Ikaunum nga Duminggu sa Pagkabanhaw

Tulumanun sa mga Pagbasa
(Office of Readings)

Pagpangdapit

Sinugdanan

Ginuu, ✠ buksan mu ang akung mga ngabil.

Ug ang akung baba magamantala sa imung pagdayig.

Ang Ginuu nabanhaw, aliluya.

Salmu 95

Pagdapit sa pagsimba sa Dyus

Pagdinasigay kamu matag adlaw samtang may gitawag pa nga “karung adlawa” (Hebreo 3:13).

Dali kamu, daygun ta ang Ginuu!

Mag-awit kita nga malipayun ngadtu sa Dyus nga atung tigpanalipud.

Muduul kita kaniya arun pagpasalamat

ug awitan ta siyag malipayung mga awit sa pagdayig!

Ang Ginuu nabanhaw, aliluya.

Kay ang Ginuu gamhanang Dyus,

gamhanang hari nga labaw sa tanang dyus.

Nagmandu siya sa tibuuk kalibutan

gikan sa kinahiladman sa yuta ngadtu sa labing taas nga kabukiran.

Nagmandu siya sa dagat nga iyang gibuhat

ug sa yuta nga iyang giumul.

Ang Ginuu nabanhaw, aliluya.

Dali kamu, mangyukbu kita ug musimba kaniya;

mangluhud kita atubangan sa Ginuu nga atung Magbubuhat!

Siya ang atung Dyus;

kita ang katawhan niya nga iyang giatiman, †
ang panun nga iyang giamuma.

Ang Ginuu nabanhaw, aliluya.

Pamatia karun ang iyang gisulti, †
“Ayaw pagahia ang inyung ulu sama sa inyung katigulangan didtu sa Meriba

ingun man didtu sa kamingawan sa Masa.

Didtu gisulayan nila aku

bisag nakita nila ang akung gibuhat alang kanila.

Ang Ginuu nabanhaw, aliluya.

Sulod sa 40 ka tuig wala aku malipay niadtung mga tawhana.

Miingun aku, ‘Pagkamasupilun nila! †
Nagdumili sila pagtuman sa akong mga sugu!’

Nasuku aku ug nanumpa,

‘Dili gayud kamu makasulud †
sa yuta nga akung papahulayan kaninyu.’ ”

Ang Ginuu nabanhaw, aliluya.

Himaya sa Amahan, ug sa Anak,

ug sa Ispiritu Santu.

Maingun sa sinugdan, karun, ug sa gihapun,

ug sa mga katuigan nga walay katapusan. Amin.

Ang Ginuu nabanhaw, aliluya.

Awit-Pagdayig (Imnu)

Ang imnu (awit-pagdayig) sa ubus usa ka litiral nga hubad sa “Hic Est Dies Verus Dei,” ang gitakda nga imnu alang sa Tulumanun sa mga Pagbasa sa Ikaunum nga Duminggu sa Pagkabanhaw.

Iyaha sa Dyus gayud kining matuud nga adlaw,
nga sa balaang kahayag nagasilaw,
kanus-a sa dugu’ng mahal gihugasan
ang makauulaw’ng kasal-anan sa kalibutan.

Niini nahibalik ang pagtuu sa mga nangasaag,
ang mga buta’ng mata nakaangkun ug kahayag;
kinsa’y sa kahadluk dili mahubsan
pagkakita nga gipasaylu ang kawatan?

Nangangha niining buhata bisan ang kaanghilan,
sa pagkakita nila sa lawas nga gisilutan —
ug nga, mikuput ni Cristo, ang tawu’ng sad-an
nakadangat ug kinabuhing bulahan.

Daku kaayu kini’ng katingalahan ug tulukibun:
nga, arun ang kamátay sa kalibutan mahugasan,
ang kalapasang tanan Iyang pagawagtangun,
ang mga sala sa unud sa unud sab pagahinluan.

Ang kahamili niini may makatupung pa ba:
nga ang pagkasad-an mangayu ug grasya,
ug nga sa gugma ang kahadluk lanayun,
ug nga kinabuhi ang mubugti sa kamatayun?

Magmatunhay’ng kasadya ka sa mga salabutan
ay! Jesus, kalipay sa Pasku sa Kabanhawan,
ug kami nga mga nabuhi pag-usab sa grasya
sa imung mga kadaugan paubana.

Maimu, Ginuung Jesus, ang kahimayaan,
ikaw nga misanag sa pagdaug mu sa kamatayun,
uban sa makabuhi nga Ispiritu ug sa Amahan,
sa kanunay hangtud sa mga katuigang dayun. Amin.

Pag-awit sa mga Salmu (Salmudiya)

Aliluya, giligid ang batu nga nagbabag sa ganghaan sa lubnganan, aliluya.

Salmu 104 (I)

Awit-pagdayig alang sa Dyus nga Magbubuhat

Ang nahiusa ni Cristo nahimung bag-ung binuhat. Ang tanang daan wala na, karon ang tanan gibag-u na (2 Corinto 5:17).

Dayga ang Ginuu, ay! akung kalag!

Ay! Ginuu nga akung Dyus, pagkagamhanan mu gayud!

Nagsul-ub ka sa kahalangdun ug himaya

ug nagbisti sa kahayag.

Gibukhad mu ang kalangitan sama sa tulda

ug gibuhat mu ang imung puluy-anan diha sa ibabaw sa katubigan.

Ang mga panganud mau ang imung karwahi

ug nagsakay ka sa mga paku sa hangin.

Ang hangin mau ang imung minsahiru

ug ang mga kilat mau ang imung suluguun.

Gipahiluna mu pag-ayu ang kalibutan diha sa iyang sukaranan

ug dili gayud kini matarug.

Gitabun mu niini ang kadagatan sama sa panaptun

ug natabunan sa tubig ang kabukiran.

Apan sa dihang gibadlung mu ang katubigan, nanibug sila;

pagkabati nila sa imung tingug nanagan sila.

Milatas sila sa kabukiran lugsung ngadtu sa kawalugan,

sa dapit nga giandam mu kanila.

Nagbutang kag utlanan nga dili nila malapas

arun dili nila kalunupan pag-usab ang kalibutan.

Gipadagayday mu ang mga tubud diha sa kawalugan

ug gipabuhagay ang mga tubig taliwala sa kabungturan.

Nagtagbaw kini sa kauhaw sa mga ihalas nga mananap;

ang mga ihalas nga asnu manginum niini.

Sa kakahuyan duul niini,

nagsalag ug nag-awit ang kalanggaman.

Himaya sa Amahan, ug sa Anak,

ug sa Ispiritu Santu.

Maingun sa sinugdan, karun, ug sa gihapun,

ug sa mga katuigan nga walay katapusan. Amin.

Aliluya, giligid ang batu nga nagbabag sa ganghaan sa lubnganan, aliluya.

Aliluya, babayi, kinsa ang imung gipangita? Nganu’ng nangita ka sa mga buhi dinha sa mga patay? Aliluya.

Salmu 104 (II)

Awit-pagdayig alang sa Dyus nga Magbubuhat

Gikan sa imung puluy-anan sa langit, gipaulanan mu ang kabukiran,

ug ang yuta napunu sa imung mga panalangin.

Gipatubu mu ang mga balili arun sibsibun sa kahayupan,

ug ang mga tanum nga magamit sa tawu

arun makapatubu siya niini ug makakuhag pagkaun.

Makahimu siyag binu arun malipay siya

ug makakuhag lana sa ulibu arun magmaya siya

ug makahimug pan nga makapalig-un kaniya.

Nakadawat ug madagayaung ulan ang mga sidru sa Lebanon

nga gitanum sa Ginuu.

Nagsalag didtu ang kalanggaman;

ang mga langgam nga tabun nagsalag diha sa mga kahuy.

Ang mga ihalas nga kanding nagpuyu sa habug nga kabukiran

ug ang mga kunihu nanagu sa mga lungib sa kapangpangan.

Gibuhat mu ang bulan arun mahimung ilhanan sa panahun,

ug ang adlaw nasayud kanus-a siya musalup.

Gibuhat mu ang kangitngit nga mau ang gabii,

ang panahun sa pagpanggula sa mga ihalas nga mananap.

Mungulub ang mga batan-ung liyun,

samtang mangita sa pagkaun nga gihatag sa Dyus kanila.

Inigsidlak sa adlaw mamauli sila

ug mamahulay sa ilang mga lungib.

Ang mga tawu manggula

arun pagtrabahu hangtud sa gabii.

Himaya sa Amahan, ug sa Anak,

ug sa Ispiritu Santu.

Maingun sa sinugdan, karun, ug sa gihapun,

ug sa mga katuigan nga walay katapusan. Amin.

Aliluya, babayi, kinsa ang imung gipangita? Nganu’ng nangita ka sa mga buhi dinha sa mga patay? Aliluya.

Aliluya, ayaw paghilak, Maria; nabanhaw na ang Ginuu gikan sa mga minatay, aliluya.

Salmu 104 (III)

Awit-pagdayig alang sa Dyus nga Magbubuhat

Ay! Ginuu, pagkadaghan sa mga butang nga imung gibuhat! †
Diha sa kaalam gibuhat mu silang tanan!

Napunu ang yuta sa imung mga binuhat.

Anaa ang kadagatan, daku ug lapad kaayu,

diin nagpuyu ang dili maihap nga mga binuhat, gagmay ug dagku.

Mulawig niini ang mga barku,

ug nagduladula diha niini ang Lebiatan, †
ang dakung mananap nga imung gibuhat.

Silang tanan nagsalig kanimu

sa pagkaun nga ilang gikinahanglan sa matag karun ug unya.

Gihatagan mu silag pagkaun

ug nangatagbaw sila.

Malisang sila kun mubiya ka kanila; †
kun kuhaan mu silag ginhawa, mangamatay sila

ug mubalik sa abug nga mauy ilang gigikanan.

Sa paghatag mu kanilag gininhawa,nahimu silang buhi;

ikaw ang naghatag ug bag-ung kinabuhi sa kalibutan.

Mutunhay unta hangtud sa kahangturan ang himaya sa Ginuu!

Malipay unta siya sa iyang nabuhat!

Inigtan-aw niya sa kalibutan, mukurug kini;

inighikap niya sa kabukiran, mubugwak kini ug asu.

Awitan ku ang Ginuu sa tibuuk kung kinabuhi;

awitan kug mga pagdayig ang akung Dyus samtang buhi pa aku.

Malipay unta siya sa akung pamalandung

kay ang akung kalipay naggikan man kaniya.

Malaglag unta ang mga makasasala gikan sa yuta;

mahanaw unta ang mga dautan!

Dayga ang Ginuu, ay! akung kalag!

Dayga siya!

Himaya sa Amahan, ug sa Anak,

ug sa Ispiritu Santu.

Maingun sa sinugdan, karun, ug sa gihapun,

ug sa mga katuigan nga walay katapusan. Amin.

Aliluya, ayaw paghilak, Maria; nabanhaw na ang Ginuu gikan sa mga minatay, aliluya.

Tudling (Birsikulu)

Nagsadya ang tibuuk ku’ng lawas, aliluya.

Sa tibuuk ku’ng kusug dayigun ku ang akung Dyus, aliluya.

Mga Pagbasa

Unang Pagbasa

Gikan sa sinugdanan sa unang sulat sa apustul nga si Juan

1:1-10

Ang pulung sa kinabuhi ug ang kahayag sa Dyus

Nagsulat kami kaninyu mahitungud sa Pulung nga naghatag sa kinabuhi. Ang Pulung diha nang daan sa pagbuhat sa kalibutan. Nadungug namu kini, nakita ug nahikap gayud. Gipadayag na ang maung kinabuhi ug nakita namu kini. Busa nagmatuud kami niini ug gisangyaw namu kaninyu ang kinabuhing walay katapusan nga diha uban sa Amahan ug gipadayag kanatu. Gisugilun usab namu kaninyu ang amung nakita ug nadungug arun uban kanamu, mahiusa kamu sa Amahan ug sa iyang Anak nga si Jesucristo. Gisulat namu kini arun mahingpit gayud ang atung kalipay.

Mau kini ang minsahi nga amung nadungug gikan sa iyang Anak ug gisangyaw namu kaninyu nga ang Dyus kahayag ug diha kaniya wala gayuy kangitngit. Kun muingun kita nga nahiusa na kita sa Dyus apan nagpuyu diay gihapun diha sa kangitngit, namakak kita ug wala magkinabuhi sumala sa kamatuuran. Apan kun magpuyu kita sa kahayag, ingun nga ang Dyus anaa sa kahayag, magkahiusa kita ug ang dugu ni Jesus nga iyang Anak maghugas sa tanan natung kasal-anan.

Kun muingun kita nga wala kitay sala, gilimbungan natu ang atung kaugalingun ug wala kanatu ang kamatuuran. Apan kun isugid natu sa Dyus ang atung mga sala, siya nga matarung ug matinumanun sa iyang saad mupasaylu gayud sa tanan natung mga sala ug maghinlu sa tanan natung mga kalapasan. Kun muingun kita nga wala kita makasala, gipakabakakun natu ang Dyus ug wala natu dawata ang iyang pulung.

Tudling-Tubag (Rispunsuryu)

1 Jn 1:2; 5:20

Gipadayag na ang maung kinabuhi; nakita namu kini ug gisangyaw namu kaninyu ang kinabuhing walay katapusan

Nga diha uban sa Amahan ug gipadayag kanatu, aliluya.

Nasayud kita nga mianhi ang Anak sa Dyus ug mihatag kanatu’g salabutan arun makaila kita sa matuud nga Dyus, kay ang atung kinabuhi anaa sa iyang Anak nga si Jesucristo. Matuud siya nga Dyus ug kinabuhi’ng dayun.

Nga diha uban sa Amahan ug gipadayag kanatu, aliluya.

Ikaduhang Pagbasa

Gikan sa hubit ni San Cirilo sa Alexandria, ubispu, kabahin sa ikaduhang sulat ngadtu sa mga taga-Corinto

(Cap 5,5-6,2: PG 74, 942-943)

Gipahiuli kita sa Dyus ngadtu sa iyang kaugalingun pinaagi ni Cristo ug gihimu kita’ng mga alagad sa pakighiuli

Sila nga, pinasaligan sa Ispiritu, hugut nga naglaum nga mabanhaw sila puhun naghuput sa ilang gipaabut nga daw nahitabu na niarung panahuna. Nag-ingun sila: “Ang panagway dili na natu sukdanan sa paghukum sa uban. Ang Ispiritu na ang nagmandu sa atung mga kinabuhi karun, ug wala na kita magaid niining kalibutan nga madunut. Ang kahayag sa Bugtung Anak midan-ag kanatu, ug nahisama na kita sa Pulung, ang tinubdan sa tanang kinabuhi. Kaniadtu’ng naghari pa labaw kanatu ang sala, ang mga higut sa kamatayun hugut nga nagkuput kanatu, apan karun nga nahiluna na sa atung mga kasingkasing ang kamatarung ni Cristo, nakabuhi na kita gikan sa atung kanhi kahimtang nga madunut.”

Nagpasabut kini nga wala’y bisan usa kanatu nga nagpuyu ug kinabuhi nga naulipun gihapun sa mga lawasnung kahuyang, lakip na ang pagkadautan. Kaniadtu nagtuu kami nga si Cristo nagpuyu ilawum sa mga lawasnung kahuyang, apan karun wala na kami magtuu niana, nag-ingun si San Pablo. Buut ipasabut niya nga ang Pulung nahimung tawu ug mipuyu uban kanatu; gisagubang niya ang kamatayun sa lawas arun hataga’g kinabuhi ang tanang tawu. Niining lawasa natu siya nailhan kaniadtu, apan dili na karun. Bisan pa man nagpabilin siya nga may lawas, kay nabanhaw man siya sa ikatulung adlaw ug karun atua na uban sa iyang Amahan sa langit, sayud kita nga milabang na siya sa kinabuhi’ng lawasnun; kay namatay na man siya kausa, dili na siya mamatay pag-usab ug ang kamatayun wala na’y gahum ibabaw kaniya. Ang kamatayun niya mau ang kamatayun sa sala — ug kausa lamang siya namatay alang sa tanan, ug ang kinabuhi niya kinabuhi uban sa Dyus.

Sanglit niining paagiha nahimu man si Cristo nga tinubdan sa atung kinabuhi, kita nga nagsunud sa iyang mga tunub dili gayud muisip sa atung kaugalingun nga nagpuyu pa ilawum sa gahum sa kahuyang nga lawasnun, hinunua, milapas na kita niini. Matuud gayud ang giingun ni San Pablo nga ang tawu nga nahiusa kang Cristo usa na ka bug-us nga bag-u’ng tawu: tapus na ang iyang daang kinabuhi ug nagsugud na ang bag-u. Gihimu kita’ng matarung pinaagi sa atung pagtuu ni Cristu ug ang gahum sa tunglu nabugtu na. Ang pagkabanhaw ni Cristo alang sa atung kapuslanan nakapatapus sa paghari sa kamatayun. Nakaila kita sa matuud nga Dyus ug nagsimba kaniya dinha sa ispiritu ug kamatuuran, pinaagi sa Anak nga tigpangama natu ug nga nagpakunsad sa mga panalangin sa Amahan nganhi sa kalibutan.

Ug busa naghuput ug lawum nga pagsabut ang giingun ni San Pablo: Binuhatan kini’ng tanan sa Dyus: siya ang nagpahiuli kanatu ngadtu sa iyang kaugalingun pinaagi ni Cristo. Kay ang mistiryu sa pagpakatawu ug ang kabag-uhan nga nahimu niini dili gayud mahitabu kun wala gimbut-i sa Amahan. Pinaagi ni Cristo may agianan na kita paingun sa Amahan, kay sumala pa ni Cristo gayud, wala’y bisan usa nga makaadtu sa Amahan kun dili muagi kanaku. Busa, binuhatan kini’ng tanan sa Dyus. Siya ang nagpahiuli kanatu ngadtu sa iyang kaugalingun pinaagi ni Cristo ug ang nagtahas kanatu sa pagpahiuli sa uban ngadtu kaniya.

Tudling-Tubag (Rispunsuryu)

Rom 5:11; Col 1:19-20

Nagsadya kita dinha sa Dyus pinaagi ni Jesus nga atung Ginuu,

Pinaagi kang kinsa naangkun natu ang pagkahiuli, aliluya.

Gikahimut-an sa Dyus nga ang tanang kahingpitan maanaa ni Cristo, ug pinaagi kaniya ang Dyus nagpahiuli sa tanang butang ngadtu sa iyang kaugalingun.

Pinaagi kang kinsa naangkun natu ang pagkahiuli, aliluya.

Ang Te Deum

Ay! Dyus, nagasimba kami kanimu;

ay! Ginuu, nagapasidungug kami kanimu.

Amahan nga walay katapusan,

nagyukbu kanimu ang tibuuk kalibutan.

Ang kaanghilan, ang kalangitan, ug ang Kagahuman sa langit,

ang mga Kirubin ug Sirapin, sa pagdayig kanimu way hunung nga nanagsinggit:

Balaan, Balaan, Balaang Ginuung Dyus sa kagahuman,

napunu sa kaharianun sa imung himaya ang yuta ug kalangitan.

Ang mahimayaung panun sa Apustulis nagaawit kanimu,

ang halangdung kahugpungan sa mga prupita nagadayig kanimu,

ang kasundaluhan sa mga martir nga nanagputi naghimaya kanimu,

ang Balaang Simbahan sa tanang bahin sa yuta nagapasidungug kanimu,

Amahan kansang kahalangdun walay kinutuban,

uban sa matuud ug bugtung mung Anak, nga takus pagahalaran,

ug ang Ispiritu Santu, Manlalaban.

Ay! ikaw, Cristo, ang Hari sa kahimayaan,

ikaw sa kahangturan ang Anak sa Amahan;

sa dihang gimbut-an mung tubsun ang katawhan,

wa mu gisalikway ang sa Birhin nga taguangkan;

sa iyang kalala ang kamatayun imung giilugan,

ug gibuksan ang Langitnung Gingharian

alang kanila nga ikaw ang gisaligan.

Sa tuu sa Dyus ang imung lingkuranan

uban sa himaya sa Amahan.

Nagatuu kami nga ikaw ang Hukum nga muanhi.

Ug busa nangaliyupu kami,

ang imung mga alagad tabangi,

nga sa labing mahal mung dugu gitubus.

Paubana sila sa imung mga santus

ngadtu sa himayang walay pagkatapus.

¶ Ang musunud nga mga tudling mahimung dili apilun:

Luwasa ang katawhan mu, Ginuu, ug ang imung kabilin panalangini.

Ibayaw sila sa kinabuhing dayun ug sila tultuli.

Nagdayig kami kanimu sa adlawng tanan,

ug nagsimba sa imung ngalan sa walay katapusang mga katuigan.

Magmapuangurun ka niining adlawa, Ginuu, ug sa tanang sala kami panalipdi.

Ay! Ginuu, kanamu maluuy ka, kaluy-i kami.

Maamua unta ang kaluuy mu, Ginuu,

kay misalig man kami kanimu.

Ay! Ginuu, kanimu ku gipahiluna ang akung paglaum:

Ayaw gayud aku pakyasa intawun.

Pag-ampu

Mag-ampu kita.

Itugut, labing makagagahum nga Dyus,

nga unta kinasingkasing namu’ng saulugun kining mga adlaw sa kalipay,

nga gisaulug namu arun pagpasidungug sa nabanhaw’ng Ginuu,

ug nga kadtung gitagamtam namu pag-usab pinaagi sa paghandum

unta huptan namu kanunay sa amung mga buhat.

Pinaagi sa amung Ginuung Jesucristo, imung Anak,

nga buhi ug naghari uban kanimu,

diha sa panaghiusa sa Ispiritu Santu,

Dyus, hangtud sa kahangturan.

Amin.

Pagdayig

Daygun ta ang Ginuu.

Salamat sa Dyus.

Kining hubad Sinugbuanun ni Elmer Montejo pinasubay sa The Divine Office: The Liturgy of the Hours (© 1974, 2023 International Commission on English in the Liturgy Corporation, all rights reserved). Ang hubad sa Oratio (Katapusang Pag-ampu) pinasubay sa The Roman Missal (third typical edition, © 2010, International Commission on English in the Liturgy Corporation, all rights reserved) ug ang hubad sa “Te Deum” pinasubay sa kinabag-uhan ug aprubadung hubad Ininglis niini niadtong tuig 2020. Ang mga Salmu, unud sa Unang Pagbasa, ug pipila ka mubu nga mga tudling sa Ikaduhang Pagbasa dili iya sa taghubad apan kinutlu sa Maayong Balita Biblia (Adunay Deuterocanon), © 1999 Philippine Bible Society, ug gihulad, sama sa ubang bahin, sa gipasayung panitik (simplified spelling).

Kinaulahiang pag-usab: Mayu 23, 2025.
Unang paghubad: Mayu 8, 2025.

Liturgy of the Hours Mga Hubad