Duminggu sulud sa Uktaba sa Pasku; kun wala, sa Disimbri 30

Ang Balaang Banay ni Jesus, Maria, ug Jose (Pista)

Tungud kang Cristo pagtinahuray kamu. Mga asawa, tahura ug sunda ninyu ang inyung bana sama nga nagtahud ug nagsunud kamu sa Ginuu. Kay ang bana mau ang ulu sa iyang asawa ingun nga si Cristo mauy ulu sa simbahan ug si Cristo mismu mau ang Manluluwas sa simbahan nga mau ang iyang lawas. Busa kinahanglan mutahud ug musunud ang mga asawa sa ilang bana ingun nga ang simbahan nagtahud ug nagsunud kang Cristo.

Mga bana, higugmaa ang inyung asawa ingun nga gihigugma ni Cristo ang simbahan ug gitugyan ang iyang kinabuhi alang niini. Gihimu niya kini arun sa paghalad sa simbahan ngadtu sa Dyus human niya kini hugasi sa tubig uban sa pulung. Sa ingun niini, ikatugyan niya ang simbahan alang kaniya mismu diha sa bug-us niyang kaanyag, putli ug walay ikasaway, walay buling u kunut u bisan unsang apan. Kinahanglan nga ang mga bana mahigugma sa ilang asawa ingun nga nahigugma sila sa ilang kaugalingung lawas. Ang bana nga nahigugma sa iyang asawa nahigugma sa iyang kaugalingun.

Walay tawu nga nasilag sa kaugalingun niyang lawas. Pakan-un hinuun niya kini ug panggaun sama sa gibuhat ni Cristo sa simbahan kay mga bahin man kita sa iyang lawas. Sumala sa giingun sa kasulatan,

“Tungud niini ang lalaki mubiya sa iyang amahan ug inahan ug mutipun sa iyang asawa ug silang duha mahimung usa.”

May dakung kahulugan kining bahina sa kasulatan ug sa akung hunahuna nagpasabut kini kang Cristo ug sa simbahan. Apan alang usab kini kaninyu: kinahanglan ang bana mahigugma sa iyang asawa sama sa iyang kaugalingun ug ang asawa usab kinahanglan magtahud sa iyang bana.

Mga anak, sanglit mga Kristuhanun man kamu, sunda ninyu ang inyung mga ginikanan kay mau kini ang hustu. Ang unang sugu nga dunay saad mau kini: “Tahura ang imung amahan ug inahan,” ug kini ang saad: “arun ka mabulahan ug mataas ang imung kinabuhi dinhi sa kalibutan.”

Mga ginikanan, ayaw pasuk-a ang inyung mga anak. Hinuun, amumaha sila sa Kristuhanung disiplina ug maayung pagtulun-an.

Ang Nazaret usa ka matang sa tunghaan diin una kitang makakat-un bahin sa kinabuhi ni Cristo ug gani makasabut sab sa iyang Ibanghilyu. Dinhi mahimu natung panid-an ug hinuklugan ang yanu nga paagi nga nailhan ang Anak sa Dyus, tulukibun ug tugub sa mga tinaguang kahulugan. Ug sa inanay makakat-un gani sab kita sa pagsundug kaniya.

Dinhi kita makaamgu kinsa gayud si Cristo. Ug dinhi sab natu makita ug masud-ung ang mga kahimtang nga naglibut ug nakatandug sa iyang kalibutanung kinabuhi: ang mga dapit, ang kahimtang niadtung mga adlawa, ang kultura, ang pinulungan, ang mga rilihiyusung gawi — laktud nga pagkaingun, ang tanan nga gigamit ni Jesus arun magpaila sa iyang kaugalingun ngadtu sa kalibutan. Dinhi ang tanan may gisulti kanatu ug may kahulugan. Dinhi makat-unan natu ang kamahinungdanun sa ispirituhanung kaligdung alang sa mga buut musunud ni Cristo ug musubay sa mga gitudlu sa Ibanghilyu.

Kaanindut unta nga mabata aku pag-usab ug muiskuyla sa yanu apan tulugkarung tunghaan nga gitawag ug Nazaret! Kaanindut unta nga mahaduul aku ni Maria arun kat-unun pag-usab ang matuud nga kahulugan sa kinabuhi ug ang mga kamatuurang Dyusnun. Apan kita mga magpapanaw lamang dinhi. Mulabay ang panahun, ug kinahanglan naku buhian ang panganduy nga magpabilin ug magpadayun sa pagtuun sa Ibanghilyu, kay ang maung pagkat-un wala gayuy kahumanan. Apan di aku mahimung mobiya nga di handumun, bisan sa makadiyut lang, ang pipila ka mga pagtulun-an gikan sa Nazaret.

Una, makakat-un kita sa iyang kahilum. Kun mahimu lang unta ipakabililhun natu kini pag-usab. Gikinahanglan natu kining maanindut nga kahimtang sa pangisip, labi na nga gisamuk kita sa kaalingugngug sa pagsinumpakiay ug mga makalibug nga kasayuran nga nagbanaw niining atung gubut nga panahun. Ang kahilum sa Nazaret nagtudlu kanatu sa pagpamalandung nga malinawun, sa paghinuklug sa mga tulugkarung ispiritwal, ug sa kaandam sa pagpamati sa tingug sa Dyusnung kinaadman ug sa tambag sa iyang mga matuud nga magtutudlu. Makatudlu kanatu ang Nazaret sa kamahinungdanun sa pagtuun ug pagpangandam, sa pagpamalandung, sa hapsay nga ispirituhanung kinabuhi, ug sa hilum nga pag-ampu nga Dyus lamang ang nasayud.

Ikaduha, makakat-un kita bahin sa kinabuhi sa banay. Himuun unta natung panig-ingnan ang Nazaret sa unsay angay sa atung banay. Makita unta natu sa Nazaret ang kabalaan ug kamalungtarun sa banay ug ang tumung niini sa dakung katilingban: usa ka gamayng katilingban sa gugma ug pag-inambitay, maanindut tungud sa mga suliran nga gipasuput niini ug ang mga ganti nga gidala niini; sa kinatibuk-an, usa kini ka tukma nga kahimutangan sa pagmatutu sa kabataan — ug walay makahulip niini.

Kinaulahian sa tanan, sa Nazaret nga pinuy-anan sa anak sa usa ka mamumuu makakat-un kita bahin sa pagpamuu ug ang mga saktung gawi nga gikinahanglan niini. Buut nakung ilhun ang bili niini — mapugsanun apan makatagbaw — ug hatagan kini sa angay nga pagtahud. Pahinumduman naku ang tanan nga ang pagpamuu adunay kaugalingung dungug. Apan dili kita mamuu arun lamang mamuu. Hinunua, ang bili ug kagawasnun sa pagpamuu wala nanukad sa giingung luna niini sa sistemang ikunumikanhun apan sa tumung niini.

Isip panapus, buut nakung ipahayag ang akung dakung pagtahud sa tanang tawu sa tanang dapit nga namuu arun mabuhi. Ngadtu kanila ipakita ku ang ilang dakung sulundan, si Cristi nga ilang igsuun, atung Ginuu ug Dyus, nga prupita nila sa tanang panlimbasug nga nagpauswag sa ilang kaayuhan.