Iniru 1

Adlaw sa Uktaba sa Pasku (Sulimnidad ni Maria, ang Balaan nga Inahan sa Dyus)

Tulumanun sa mga Pagbasa
(Office of Readings)

Pagpangdapit

Sinugdanan

Ginuu, ✠ buksan mu ang akung mga ngabil.

Ug ang akung baba magamantala sa imung pagdayig.

 

Saulugun ta ang pagkainahan sa Birhin Maria; simbahun ta ang iyang Anak, si Cristo ang Ginuu.

Salmu 95

Pagdapit sa pagsimba sa Dyus
Pagdinasigay kamu matag adlaw samtang may gitawag pa nga “karung adlawa” (Hebreo 3:13).
Dali kamu, daygun ta ang Ginuu!
Mag-awit kita nga malipayun ngadtu sa Dyus nga atung tigpanalipud.
Muduul kita kaniya arun pagpasalamat
ug awitan ta siyag malipayung mga awit sa pagdayig!

Saulugun ta ang pagkainahan sa Birhin Maria; simbahun ta ang iyang Anak, si Cristo ang Ginuu.

Kay ang Ginuu gamhanang Dyus,
gamhanang hari nga labaw sa tanang dyus.
Nagmandu siya sa tibuuk kalibutan
gikan sa kinahiladman sa yuta ngadtu sa labing taas nga kabukiran.
Nagmandu siya sa dagat nga iyang gibuhat
ug sa yuta nga iyang giumul.

Saulugun ta ang pagkainahan sa Birhin Maria; simbahun ta ang iyang Anak, si Cristo ang Ginuu.

Dali kamu, mangyukbu kita ug musimba kaniya;
mangluhud kita atubangan sa Ginuu nga atung Magbubuhat!
Siya ang atung Dyus;
kita ang katawhan niya nga iyang giatiman, †
ang panun nga iyang giamuma.

Saulugun ta ang pagkainahan sa Birhin Maria; simbahun ta ang iyang Anak, si Cristo ang Ginuu.

Pamatia karun ang iyang gisulti, †
“Ayaw pagahia ang inyung ulu sama sa inyung katigulangan didtu sa Meriba
ingun man didtu sa kamingawan sa Masa.
Didtu gisulayan nila aku
bisag nakita nila ang akung gibuhat alang kanila.

Saulugun ta ang pagkainahan sa Birhin Maria; simbahun ta ang iyang Anak, si Cristo ang Ginuu.

Sulod sa 40 ka tuig wala aku malipay niadtung mga tawhana.
Miingun aku, ‘Pagkamasupilun nila! †
Nagdumili sila pagtuman sa akong mga sugu!’
Nasuku aku ug nanumpa,
‘Dili gayud kamu makasulud †
sa yuta nga akung papahulayan kaninyu.’ ”

Saulugun ta ang pagkainahan sa Birhin Maria; simbahun ta ang iyang Anak, si Cristo ang Ginuu.

Himaya sa Amahan, ug sa Anak,
ug sa Ispiritu Santu.
Maingun sa sinugdan, karun, ug sa gihapun,
ug sa mga katuigan nga walay katapusan. Amin.

Saulugun ta ang pagkainahan sa Birhin Maria; simbahun ta ang iyang Anak, si Cristo ang Ginuu.

Awit-Pagdayig (Imnu)

Ang imnu (awit-pagdayig) sa ubus usa ka litiral nga hubad sa “Radix Jesse Jam Flóruit,” ang gitakda nga imnu alang sa Tulumanun sa mga Pagbasa niining adlawa.

Ang tuud ni Jesse namulak ug ang sanga namunga; ang mabungahung Inahan nagkaanak apan nagpabiling Ulay.

Giantus niya ang pasungan, siya nga Magbubuhat sa kahayag; uban sa iyang Amahan gimugna niya ang kalangitan, apan gisul-uban siya ug lampin sa iyang Inahan.

Ang mihatag sa Balaud, ang napulu ka sugu, ngadtu sa kalibutan nagpakaubus nga mahimung tawu ug nagpahigut sa mga talikala sa maung Balaud.

Karun nahimugsu ang kahayag ug kaluwasan, mikaratil ang kangitngit ug nabuntug ang kamatayun. Dali, tumuu kamu, mga kanasuran: Gianak ni Maria ang Dyus.

Himaya kanimu, Jesus, nga natawu sa Birhin, uban sa Amahan ug mapinanggaung Ispiritu, hangtud sa kahangturan. Amin.

Pag-awit sa mga Salmu (Salmudiya)

 

Buksi ang mga karaang ganghaan. Musulud ang Hari sa himaya.

Salmu 24

Ang pagsulud sa Ginuu sa iyang timplu
Gibuksan ni Cristo ang langit alang kanatu pinaagi sa iyang pagkahimung tawu (San Ireneo).
Iya sa Ginuu ang tibuuk kalibutan †
ug ang tanan nga anaa niini,
ang yuta ug ang tanan nga nagpuyu niini.
Gipahiluna niya kini ibabaw sa katubigan
ug gipasukad ilalum sa kadagatan.
 
Kinsay makatungas sa bungtud sa Ginuu?
Kinsay makasulud sa iyang balaang Timplu?
Siya nga maayug binuhatan ug putlig hunahuna,
siya nga wala magsimbag dyusdyus ug dili manumpag bakak.
Panalanginan siya sa Ginuu;
ug ilhun siya nga dili sad-an sa Dyus nga iyang Manluluwas.
Ingun niini ang katawhan nga mudangup sa Dyus
ug musimba sa Dyus ni Jacob.
 
Ablihi ang mga ganghaan! †
Buksi ang karaang mga pultahan
kay musulud ang gamhanang hari!
Kinsa ba kining gamhanang hari? †
Ang Ginuu nga kusgan ug gamhanan!
Ang Ginuu nga madaugun sa panggubatan!
 
Ablihi ang mga ganghaan! †
Buksi ang karaang mga pultahan
kay musulud ang gamhanang hari!
Kinsa ba kining gamhanang hari?
Ang Ginuu nga Labing Gamhanan, †
siya ang madaugung hari!
Himaya sa Amahan, ug sa Anak,
ug sa Ispiritu Santu.
Maingun sa sinugdan, karun, ug sa gihapun,
ug sa mga katuigan nga walay katapusan. Amin.

Buksi ang mga karaang ganghaan. Musulud ang Hari sa himaya.

 

Ang Ginuu nga Labing Halangdun nagtukud ug dakbayan, ug ang tanang katawhan pagatawgun nga mga anak niini.

Salmu 87

Ang Jerusalem inahan natung tanan
Gawasnun nga babayi ang langitnung Jerusalem; siya atung inahan (Galacia 4:26).
Gitukud sa Dyus ang iyang syudad diha sa balaang bungtud.
Gihigugma sa Ginuu ang mga ganghaan sa Sion, †
labaw kay sa ubang dapit sa Israel.
Pamati, ay! syudad sa Dyus,
sa katingalahang mga butang nga gisulti bahin kanimu:
 
“Iniglista ku sa mga nasud nga nag-alagad kanaku,
ilakip ku ang Ehipto ug ang Babilonia;
muingun aku nga ang Filistia, ang Tiro ug ang Etiopia
sakup usab sa Jerusalem.”
 
Bahin sa Sion ikaingun unya †
nga ang tanang kanasuran naggikan niini,
ug himuun siyang malig-un sa Labing Halangdun.
Maghimu ang Ginuu ug talaan sa tanang katawhan,
ug ilakip silang tanan ingun nga lungsuranun sa Jerusalem.
Ang mga mag-aawit ug mananayaw nag-ingun,
“Sa Sion anaa ang tinubdan sa tanan natung panalangin.”
Himaya sa Amahan, ug sa Anak,
ug sa Ispiritu Santu.
Maingun sa sinugdan, karun, ug sa gihapun,
ug sa mga katuigan nga walay katapusan. Amin.

Ang Ginuu nga Labing Halangdun nagtukud ug dakbayan, ug ang tanang katawhan pagatawgun nga mga anak niini.

 

Sa wala pa musubang ang kabugasun u musugud ang panahun, ang Anak sa Amahan, ang Ginuu ug Manunubus nagpakaubus sa iyang kaugalingun nga matawu alang kanatu karung adlawa.

Salmu 99

Balaan ang Ginuu natung Dyus
Cristo, labaw ka sa mga Kirubin, sa pagsul-ub nimu sa amung ubus nga kinaiya gibag-u mu ang kalibutang masalaypun (San Atanasio).
Naghari ang Ginuu
ug nangurug ang mga katawhan!
Naglingkud siya sa iyang trunu ibabaw sa mga kirubin
ug natay-ug ang kalibutan.
Ang Ginuu gamhanan sa Sion;
naghari siya sa tanang kanasuran.
Ang tanan magdayig sa gamhanan ug halangdun niyang ngalan.
Balaan siya!
Gamhanang hari, gihigugma mu ang matarung;
gihatagan mu ang Israel ug kaangayan, hustisya ug katarung.
Dayga ang Ginuu nga atong Dyus; †
simbaha siya atubangan sa iyang trunu!
Balaan siya!
Si Moises ug si Aaron iyang mga pari †
ug si Samuel nag-ampu kaniya;
nagsangpit sila sa Ginuu ug gitubag niya sila.
Misulti siya kanila gikan sa daw haliging panganod;
gituman nila ang mga balaod ug mga kasugoan nga gihatag niya kanila.
Ginuu nga among Dyus, gitubag mu ang imung katawhan;
mapinasayluun ka kanila apan musilut usab sa ilang mga sala.
Dayga ang Ginuu nga atong Dyus †
ug simbaha siya didtu sa iyang balaang bukid!
Balaan ang Ginuu nga atong Dyus!
Himaya sa Amahan, ug sa Anak,
ug sa Ispiritu Santu.
Maingun sa sinugdan, karun, ug sa gihapun,
ug sa mga katuigan nga walay katapusan. Amin.

Sa wala pa musubang ang kabugasun u musugud ang panahun, ang Anak sa Amahan, ang Ginuu ug Manunubus nagpakaubus sa iyang kaugalingun nga matawu alang kanatu karung adlawa.

Tudling (Birsikulu)

Ang Dyus nahimung tawu, aliluya.

Mipuyu siya uban kanatu, aliluya.

Mga Pagbasa

Unang Pagbasa

Gikan sa sulat alang sa mga Hebreo

2:9-17

Nahisama si Cristo sa iyang mga igsuun sa tanang paagi

Ang nakita natu mau si Jesus nga sa makadiyut nahimung ubus sa mga anghil arun pinaagi sa grasya sa Dyus ihatag niya ang iyang kinabuhi alang sa tanan. Nakita natu siya karun nga gihimaya ug gipasidunggan tungud sa kamatayun nga iyang giantus. Ang Dyus mauy nagbuhat ug nagpalungtad sa tanang butang. Hustu gayud siya sa paghingpit kang Jesus pinaagi sa pag-antus arun makaambit sa iyang himaya ang daghang mga anak. Kay si Jesus mau ang nagdala kanila ngadtu sa kaluwasan.

Kay sila nga gibalaan ug ang nagbalaan kanila may usa lamang ka Amahan. Busa dili maulaw si Jesus sa pagtawag kanila nga iyang mga igsuun. Sumala sa iyang giingun,

“Ipaila ku ang imung ngalan ngadtu sa akung mga igsuun;
awitan ku ikaw ug mga alawitun atubangan sa katawhan nga nagsimba kanimu.”

Nag-ingun usab siya, “Musalig aku sa Dyus.” Ug miingun pa gayud siya, “Ania aku uban sa mga anak nga gihatag sa Dyus kanaku.”

Tungud kay ang mga anak mga tawu man nga adunay unud ug dugu, si Jesus usab nahimung sama kanila ug miambit sa ilang tawhanun nga kinaiya. Gihimu niya kini arun nga pinaagi sa iyang kamatayun, malaglag niya ang Yawa nga may gahum batuk sa kamatayun. Sa maung paagi giluwas niya ang tanan nga naulipun sa tibuuk nilang kinabuhi tungud sa ilang kahadluk sa kamatayun. Kay tin-aw nga dili ang mga anghil ang iyang gitabangan kundili ang mga kaliwat ni Abraham. Nagpasabut kini nga kinahanglan mahimu siyang sama sa iyang mga igsuun sa tanang paagi. Sa ingun, mahimu siyang matinumanun ug maluluy-un nga Pangulung Pari sa iyang pag-alagad sa Dyus arun mapasaylu ang mga sala sa katawhan.

Tudling-Tubag (Rispunsuryu)

Luc 1:28

Pagkabulahan mu, Birhin Maria, kay gisabák mu ang Ginuu, ang Magbubuhat sa kalibutan.

Inahan sa imung Magbubuhat, nagpabilin kang putli sa kahangturan.

Maghimaya ka, Maria, punu ka sa grasya, ang Ginuu anaa kanimu.

Inahan sa imung Magbubuhat, nagpabilin kang putli sa kahangturan.

Ikaduhang Pagbasa

Gikan sa usa ka sulat ni San Atanasio, ubispu

(Epist. ad Epictetum 5-9: PG 27, 1058. 1062-1066)

Naangkun sa Pulung ang atung kinaiya gikan ni Maria

Ang Apustul nagsulti kanatu: Ang Pulung mitabang sa mga kaliwat ni Abraham, ug busa kinahanglang mahisama siya sa iyang mga igsuun sa tanang paagi. Kinahanglan makahuput siya ug lawas nga sama sa atua. Nagpasabut kini nganung anaa si Maria: siya ang muhatag kaniya ug lawas nga mauy ihalad alang sa atung kapuslanan. Ang Kasulatan nagtala sa iyang pagpanganak ug nag-ingun: Giputus niya ang bata ug panaptun. Ang iyang mga susu nga nagpakaun kaniya gitawag nga bulahan. Naghalad ug sakripisyu kay ang bata mau ang iyang kinamagulangan. Maampingun ang mga pulung ni Gabriel sa iyang pagpahibalu sa pagkatawu sa bata. Wala siya muhisgut ug “unsay matawu sulud kanimu” arun dili masaypan ug sabut nga may lawas nga isulud sa taguangkan gikan sa gawas; hinunua, mihisgut siya kabahin sa “unsay matawu gikan kanimu” arun pinaagi sa pagtuu masayran natu nga ang iyang anak gikan kaniya.

Sa iyang pag-angkun sa atung tawhanung kinaiya ug paghalad niini isip sakripisyu, ang Pulung miguba niini nga tuman ug dayun gipulihan kini sa iyang kaugalingung kinaiya, mauy hinungdan nga ang Apustul nakaingun: Kining lawas nga madunut ug mamatay kinahanglan magsul-ub na ug lawas nga di madunut ug di mamatay.

Gibuhat kini dili isip usa ka salingkapaw nga pasundayag sama sa gihunahuna sa uban. Dili. Ang atung Manluluwas nahimung tawu gayud, ug tungud niini may kaluwasan ang tibuuk tawu. Ang atung kaluwasan dili tumutumu, ni kini alang sa lawas lamang. Ang kaluwasan sa tibuuk tawo — buut pasabut, sa lawas ug kalag — nalampus gayud sa Pulung.

Sa atu pa, ang natawu ni Maria tawhanun gayud ug kinaiya, sumala sa mga linamdagang Kasulatan, ug ang lawas sa Ginuu matuud gayud nga lawas: Matuud kadtu nga lawas kay susama man kadtu sa atung lawas. Abi ninyu, si Maria atung igsuun, kay kitang tanan mga kaliwat ni Adan.

Ang giingun ni San Juan nga ang Pulung nahimung tawo susama ra ug kahulugan sa giingun ni San Pablo nga si Cristo nahimung tunglu alang kanatu. Nakaangkun ang lawas sa tawu ug dakung butang pinaagi sa kaambitan ug panaghiusa tali sa tawu ug sa Pulung. Nahimu kining way kamatayun; bisan pa ug buhi kini nga lawas, nahimu kini nga kalagnun; bisan pa ug ginama kini sa yuta, milusut kini sa mga ganghaan sa langit.

Bisan kun nakaangkun ang Pulung ug lawas gikan ni Maria, ang Trinidad magpabiling Trinidad sa walay pagdugang ni pagkunhud. Hingpit kini sa kahangturan. Sa Trinidad giila natu ang usa ka kinaiyang Dyusnun, ug busa usa ka Dyus, ang Amahan sa Pulung, ang gisangyaw sa Simbahan.

Tudling-Tubag (Rispunsuryu)

Ay! Putli ug balaang Birhin, unsang mga pulunga ang makadayig sa imung katahum?

Ang kinatas-an sa langit dili makapiug sa Dyus nga imung gidala sa imung sabakan.

Bulahan ka sa mga babaying tanan, ug bulahan sab ang bunga sa tiyan mu.

Ang kinatas-an sa langit dili makapiug sa Dyus nga imung gidala sa imung sabakan.

Ang Te Deum

Ay! Dyus, nagasimba kami kanimu;

ay! Ginuu, nagapasidungug kami kanimu.

Amahan nga walay katapusan,

nagyukbu kanimu ang tibuuk kalibutan.

Ang kaanghilan, ang kalangitan, ug ang Kagahuman sa langit,

ang mga Kirubin ug Sirapin, sa pagdayig kanimu way hunung nga nanagsinggit:

Balaan, Balaan, Balaang Ginuung Dyus sa kagahuman,

napunu sa kaharianun sa imung himaya ang yuta ug kalangitan.

 

Ang mahimayaung panun sa Apustulis nagaawit kanimu,

ang halangdung kahugpungan sa mga prupita nagadayig kanimu,

ang kasundaluhan sa mga martir nga nanagputi naghimaya kanimu,

ang Balaang Simbahan sa tanang bahin sa yuta nagapasidungug kanimu,

Amahan kansang kahalangdun walay kinutuban,

uban sa matuud ug bugtung mung Anak, nga takus pagahalaran,

ug ang Ispiritu Santu, Manlalaban.

 

Ay! ikaw, Cristo, ang Hari sa kahimayaan,

ikaw sa kahangturan ang Anak sa Amahan;

sa dihang gimbut-an mung tubsun ang katawhan,

wa mu gisalikway ang sa Birhin nga taguangkan;

sa iyang kalala ang kamatayun imung giilugan,

ug gibuksan ang Langitnung Gingharian

alang kanila nga ikaw ang gisaligan.

Sa tuu sa Dyus ang imung lingkuranan

uban sa himaya sa Amahan.

Nagatuu kami nga ikaw ang Hukum nga muanhi.

Ug busa nangaliyupu kami,

ang imung mga alagad tabangi,

nga sa labing mahal mung dugu gitubus.

Paubana sila sa imung mga santus

ngadtu sa himayang walay pagkatapus.

 

¶ Ang musunud nga mga tudling mahimung dili apilun:

 

Luwasa ang katawhan mu, Ginuu, ug ang imung kabilin panalangini.

Ibayaw sila sa kinabuhing dayun ug sila tultuli.

Nagdayig kami kanimu sa adlawng tanan,

ug nagsimba sa imung ngalan sa walay katapusang mga katuigan.

Magmapuangurun ka niining adlawa, Ginuu, ug sa tanang sala kami panalipdi.

Ay! Ginuu, kanamu maluuy ka, kaluy-i kami.

Maamua unta ang kaluuy mu, Ginuu,

kay misalig man kami kanimu.

Ay! Ginuu, kanimu ku gipahiluna ang akung paglaum:

Ayaw gayud aku pakyasa intawun.

Pag-ampu

Mag-ampu kita.

 

Ay! Dyus, nga pinaagi sa mabungahung kaputli ni Santa Maria

mituga sa tawhanung kaliwat

sa grasya sa kaluwasan sa kahangturan,

itugut, nangamuyu kami,

nga matagamtam namu ang pagpangama niya

nga nakapatakus namu

sa pagdawat sa tagmugna sa kinabuhi,

ang amung Ginuung Jesucristo, imung Anak.

Siya nga buhi ug naghari uban kanimu,

diha sa panaghiusa sa Ispiritu Santu,

Dyus, hangtud sa kahangturan.

Amin.

Pagdayig

Daygun ta ang Ginuu.

Salamat sa Dyus.

Deo gratias!

Kining hubad Sinugbuanun ni Elmer Montejo pinasubay sa The Divine Office: The Liturgy of the Hours (© 1974, 2023 International Commission on English in the Liturgy Corporation, all rights reserved). Ang hubad sa Oratio (Katapusang Pag-ampu) pinasubay sa The Roman Missal (third typical edition, © 2010, International Commission on English in the Liturgy Corporation, all rights reserved) ug ang hubad sa “Te Deum” pinasubay sa kinabag-uhan ug aprubadung hubad Ininglis niini niadtong tuig 2020. Ang mga Salmu, unud sa Unang Pagbasa, ug pipila ka mubu nga mga tudling sa Ikaduhang Pagbasa dili iya sa taghubad apan kinutlu sa Maayong Balita Biblia (Adunay Deuterocanon), © 1999 Philippine Bible Society, ug gihulad, sama sa ubang bahin, sa gipasayung panitik (simplified spelling).

Kinaulahiang pag-usab: Disimbri 30, 2024.
Unang paghubad: Disimbri 28, 2024.

Liturgy of the Hours Mga Hubad
Love my work? Find it useful?
Buy me a coffee!

If you like my work and want to say thanks — buy me a coffee! If you find my work useful and want to encourage me to keep going — buy me a coffee!

Any amount that you happily and willingly share supports my work and inspires a Cebuano writer and language advocate like me to work even harder.

If you’re in the Philippines, buy me a coffee via the following channels (scan the QR coode with your GCash, GoTyme, or banking app):

GCash:
GoTyme:

Or, if you're elsewhere, click/tap the button below and buy me a coffee using your credit card, Apple Pay, or Google Pay:

Buy Me A Coffee

Please let me thank you, too, for giving to my coffee fund! After sending your support, contact me right away so that I can inscribe your name on Manuy Em’s Great Wall of Gratitude.