Ikatulung Duminggu sa Pagkabanhaw

Unya nakita ku nga gitangtang sa Nating Karniru ang usa sa pitu ka silyu ug nadungug ku ang tingug nga daw dalugdug gikan sa usa sa upat ka buhing binuhat nga nag-ingun, “Dali ngari!” Unya nakita ku ang usa ka puting kabayu. Ang nagkabayu niini nagkuput ug pana ug gihatagan siyag kuruna. Mibiya siya ug nagmadaugun ug nagmadaugun pa gayud.

Unya gitangtang sa Nating Karniru ang ikaduhang silyu ug nadungug ku ang ikaduhang buhing binuhat nga miingun, “Dali ngari!” Unya migula ang kabayung pula. Ang nagkabayu niini gihatagan ug gahum pagkuha sa kalinaw sa kalibutan arun magpinatyanay ang mga tawu. Ug gihatagan siyag usa ka dakung ispada.

Unya gitangtang sa Nating Karniru ang ikatulung silyu ug nadungug ku ang ikatulung buhing binuhat nga miingun, “Dali ngari!” Ug nakita ku ang itum nga kabayu ug ang nagkabayu niini nagbitbit ug timbangan. Nadungug ku ang daw usa ka tingug nga gikan sa taliwala sa upat ka buhing binuhat nga nag-ingun, “Usa ka litrung trigu kundili tulu ka litrung sibada ang mapalit sa suhul sa usa ka adlaw nga pagtrabahu. Apan ayaw hilabti ang lana sa ulibu ug ang binu!”

Unya gitangtang sa Nating Karniru ang ikaupat nga silyu ug nadungug ku ang ikaupat nga buhing binuhat nga miingun, “Dali ngari!” Ug nakita ku ang kabayu nga luspad. Ang nagkabayu niini ginganlag Kamatayun ug gisunud siya sa Hades. Gihatagan silag awturidad sa pagpamatay sa ikaupat nga bahin sa mga tawu sa kalibutan pinaagi sa ispada, sa gutum, sa sakit ug sa mga ihalas nga mananap.

Unya gitangtang sa Nating Karniru ang ikalimang silyu ug nakita ku ilalum sa halaran ang mga kalag niadtung gipamatay tungud sa ilang pagsangyaw sa pulung sa Dyus ug sa ilang pagkamatinumanun sa pagsaksi. Misinggit sila, “Ginuu nga Labing Gamhanan, balaan ug matuud! Dugay pa ba nimung hukman ug silutan ang katawhan sa kalibutan tungud sa ilang pagpatay kanamu?” Unya ang matag usa kanila gihatagan ug puting bisti ug gipapahulay usa sila sulud sa mubung panahun, hangtud mahustu na ang gidaghanun sa ilang isigkasuluguun ug isigkamagtutuu nga pamatyun usab sama kanila.

Nakita ku nga gitangtang sa Nating Karniru ang ikaunum nga silyu. Unya milinug ug kusug kaayu ug naitum ang adlaw sama sa itum nga panaptun ug ang bulan napula sama sa dugu. Nangahulug ang mga bituun sama sa dili pa hinug nga mga igus nga gihurus sa kusug nga hangin. Nahanaw ang langit ingun sa gilukut nga basahun ug nangatay-ug ang kapuluan ug kabukiran gikan sa ilang nahimutangan. Ug nanagu didtu sa mga langub ug sa mga pangpang sa kabukiran ang mga hari sa yuta, ang mga pangulu ug mga kadagkuan sa mga kasundaluhan, ang mga datu ug mga gamhanan ug ang tanang tawu, ulipun ug dili ulipun. Nagpanawag sila sa mga bukid ug sa mga batu, “Tumpagi ug salipdi kami gikan sa panagway sa naglingkud sa trunu ug gikan sa kapungut sa Nating Karniru! Kay miabut na ang dakung adlaw sa ilang kapungut ug kinsay makasagubang niini?”

Wala’y tugutan nga makigsalu kanatu sa yukaristiya gawas kun siya nagatuu sab nga tinuud ang atung gipangtudlu, gawas kun nahugasan na siya sa makabag-u nga mga tubig sa bunyag alang sa kapasayluan sa iyang mga sala, ug gawas kun magpuyu siya sumala sa mga lagda nga gihatag ni Cristo nganhi kanatu.

Wala kita mukaun sa yukaristikanhung pan ug muinum sa yukaristikanhung binu nga daw yanu’ng mga pagkaun lamang kini, kay gitudluan man kita nga si Jesucristo nga atung Manluluwas nahimu ma’ng lawas ug dugu pinaagi sa gahum sa Pulung sa Dyus, sa ingun sab nga ang pagkaun nga nagpalagsik sa atung lawas ug dugu nahimu nga lawas ug dugu ni Jesus nga nahimung tawu pinaagi sa gahum sa iyang kaugalingung mga pulung nga anaa sa pag-ampu sa pasalamat.

Sa ilang mga paghinumdum nga gitawag ug mga ibanghilyu, ang mga apustul, mitunul nganhi kanatu sa mga gipangsugu ni Jesus nga ilang buhatun. Nagsaysay sila nga mikuha siya ug pan, mipasalamat, ug miingun: Buhata kini arun paghandum kanaku. Kini ang akung lawas. Sa samang paagi mikuha siya sa kupa, mipasalamat siya, ug miingun: Kini ang akung dugu. Naghatag ang Ginuu niini’ng sugua ngadtu kanila lamang. Sukad niadtu kanunay na kita’ng nagpahinumdum sa usa’g usa mahitungud niining mga butanga. Ang mga adunahan natu nagtabang sa mga kabus, ug kanunay kita’ng nagkahiusa. Alang sa atu’ng tanang nangadawat gidayig natu ang Magbubuhat sa ngatanan pinaagi sa iyang Anak nga Jesucristo ug sa Ispiritu Santu.

Inigka-Duminggu managtigum ang tanan natu’ng mga sakup bisan asa man sila nagpuyu — sa sulud ba sa dakbayan kundili ba kaha sa mga kasikbit nga mga dapit. Ang mga paghandum sa mga apustul, di ba kaha ang mga sinulat sa mga prupita, basahun kun may igu nga panahun. Kun natapus na ang pagbasa, ang nangulu sa panagtigum mamulung nganhi kanatu; iya’ng awhagun ang tanan sa pagsunud sa panig-ingnan sa mga hiyas nga amung nabati sa mga pagbasa. Unya, magdungan ug panindug ang tanan ug mag-ampu.

Sa pagtapus sa atung pag-ampu, dad-un sa atubangan ang pan, binu, ug tubig. Ang pangulu sa kasaulugan maghalad ug mga pag-ampu ug magpasalamat kutub sa iyang mahimu, ug ang katawhan mupahayag sa ilang pag-uyun pinaagi sa pag-ingun ug “Amin.” Iapud-apud ang yukaristiya, mukalawat ang tanan nga mitambung, ug ang mga diyakunu muhatud niini ngadtu sa mga wala makatambung.

Ang mga adunahan, kun buut nila, mahimu’ng muhatag ug amut, ug sila ra ang magbuut kun pila ang ilang iamut. Tipigan sa pangulu ang natigum nga mga amut arun gamitun kini sa pagtabang sa mga ilu ug mga balu ug sa tanan nga nanaglisud tungud sa bisan unsa’ng hinungdan, tungud ba kaha sa sakit, pagkabilanggu, kundili ba kaha sa pagkahilayu sa banay. Laktud nga pagkasulti, siya ang mag-amping sa tanan nga nanginahanglan.

Kining katilingbanung panagtigum himuun natu sa adlaw’ng Duminggu kay kini ang unang adlaw sa simana, ang adlaw kanus-a gipalagput sa Dyus ang kangitngit ug kagubut ug gihimu ang kalibutan, ug tungud kay nianang maung adlawa nabanhaw gikan sa mga minatay si Jesucristo nga atung manunubus. Gilansang siya sa krus usa niana ka Birnis, ug sa pagka-Duminggu human niana mipakita siya sa iyang mga apustul ug mga tinun-an ug gitudluan niya sila sa mga butang nga amung gitunul nganha kaninyu arun inyung palandungun.