.