Ikaduhang Duminggu sa Pagkabanhaw

Tulumanun sa mga Pagbasa
(Office of Readings)

Pagpangdapit

Sinugdanan

Ginuu, ✠ buksan mu ang akung mga ngabil.

Ug ang akung baba magamantala sa imung pagdayig.

Ang Ginuu nabanhaw, aliluya.

Salmu 95

Pagdapit sa pagsimba sa Dyus

Pagdinasigay kamu matag adlaw samtang may gitawag pa nga “karung adlawa” (Hebreo 3:13).

Dali kamu, daygun ta ang Ginuu!

Mag-awit kita nga malipayun ngadtu sa Dyus nga atung tigpanalipud.

Muduul kita kaniya arun pagpasalamat

ug awitan ta siyag malipayung mga awit sa pagdayig!

Ang Ginuu nabanhaw, aliluya.

Kay ang Ginuu gamhanang Dyus,

gamhanang hari nga labaw sa tanang dyus.

Nagmandu siya sa tibuuk kalibutan

gikan sa kinahiladman sa yuta ngadtu sa labing taas nga kabukiran.

Nagmandu siya sa dagat nga iyang gibuhat

ug sa yuta nga iyang giumul.

Ang Ginuu nabanhaw, aliluya.

Dali kamu, mangyukbu kita ug musimba kaniya;

mangluhud kita atubangan sa Ginuu nga atung Magbubuhat!

Siya ang atung Dyus;

kita ang katawhan niya nga iyang giatiman, †
ang panun nga iyang giamuma.

Ang Ginuu nabanhaw, aliluya.

Pamatia karun ang iyang gisulti, †
“Ayaw pagahia ang inyung ulu sama sa inyung katigulangan didtu sa Meriba

ingun man didtu sa kamingawan sa Masa.

Didtu gisulayan nila aku

bisag nakita nila ang akung gibuhat alang kanila.

Ang Ginuu nabanhaw, aliluya.

Sulod sa 40 ka tuig wala aku malipay niadtung mga tawhana.

Miingun aku, ‘Pagkamasupilun nila! †
Nagdumili sila pagtuman sa akong mga sugu!’

Nasuku aku ug nanumpa,

‘Dili gayud kamu makasulud †
sa yuta nga akung papahulayan kaninyu.’ ”

Ang Ginuu nabanhaw, aliluya.

Himaya sa Amahan, ug sa Anak,

ug sa Ispiritu Santu.

Maingun sa sinugdan, karun, ug sa gihapun,

ug sa mga katuigan nga walay katapusan. Amin.

Ang Ginuu nabanhaw, aliluya.

Awit-Pagdayig (Imnu)

Ang imnu (awit-pagdayig) sa ubus usa ka litiral nga hubad sa “Hic Est Dies Verus Dei,” ang gitakda nga imnu alang sa Tulumanun sa mga Pagbasa sa Ikaduhang Duminggu sa Pagkabanhaw.

Iyaha sa Dyus gayud kining matuud nga adlaw,
nga sa balaang kahayag nagasilaw,
kanus-a sa dugu’ng mahal gihugasan
ang makauulaw’ng kasal-anan sa kalibutan.

Niini nahibalik ang pagtuu sa mga nangasaag,
ang mga buta’ng mata nakaangkun ug kahayag;
kinsa’y sa kahadluk dili mahubsan
pagkakita nga gipasaylu ang kawatan?

Nangangha niining buhata bisan ang kaanghilan,
sa pagkakita nila sa lawas nga gisilutan —
ug nga, mikuput ni Cristo, ang tawu’ng sad-an
nakadangat ug kinabuhing bulahan.

Daku kaayu kini’ng katingalahan ug tulukibun:
nga, arun ang kamátay sa kalibutan mahugasan,
ang kalapasang tanan Iyang pagawagtangun,
ang mga sala sa unud sa unud sab pagahinluan.

Ang kahamili niini may makatupung pa ba:
nga ang pagkasad-an mangayu ug grasya,
ug nga sa gugma ang kahadluk lanayun,
ug nga kinabuhi ang mubugti sa kamatayun?

Magmatunhay’ng kasadya ka sa mga salabutan
ay! Jesus, kalipay sa Pasku sa Kabanhawan,
ug kami nga mga nabuhi pag-usab sa grasya
sa imung mga kadaugan paubana.

Maimu, Ginuung Jesus, ang kahimayaan,
ikaw nga misanag sa pagdaug mu sa kamatayun,
uban sa makabuhi nga Ispiritu ug sa Amahan,
sa kanunay hangtud sa mga katuigang dayun. Amin.

Pag-awit sa mga Salmu (Salmudiya)

Aku mau aku, ug ang mga dautang tawu dili musubay sa akung mga lakang, kay ang balaud sa Ginuu ang nakapahimuut kanaku, aliluya.

Salmu 1

May duha ka agianan ang tawu

Sila nga hugut nga nagasalig sa krus malipayun nga milusbug sa tubig sa kinabuhi (Gikan sa usa ka tagsulat sa ikaduhang siglo).

Bulahan ang dili mamati sa tambag sa mga dautan,

u musunud sa gibuhat sa mga makasasala, †
u makig-abin kanila nga wala muila sa Dyus.

Mauy iyang kalipay ang pagtuman sa Balaud sa Ginuu,

ug nagtuun siya niini adlaw ug gabii.

Sama siya sa kahuy nga nagtubu daplin sa usa ka sapa,

ug mamunga sa tingbunga †
ug ang dahun niini dili malaya.

Sa tanan niyang buhatun

siya magmalampusun.

Apan dili sama niini ang mga dautan.

Sila daw uhut nga mapadpad inighurus sa hangin.

Ang mga dautan silutan gayud sa Dyus

ug dili itipun sa mga matarung.

Bantayan sa Ginuu ang mga matarung,

apan kalaglagan ang dangatan sa mga makasasala.

Himaya sa Amahan, ug sa Anak,

ug sa Ispiritu Santu.

Maingun sa sinugdan, karun, ug sa gihapun,

ug sa mga katuigan nga walay katapusan. Amin.

Aku mau aku, ug ang mga dautang tawu dili musubay sa akung mga lakang, kay ang balaud sa Ginuu ang nakapahimuut kanaku, aliluya.

Gipangayu naku sa akung Amahan, ug iyang gihatag kanaku ang tanang kanasuran isip akung panulundun, aliluya.

Salmu 2

Ang Misiyas, hari ug mananaug

Ang kadagkuan sa kalibutan nagkunsabu sa pagpukan ni Jesus, ang Imung dinihugang Anak (Mga Buhat 4:27).

Nganung nagsabut man pag-alsa ang kanasuran?

Nganung naglaraw man silag mga butang nga walay kapuslanan?

Ang mga hari nila naghiusa ug ang ilang mga pangulu

nagkasabut pag-alsa batuk sa Ginuu ug sa hari nga iyang pinili.

Sila nag-ingun: “Putlun natu ang paghari nila kanatu

ug dili na kita magpagalung kanila.”

Ang Ginuu nga naglingkud sa iyang trunu didtu sa langit

nagkatawa lang ug nagbiaybiay kanila.

Unya sa iyang kapungut gipasidan-an niya sila

ug sa iyang kasuku gilisang niya sila.

Nag-ingun siya, “Sa Sion, ang bungtud kung balaan,

gipahimutang ku ang pinili kung hari.”

Nag-ingun ang hari, “Isangyaw ku ang giingun kanaku sa Ginuu.

Miingun siya kanaku, ‘Ikaw akung anak; †
ug karung adlawa imu na akung amahan.

Pangayu ug kanimu ihatag ku ang tanang kanasuran;

ug maimu ang tibuuk kalibutan.

Buk-un mu sila sa bunal nga puthaw

ug dugmukun sama sa usa ka kulun.’ ”

Pagmaalamun kamung mga hari

ug pagmatngun kamung mga namunuan.

Alagari ug kahadluki ang Ginuu;

pangurug kamu ug yukbui ninyu siya,

arun dili siya mapungut kaninyu ug pamatyun kamu

kay ang kasuku niya dali rang musilaub.

Bulahan ang mudangup kaniya

arun iyang panalipdan.

Himaya sa Amahan, ug sa Anak,

ug sa Ispiritu Santu.

Maingun sa sinugdan, karun, ug sa gihapun,

ug sa mga katuigan nga walay katapusan. Amin.

Gipangayu naku sa akung Amahan, ug iyang gihatag kanaku ang tanang kanasuran isip akung panulundun, aliluya.

Mihigda aku arun mupahulay ug nakatulug aku; nakamata aku pag-usab, kay ang Ginuu nag-alima kanaku, aliluya.

Salmu 3

Ang Ginuu ang akung tigpanalipud

Sa kamatayun natulug si Cristo, apan nabanhaw siya gikan sa mga minatay, kay gipalingkawas siya sa Dyus (San Ireneo).

Ay! Ginuu, daghan ang nakig-away kanaku,

daghan ang nakigbatuk kanaku.

Mahitungud kanaku miingun sila,

“Dili siya tabangan sa Dyus.”

Apan ikaw, Ginuu, ang taming ku kanunay sa mga katalagman;

gihatagan mu akug kadaugan †
ug gipahiuli mu kanaku ang kadasig.

Ay! Nagpakitabang aku, Ginuu,

ug gikan sa bungtud nimung balaan gitubag mu aku.

Muhigda aku ug matulug ug mumata nga malinawun

kay nagbantay man kanaku ang Ginuu.

Dili aku mahadluk sa linibu nga kaaway

nga naglibut kanaku.

Ay! Dali, Ginuu,

Ay! luwasa aku, akung Dyus!

Silutan mu ang tanan kung kaaway

ug kuhaag gahum ang tanang mga dautan.

Ay! Ikaw ang muluwas, Ginuu,

panalanginan mu unta ang imung katawhan.

Himaya sa Amahan, ug sa Anak,

ug sa Ispiritu Santu.

Maingun sa sinugdan, karun, ug sa gihapun,

ug sa mga katuigan nga walay katapusan. Amin.

Mihigda aku arun mupahulay ug nakatulug aku; nakamata aku pag-usab, kay ang Ginuu nag-alima kanaku, aliluya.

Tudling (Birsikulu)

Nagsadya ang mga tinun-an, aliluya.

Sa pagkakita nila sa nabanhaw’ng Ginuu, aliluya.

Mga Pagbasa

Unang Pagbasa

Gikan sa sulat sa apustul nga si Pablo ngadtu sa mga taga-Colosas

3:1-17

Ang inyung bag-ung kinabuhi dinha ni Cristo

Sanglit gibanhaw na man kamu uban ni Cristo, tinguhaa ang mga butang nga atua sa langit diin naglingkud si Cristo sa iyang trunu sa tuu sa Dyus. Hunahunaa ang mga butang langitnun, dili ang yutan-un. Kay namatay na kamu ug ang inyung kinabuhi natagu uban ni Cristo diha sa Dyus. Ang matuud ninyung kinabuhi mau si Cristo ug inigpakita niya, makita usab kamu uban kaniya ug muambit sa iyang himaya.

Busa patya ninyu ang mga kaibug nga kalibutanun nga anaa kaninyu, sama sa salawayung pagpakighilawas, kalaw-ayan, kaulag, dautang kailibgun ug kahakug nga mauy usa ka paagi sa pagsimbag dyusdyus. Kay muabut ang kapungut sa Dyus ngadtu sa mga tawu nga magbuhat niining mga butanga. Kaniadtu nagkinabuhi kamu sumala sa maung mga kailibgun, sa dihang naghari pa kini kaninyu.

Apan karun kinahanglan biyaan ninyu kining tanan: ang kasuku, ang pagkasaputun, ang kahugaw sa hunahuna, ang pagpasipalag sulti ug ang pagpamalikas. Ayaw kamu pamakak sa usag-usa kay gihubu na man ninyu ang inyung daang pagkatawu uban sa iyang mga buhat ug gisul-ub na ninyu ang bag-ung pagkatawu. Gibag-u gayud kini sa Dyus nga iyang magbubuhat sumala sa iyang kaugalingung dagway arun masayud kamu sa hingpit mahitungud sa Dyus. Tungud niini, wala nay Judio ug dili Judio, mga tinuli ug dili tinuli, mga lain ug sinultihan, mga luug, mga ulipun ug dili ulipun, kay si Cristo mau ang tanan ug anaa sa tanan!

Katawhan kamu sa Dyus; gibalaan ug gihigugma kamu niya. Busa kinahanglan nga mubati kamu sa uban, magmaluluy-un, magmapaubsanun, magmaaghup ug magmapailubun. Pagpinailubay kamu ug kun duna kamuy mulu batuk kang bisan kinsa kaninyu pagpinasayluay kamu sama nga gipasaylu kamu sa Ginuu. Ug labaw niining tanan idugang ang paghigugma nga mauy magbugkus sa tanan ngadtu sa hingpit nga panaghiusa. Paharia sa inyung kasingkasing ang pakigdait nga gikan ni Cristo kay alang niini gitawag kamu sa Dyus arun mahiusa kamu diha sa usa ka lawas. Ug pagmapasalamatun kamu. Papuy-a sa inyung kasingkasing ang bahandianung minsahi ni Cristo. Pagtinudluay ug pagpahimangnuay kamu uban sa tanang kaalam. Pag-awit kamug mga salmu ug balaang mga alawitun ug awiti ninyu ang Dyus uban sa pasalamat diha sa inyung mga kasingkasing. Busa bisag unsay inyung isulti kundili ba kaha buhatun, himua kini diha sa ngalan sa Ginuung Jesus uban sa pagpasalamat ngadtu sa Dyus nga Amahan pinaagi kaniya.

Tudling-Tubag (Rispunsuryu)

Col 3:1, 2, 3

Sanglit gibanhaw man kamu ni Cristo ngadtu sa kinabuhi, panganduya ninyu ang mga butang nga anaa sa langit diin si Cristo naglingkud sa tuu sa Dyus.

Pangitaa ninyu ang mga langitnung butang ug dili ang mga kalibutanung butang, aliluya.

Namatay na kamu ug ang inyung kinabuhi natagu uban ni Cristo diha sa Dyus.

Pangitaa ninyu ang mga langitnung butang ug dili ang mga kalibutanung butang, aliluya.

Ikaduhang Pagbasa

Gikan sa usa ka wali ni San Agustin, ubispu

(Sermo 8 in octava Paschae 1, 4: PL 46, 838. 841)

Usa ka bag-ung binuhat diha ni Cristo

Nakigsulti aku kaninyu nga bag-u lang nangatawu pag-usab dinha sa bunyag, mga gagmay’ng bata dinha ni Cristo, kamu nga mga bag-ung anak sa Simbahan, gasa sa Amahan, pagmatuud sa kamabungahun sa Inahang Simbahan. Kamung tanan nga matinud-anun sa Ginuu usa ka balaang lisu, usa ka bag-ung panun sa mga buyug, ang bulak gayud sa atung pagpangalagad ug bunga sa atung pagpaningkamut, ang akung kalipay ug ang akung kadungganan. Ang mga pulung sa Apustul mau ang akung ipamulung kaninyu: Isul-ub ninyu ang Ginuung Jesucristo ug ayaw patuyangi ang lawas ug ang mga kailibgun niini, arun kamu mabistihan sa kinabuhi niya nga gisul-ub ninyu pinaagi niining sakramintuha. Kamung tanan gisininaan ni Cristo pinaagi sa inyung bunyag dinha kaniya. Wala’y Judio ni Griyigu; wala’y ulipun ni gawasnung tawu; wala’y babayi ni lalaki; kamu’ng tanan usa ra dinha ni Cristo Jesus.

Ingun niini ang gahum niining sakramintuha: usa kini ka sakramintu sa bag-ung kinabuhi nga nagsugud dinhi ug karunkarun dayun uban sa pagpasaylu sa mga sala’ng nabuhat, ug kini hingpitun sa pagkabanhaw sa mga minatay. Gipanglubung kamu ngadtu sa kamatayun uban ni Cristo pinaagi sa pagbunyag arun, kay si Cristo nabanhaw na man gikan sa mga minatay, kamu sab makalakaw sa bag-ung kinabuhi.

Kamu karun nanaglakaw subay sa pagtuu, nanagpanaw luwan sa lawas nga mamatay ug nagpahilayu sa Ginuu, apan siya nga padulngan sa inyung mga tikang, siya gayud ang matuud ug kasaligang agianan ninyu: si Jesucristo, nga alang kanatu nahimung tawu. Alang sa tanan nga nagtahud kaniya may gitagana siya’ng naghingapin nga kalipay nga iyang ipadayag ngadtu sa mga milaum kaniya, ug hingpitun kini inig makab-ut na natu ang pagkatuman sa atung gilauman.

Kini ang uktaba (ikawalung adlaw) sumad sa inyung bag-ung pagkatawu. Niining adlawa natuman dinha kaninyu ang timaan sa pagtuu nga gilarawan ug una sa Karaang Kasabutan pinaagi sa pagtuli atul sa ikawalung adlaw sumad sa pagkatawu. Sa pagkabanhaw sa Ginuu gikan sa kamatayun, gisalibay niya ang pagkamay-kamatayun sa lawas; ang nabanhaw niyang lawas mau ra gihapung lawasa, apan wala na’y gahum niini ang kamatayun. Pinaagi sa iyang pagkabanhaw gibalaan niya ang Duminggu, nga gitawag sab nga adlaw sa Ginuu. Ikatulung adlaw kini sumad sa iyang pagpasakit, kining adlawa ang ikawalu sumad sa Sabadu, ug busa, mau sab ang unang adlaw sa simana.

Mau nga ang inyung paglaum sa pagkabanhaw, bisan kun wala pa kini mahitabu, tinu ug dili kaduhaduhaan, kay nakadawat na man kamu sa sakramintu kundili ang timaan niining katinuurana (riyalidad) ug gisaaran na sa Ispiritu. Busa, kun nabanhaw kamu uban ni Cristo, pangitaa ninyu ang mga butang nga anaa sa langit, diin si Cristo naglingkud sa tuu sa Dyus. Panganduya ninyu ang mga langitnung butang, dili ang mga kalibutanung butang. Kay namatay na kamu ug ang inyung kinabuhi natagu uban ni Cristo diha sa Dyus. Inigpakita ni Cristo nga inyung kinabuhi, makita usab kamu uban kaniya ug muambit sa iyang himaya.

Tudling-Tubag (Rispunsuryu)

Col 3:3-4; Rom 6:11

Namatay na kamu ug ang inyung kinabuhi natagu uban ni Cristo diha sa Dyus.

Inigpakita ni Cristo nga inyung kinabuhi, makita usab kamu uban kaniya ug muambit sa iyang himaya, aliluya.

Isipa ninyu ang inyung kaugalingun nga patay na sa pagpakasala apan buhi alang sa Dyus, hiniusa kang Cristo Jesus nga atung Ginuu.

Inigpakita ni Cristo nga inyung kinabuhi, makita usab kamu uban kaniya ug muambit sa iyang himaya, aliluya.

Pag-ampu

Mag-ampu kita.

Dyus sa wala’y kinutubang kaluuy,

nga sa pagsubli sa pangilin sa Kamatayun ug Pagkabanhaw

mipadilaab sa pagtuu sa katawhan nga imung giangkun,

padakua, nag-ampu kami, ang grasya nga gituga mu kanamu,

buhan makatukib ug makatugkad sa tanan

kun sa unsang tuburana sila gihugasan,

kang kinsa’ng Ispiritu sila nangatawu pag-usab,

kang kinsa’ng Dugu ang nagtubus kanila.

Pinaagi sa amung Ginuung Jesucristo, imung Anak,

nga buhi ug naghari uban kanimu,

diha sa panaghiusa sa Ispiritu Santu,

Dyus, hangtud sa kahangturan.

Amin.

Pagdayig

Daygun ta ang Ginuu.

Salamat sa Dyus.

Kining hubad Sinugbuanun ni Elmer Montejo pinasubay sa The Divine Office: The Liturgy of the Hours (© 1974, 2023 International Commission on English in the Liturgy Corporation, all rights reserved). Ang hubad sa Oratio (Katapusang Pag-ampu) pinasubay sa The Roman Missal (third typical edition, © 2010, International Commission on English in the Liturgy Corporation, all rights reserved) ug ang hubad sa “Te Deum” pinasubay sa kinabag-uhan ug aprubadung hubad Ininglis niini niadtong tuig 2020. Ang mga Salmu, unud sa Unang Pagbasa, ug pipila ka mubu nga mga tudling sa Ikaduhang Pagbasa dili iya sa taghubad apan kinutlu sa Maayong Balita Biblia (Adunay Deuterocanon), © 1999 Philippine Bible Society, ug gihulad, sama sa ubang bahin, sa gipasayung panitik (simplified spelling).

Kinaulahiang pag-usab: Abril 26, 2025.
Unang paghubad: Abril 22, 2025.

Liturgy of the Hours Mga Hubad