Ikaupat nga Duminggu sa Pagkabanhaw

Unya nagpakita ang usa ka dakung tilimad-un didtu sa langit: usa ka babayi nga nagbistig adlaw ug nagtunub sa bulan ug gikurunahan siyag 12 ka bituun. Hapit na siya manganak ug nagtiyabaw siya sa kasakit.

Unya may laing tilimad-un nga nakita didtu sa langit. May dakung dragun nga pula; ug may pitu kini ka ulu, napulu ka sungay ug may kuruna ang matag ulu niini. Gikahig niya pinaagi sa iyang ikug ang ikatulung bahin sa mga bituun sa langit ug gitambug ngadtu sa yuta. Mibarug siya sa atubangan sa babaying hapit na manganak arun tukbun niya ang bata nga mahimugsu. Unya gianak sa babayi ang usa ka batang lalaki nga maghari sa kanasuran sa paagi nga higpit kaayu. Apan gisakmit ang bata ug gidala ngadtu sa Dyus ug sa iyang trunu. Mikagiw ang babayi ngadtu sa kamingawan diin ang Dyus nag-andam kaniya ug dapit. Ug didtu atimanun siya sulud sa 1,260 ka adlaw.

Unya may gubat didtu sa langit. Si Miguel ug ang kauban niyang mga anghil nakigsangka sa dragun ug sa mga anghil niini. Apan nabuntug ang dragun ug ang mga anghil niini ug gipanghinginlan sila gikan sa langit. Gitambug ang dakung dragun, ang karaang bitin nga ginganlag Yawa kundili Satanas nga mauy naglimbung sa tibuuk kalibutan. Gitambug siya uban sa tanang mga anghil niya ngadtu sa yuta.

Unya nadungug ku ang kusug nga tingug gikan sa langit nga nag-ingun, “Ania na gayud ang kaluwasan gikan sa Dyus! Gipadayag na gayud sa Dyus ang iyang gahum ingun nga Hari ug gipakita na sa Misiyas ang iyang awturidad! Kay ang tigsumbung nga nagbarug sa atubangan sa Dyus ug nagsumbung sa atung kaigsuunan adlaw ug gabii gihinginlan na gikan sa langit. Gibuntug sa atung mga kaigsuunan ang Yawa pinaagi sa dugu sa Nating Karniru ug sa kamatuuran nga gisangyaw nila. Wala nila ihikaw ang ilang kinabuhi bisan sa kamatayun. Busa paglipay kamu, kalangitan ug kamung tanan nga nagpuyu diha! Apan alaut ang yuta ug ang dagat! Kay mikunsad kaninyu ang Yawa nga suku kaayu kay nasayud man siya nga mubu na lang ang iyang panahun!”

Sa pagkamatngun na sa dragun nga gitambug na siya ngadtu sa yuta, gigukud niya ang babayi nga nanganak ug batang lalaki. Apan ang babayi gihatagag paku sa dakung agila arun makalupad siya ngadtu sa iyang dapit sa kamingawan diin atimanun siya sulud sa tulu ka tuig ug tunga ug makalikay siya sa kapintas sa dragun. Unya mibugwak ang dragun ug tubig nga daw suba arun ibanlas ang babayi sa bul-ug niini. Apan ang yuta mitabang sa babayi. Giabli ang baba niini ug gisuyup ang tubig nga gibuga sa dragun. Napungut pag-ayu ang dragun ug nakig-away siya sa tanang kaliwat sa babayi ug sa tanan nga nagtuman sa mga sugu sa Dyus ug nagmatinumanun sa kamatuuran nga gipadayag ni Jesus. Ug ang dragun nagtindug sa baybayun.

Aku ang maayung magbalantay. Nakaila aku sa akung mga karniru —buut pasabut, gihigugma ku sila — ug nakaila sila kanaku. Sa yanu’ng pagkasulti: sila nga nahigugma kanaku andam musunud kanaku, kay si bisan kinsa nga wala magmahal sa kamatuuran wala pa masayud niini.

Mga pinangga ku’ng igsuun, nakadungug man kamu mahitungud sa pagsulay nga agian namu’ng mga magbalantay. Hunahunaa sab nga kining mga pulung sa atung Ginuu nagpasabut sab ug pagsulay alang kaninyu. Pangutan-a ang inyung kaugalingun kun nahisakup ba kamu niining iyang panun, kun nakaila ba kamu kaniya, kun ang kahayag sa iyang kamatuuran nagdan-ag ba sa inyung mga salabutan. Pasaligan ku kamu nga makaila kamu kaniya dili pinaagi sa pagtuu apan pinaagi sa gugma, dili pinaagi sa hugut nga pagtuu lamang apan pinaagi sa buhat. Si Juan nga ibanghilista ang kasaligang tinubdan niining akung gisulti. Nag-ingun siya kanatu nga si bisan kinsa nga mangangkun nga nakaila siya sa Dyus apan wala magtuman sa iyang mga sugu usa ka tawu’ng bakakun.

Tungud niana, ang Ginuu midugang dayun: Kay nakaila kanaku ang Amahan ug nakaila aku sa Amahan, ug ihalad ku ang akung kinabuhi alang sa akung mga karniru. Tin-aw nga gipasabut niya nga ang iyang paghalad sa iyang kinabuhi alang sa iyang mga karniru nagpamatuud nga nakaila siya sa Amahan ug ang Amahan nakaila niya. Sa atu pa, pinaagi sa gugma nga mau’y hinungdan nga pakamatyan niya ang iyang mga karniru gipakita niya nga gihigugma niya pag-ayu ang iyang Amahan.

Miingun sab siya: Nakadungug ang akung mga karniru sa akung tingug, ug nakaila aku kanila; nagsunud sila kanaku, ug gihatagan ku sila’g kinabuhing wala’y katapusan. Sa wala pa siya musulti niini, nag-ingun na siya: Si bisan kinsa nga musulud sa akung turil maluwas; gawasnun siya’ng makasulud-gawas ug makakita’g lunhaw’ng sibsibanan. Musulud siya sa kinabuhi sa pagtuu; human siya mutuu, makakita siya sa iyang gituuhan, unya sud-ungun ug pamalandungan niya ang iyang nakita, ug musibsib siya sa lunhaw’ng sibsibanan sa kinabuhi’ng dyaun.

Busa, ang mga karniru sa Ginuu muabut sa ilang sibsibanan diin ang tanang malumu nga nanagsunud kaniya manibsib sa lunhaw’ng sibsibanan nga wala’y katapusan. Kining mga sibsibanan mau ang mga kalagnung kalipay sa langit. Didtu ang mga pinili magsud-ung nga wa’y babag sa nawung sa Dyus ug magkumbira sa kinabuhi’ng tunhay.

Mga pinangga ku’ng igsuun, mangadtu kita niining mga sibsibanana diin managhudyaka kita uban sa atung mga katagilungsud. Madasig unta kita inighunahuna natu sa ilang kamalipayun! Pukawun ta ang atung mga kasingkasing, padilaabun ang atung pagtuu, ug panganduyun kadtung mga nag-atang kanatu sa langit. Busa, ang atung paghigugma usa na ka pagpadulung didtu. Dili natu tugutan ang bisan unsa’ng ikahibalang natu’ng mga babag nga mupasimang kanatu gikan sa kalipay nianang langitnung kasaulugan. Ang pagkalibaungun sa dalan dili makababag kaniya nga buut gayud makaadtu didtu. Dili sab natu tugutan ang kamadanihun sa kalampusan nga galgalun kita, kay kun mau, mahisama kita sa usa ka buangbuang nga pumapanaw nga nalinga sa mga maanindut nga mga laguna nga iyang agian ug mau’y hinungdun nga malimut siya sa iyang padulngan.