Ikapitung Duminggu sa Pagkabanhaw

Tulumanun sa mga Pagbasa
(Office of Readings)

Pagpangdapit

Sinugdanan

Ginuu, ✠ buksan mu ang akung mga ngabil.

Ug ang akung baba magamantala sa imung pagdayig.

Dali kamu, simbahun ta si Cristo ang Ginuu nga misaad nga magpadala sa Ispiritu Santu ngadtu sa iyang katawhan, aliluya.

Salmu 95

Pagdapit sa pagsimba sa Dyus

Pagdinasigay kamu matag adlaw samtang may gitawag pa nga “karung adlawa” (Hebreo 3:13).

Dali kamu, daygun ta ang Ginuu!

Mag-awit kita nga malipayun ngadtu sa Dyus nga atung tigpanalipud.

Muduul kita kaniya arun pagpasalamat

ug awitan ta siyag malipayung mga awit sa pagdayig!

Dali kamu, simbahun ta si Cristo ang Ginuu nga misaad nga magpadala sa Ispiritu Santu ngadtu sa iyang katawhan, aliluya.

Kay ang Ginuu gamhanang Dyus,

gamhanang hari nga labaw sa tanang dyus.

Nagmandu siya sa tibuuk kalibutan

gikan sa kinahiladman sa yuta ngadtu sa labing taas nga kabukiran.

Nagmandu siya sa dagat nga iyang gibuhat

ug sa yuta nga iyang giumul.

Dali kamu, simbahun ta si Cristo ang Ginuu nga misaad nga magpadala sa Ispiritu Santu ngadtu sa iyang katawhan, aliluya.

Dali kamu, mangyukbu kita ug musimba kaniya;

mangluhud kita atubangan sa Ginuu nga atung Magbubuhat!

Siya ang atung Dyus;

kita ang katawhan niya nga iyang giatiman, †
ang panun nga iyang giamuma.

Dali kamu, simbahun ta si Cristo ang Ginuu nga misaad nga magpadala sa Ispiritu Santu ngadtu sa iyang katawhan, aliluya.

Pamatia karun ang iyang gisulti, †
“Ayaw pagahia ang inyung ulu sama sa inyung katigulangan didtu sa Meriba

ingun man didtu sa kamingawan sa Masa.

Didtu gisulayan nila aku

bisag nakita nila ang akung gibuhat alang kanila.

Dali kamu, simbahun ta si Cristo ang Ginuu nga misaad nga magpadala sa Ispiritu Santu ngadtu sa iyang katawhan, aliluya.

Sulod sa 40 ka tuig wala aku malipay niadtung mga tawhana.

Miingun aku, ‘Pagkamasupilun nila! †
Nagdumili sila pagtuman sa akong mga sugu!’

Nasuku aku ug nanumpa,

‘Dili gayud kamu makasulud †
sa yuta nga akung papahulayan kaninyu.’ ”

Dali kamu, simbahun ta si Cristo ang Ginuu nga misaad nga magpadala sa Ispiritu Santu ngadtu sa iyang katawhan, aliluya.

Himaya sa Amahan, ug sa Anak,

ug sa Ispiritu Santu.

Maingun sa sinugdan, karun, ug sa gihapun,

ug sa mga katuigan nga walay katapusan. Amin.

Dali kamu, simbahun ta si Cristo ang Ginuu nga misaad nga magpadala sa Ispiritu Santu ngadtu sa iyang katawhan, aliluya.

Awit-Pagdayig (Imnu)

Ang imnu (awit-pagdayig) sa ubus usa ka litiral nga hubad sa “Ætérne Rex, Altíssime,” ang gitakda nga imnu alang sa Tulumanun sa mga Pagbasa sa Ikapitung Duminggu sa Pagkabanhaw.

Hari sa kahangturan ug labing halangdun,
Manunubus sa tanang matuuhun,
nga milaglag, mibungkag sa kamatayun,
ug pinaagi kang kinsa ang grasya nagmadaugun.

Misaka ka sa trunu, sa tuu sa Amahan,
ug gikan sa langit ikaw gihatagan
sa tumang gahum labaw sa ngatanan
nga dili tawhanung hiyas ang sukaranan,

Arun ang sa kabuhatang tulu ka tigbalayun —
ang yutan-un, ang ilawum sa yuta, ang langitnun —
nga tanan binuhat, tanan tinukud
manangyukbu nga nanangluhud.

Nagkurug nga nagtan-aw ang kaanghilan
sa tawu’ng nausab ang kapalaran;
unud ang nakasala, unud ang nagpaputli,
ug ang unud sa Pulung sa Dyus ang naghari.

Ay! Cristo nga amu’ng kalipay,
nga nagpabiling ganti’ng tunhay,
naghari ka sa tigbalayun sa kabuhatan,
nagmadaugun batuk sa kalibutanung katagbawan.

Busa kami nagaampu, kanimu nangaliya:
ang tanan namu’ng mga sala pasaylua
ug mga kasingkasing namu iisa mu’g bayawun
pinaagi sa imu’ng grasya nga langitnun,

Arun nga sa pagsugud sa imung pagsubang
dinha sa pula’ng panganud sa pagpanudya,
iwakli mu ang tanang silut nga amu’ng utang
ug ipasig-uli ang purungpurung namu’ng nawala.

Maimu, Ginuung Jesus, ang kahimayaan,
Ikaw nga mikayab sa kahitas-an,
uban sa Amahan ug sa Ispiritu’ng mahigugmaun,
sa kanunay hangtud sa mga katuigang dayun. Amin.

Pag-awit sa mga Salmu (Salmudiya)

Aliluya, gibanhaw sa Dyus si Cristo gikan sa mga minatay ug gihatagan siya ug himaya, aliluya.

Salmu 145 (I)

Pagdayig sa kahalangdun sa Dyus

Ginuu, ikaw ang Matarung, nga mau kaniadtu ug mau gihapun karun (Gipadayag 16:5).

O akung Dyus ug hari, isangyaw ku ang imung pagkagamhanan;

pasalamatan ku ikaw hangtud sa kahangturan.

Pasalamatan ku ikaw sa adlawng tanan,

ug dayigun ku ikaw hangtud sa kahangturan.

Gamhanan ang Ginuu ug angayan gayud nga daygun siya;

dili matukib ang iyang gahum.

Daygun ang imung nabuhat sa tanang kaliwatan;

isangyaw nila ang mga buhat mung katingalahan.

Isangyaw sa mga tawu ang imung himaya ug kahalangdun,

ug pamalandungan ku ang kahibulungan mung mga buhat.

Isangyaw sa mga tawu ang mga buhat mung katingalahan,

ug isaysay ku usab ang imung gahum.

Ipanugilun nila ang imung kaayu

ug mag-awit sila sa imung pagkamatarung.

Mahigugmaun ug maluluy-un ang Ginuu,

dili daling masuku ug punu sa gugmang walay paglubad.

Maayu siya sa tanan

ug maluluy-un sa tanan niyang binuhat.

Himaya sa Amahan, ug sa Anak,

ug sa Ispiritu Santu.

Maingun sa sinugdan, karun, ug sa gihapun,

ug sa mga katuigan nga walay katapusan. Amin.

Aliluya, gibanhaw sa Dyus si Cristo gikan sa mga minatay ug gihatagan siya ug himaya, aliluya.

Aliluya, maimu ang pagdayig, ay! Ginuu, labaw sa kinatas-an sa mga langit, aliluya.

Salmu 145 (II)

Pagdayig sa kahalangdun sa Dyus

Ginuu, ikaw ang Matarung, nga mau kaniadtu ug mau gihapun karun (Gipadayag 16:5).

O Ginuu, mudayig kanimu ang tanan mung binuhat,

ug magpasalamat kanimu ang tanan mung katawhan!

Isangyaw nila ang himaya sa imung gingharian ug ang imung gahum, †
arun masayran sa mga tawu ang imung gamhanang mga buhat

ug ang halangdung himaya sa imung gingharian.

Ang imung gingharian walay katapusan

ug maghari ka hangtud sa kahangturan.

Himaya sa Amahan, ug sa Anak,

ug sa Ispiritu Santu.

Maingun sa sinugdan, karun, ug sa gihapun,

ug sa mga katuigan nga walay katapusan. Amin.

Aliluya, maimu ang pagdayig, ay! Ginuu, labaw sa kinatas-an sa mga langit, aliluya.

Aliluya, ang tanang gahum sa langit ug sa yuta gihatag na nganhi kanaku, aliluya.

Salmu 145 (III)

Pagdayig sa kahalangdun sa Dyus

Ginuu, ikaw ang Matarung, nga mau kaniadtu ug mau gihapun karun (Gipadayag 16:5).

Mutuman gayud ang Dyus sa iyang mga saad,

ug makita ang kamaayu niya diha sa tanan nga iyang gibuhat.

Tabangan niya ang tanan nga anaa sa kalisdanan,

ug lipayun niya ang tanan nga anaa sa kagul-anan.

Ang tanang mga buhi malaumun nga nag-alagad kanimu,

ug hatagan mu sila sa pagkaun nga ilang gikinahanglan.

Hatagan mu sila sa ilang gikinahanglan

ug tagbawun mu ang tanang binuhat.

Matarung ang Ginuu sa tanan niyang buhatun,

ug naggikan sa iyang kaluuy ang tanan niyang gibuhat.

Ang Ginuu andam nga mutubag sa tanan nga musangpit kaniya

kun matinud-anun ang ilang pagtawag kaniya.

Hatagan niya sa tanan nilang gikinahanglan sila nga nagpasidungug kaniya;

tagdun niya ang ilang pagtuaw ug luwasun niya sila.

Panalipdan sa Ginuu ang tanan nga nahigugma kaniya

apan laglagun niya ang mga dautan.

Daygun ku kanunay ang Ginuu,

ug daygun unta ang balaan niyang ngalan hangtud sa kahangturan.

Himaya sa Amahan, ug sa Anak,

ug sa Ispiritu Santu.

Maingun sa sinugdan, karun, ug sa gihapun,

ug sa mga katuigan nga walay katapusan. Amin.

Aliluya, ang tanang gahum sa langit ug sa yuta gihatag na nganhi kanaku, aliluya.

Tudling (Birsikulu)

Nagsadya ang tibuuk ku’ng lawas, aliluya.

Sa tanan ku’ng kusug dayigun ku ang akung Dyus, aliluya.

Mga Pagbasa

Unang Pagbasa

Gikan sa unang sulat sa apustul nga si Juan

3:18-24

Ang sugu sa pagtuu ug gugma

Mga anak, ipakita ta ang matuud nga paghigugma pinaagi sa mga maayung buhat, dili sa mga pulung lamang. Pinaagi niini maila natu nga kita iya sa kamatuuran ug nga may pagsalig kita atubangan sa Dyus sa dihang sudyaan kita sa atung kunsinsya kay ang Dyus labaw pa kay sa atung kunsinsya ug nasayud siya sa tanan. Busa, mga igsuun, kun wala magsudya kanatu ang atung kunsinsya, may kaisug kita nga muatubang sa Dyus. Ug atung madawat gikan kaniya ang bisan unsa nga pangayuun natu kay gituman man natu ang iyang mga sugu ug gibuhat ang makapahimuut kaniya.

Ang gisugu niya mau nga mutuu kita sa ngalan sa iyang Anak nga si Jesucristo ug maghigugmaay sumala sa sugu ni Cristo. Ang nagtuman sa mga sugu sa Dyus anaa sa Dyus ug ang Dyus anaa kaniya. Ug masayran natu nga ang Dyus ania kanatu pinaagi sa Ispiritu nga iyang gihatag kanatu.

Tudling-Tubag (Rispunsuryu)

1 Jn 3:24; Sir 1:9, 10

Ang tanang nagtuman sa mga sugu sa Dyus anaa sa Dyus ug ang Dyus anaa kanila.

Masayran natu nga ang Dyus ania kanatu pinaagi sa Ispiritu nga iyang gihatag kanatu, aliluya.

Dinha sa iyang Ispiritu Santu gibuhat sa Dyus ang kaalam, nga iyang gibubu sa tanan niyang binuhat ug gitanyag ngadtu kanila nga nahigugma kaniya.

Masayran natu nga ang Dyus ania kanatu pinaagi sa Ispiritu nga iyang gihatag kanatu, aliluya.

Ikaduhang Pagbasa

Gikan sa usa ka wali ni San Gregorio sa Nyssa, ubispu, mahitungud sa Awit sa mga Awit

(Hom. 15: Jaeger VI, 466-468)

Ang himaya nga gihatag mu kanaku, gihatag ku kanila

Inig wagtangun na sa gugma ang tanang kahadluk ug ang kahadluk nahimu na’ng gugma, ang panaghiusa nga dala sa atung manunubus mahingpit na, kay ang tanang tawu mahiusa pinaagi sa ilang pakighiusa sa usa ka Dyus. Maghuput sila sa kahingpitan nga gihuptan sa salampati, sumala sa atung paghubad sa sinulat: Usa ra ang akung salampati, ang aku’ng nag-inusara’ng hingpit. Siya ang bugtung anak sa iyang inahan, ang iyang pinalangga.

Ang mga pulung sa atung Ginuu dinha sa ibanghilyu nagpalutaw sa tin-aw nga kahulugan niining sinulata. Human niya gitugyanan sa tanang gahum ang iyang mga tinun-an pinaagi sa iyang panalangin, midangat sab siya’g daghang laing mga gasa alang kanila pinaagi sa iyang pag-ampu ngadtu sa Amahan. Usa niini ang kinadak-ang gasa sa ngatanan — nga sila dili magkasumpakiay kabahin sa unsa’y angay ug maayu, kay gipahiusa na man sila sa usa ka Dyus. Sumala pa sa Apustul, pagabugkusun sila sa kalinaw dinha sa panaghiusa nga nanukad sa Ispiritu Santu. Pagahimuun sila’ng usa ka lawas ug usa ka kalag pinaagi sa usa ka paglaum nga nagtawag kanila. Apan labi’ng maayu kun magkutlu kita gikan sa mga pulung sa ibanghilyu gayud. Nag-ampu aku, matud pa sa Ginuu, nga unta mausa sila; arun nga sama nga ikaw, Amahan, ania kanaku ug aku anaa kanimu, sila sab unta mausa kanatu.

Ang higut nga nagpahitabu niining panaghiusaha mau ang himaya. Kun hinuktukan pag-ayu ang mga pulung sa Ginuu, wala’y makalimud nga ang Ispiritu Santu gitawag ug himaya: Ang himaya nga gihatag mu kanaku, gihatag ku kanila. Gani, gihatag niya kining himayaa ngadtu sa iyang mga tinun-an sa dinhang giingnan niya sila: Dawata ang Ispiritu Santu. Bisan pa kanunay na siya’ng nanag-iya niini, bisan gani sa wala pa namugna ang kalibutan, nakadawat siya niining himayaa sa diha’ng gisul-ub niya ang tawhanung kinaiya. Unya, human gihimaya na sa Ispiritu ang iyang tawhanung kinaiya, ang himaya sa Ispiritu natunul sab ngadtu sa iyang kaliwat, sugud sa iyang mga tinun-an. Mau’ng miingun siya: Ang himaya nga gihatag mu kanaku, gihatag ku kanila, arun sila mahimu’ng usa, sama nga ikaw ug aku usa. Kay aku anaa kanila ug ikaw ania kanaku, buut ku nga hingpit ang ilang pagkausa.

Si bisan kinsa nga mihingkud na gikan sa pagkamasusu ngadtu sa pagkahamtung ug nakakab-ut ug kalagnung kahamtung naghuput sa gahum ibabaw sa iyang mga kailibgun ug naghuput sab sa kaputli nga nagpakatakus kaniya’ng mudawat sa himaya sa Ispiritu. Siya ang hingpit nga salampati nga gisud-ung sa pamanhunun sa dinhang miingun siya: Usa ra ang akung salampati, ang aku’ng nag-inusara’ng hingpit.

Tudling-Tubag (Rispunsuryu)

Cf. Jn 15:15; 14:26; 15:14

Wala ku na kamu gitawag nga mga suluguun. Hinunua, gitawag ku na kamu’ng mga higala, kay nakasaksi kamu sa tanang mga butang nga gipamuhat ku taliwala kaninyu.

Dawata ang Ispiritu Santu, ang Paraklitu, nga ipadala sa Amahan nganha kaninyu, aliluya.

Mga higala ku kamu kun tumanun ninyu ang gisugu ku kaninyu.

Dawata ang Ispiritu Santu, ang Paraklitu, nga ipadala sa Amahan nganha kaninyu, aliluya.

Ang Te Deum

Ay! Dyus, nagasimba kami kanimu;

ay! Ginuu, nagapasidungug kami kanimu.

Amahan nga walay katapusan,

nagyukbu kanimu ang tibuuk kalibutan.

Ang kaanghilan, ang kalangitan, ug ang Kagahuman sa langit,

ang mga Kirubin ug Sirapin, sa pagdayig kanimu way hunung nga nanagsinggit:

Balaan, Balaan, Balaang Ginuung Dyus sa kagahuman,

napunu sa kaharianun sa imung himaya ang yuta ug kalangitan.

Ang mahimayaung panun sa Apustulis nagaawit kanimu,

ang halangdung kahugpungan sa mga prupita nagadayig kanimu,

ang kasundaluhan sa mga martir nga nanagputi naghimaya kanimu,

ang Balaang Simbahan sa tanang bahin sa yuta nagapasidungug kanimu,

Amahan kansang kahalangdun walay kinutuban,

uban sa matuud ug bugtung mung Anak, nga takus pagahalaran,

ug ang Ispiritu Santu, Manlalaban.

Ay! ikaw, Cristo, ang Hari sa kahimayaan,

ikaw sa kahangturan ang Anak sa Amahan;

sa dihang gimbut-an mung tubsun ang katawhan,

wa mu gisalikway ang sa Birhin nga taguangkan;

sa iyang kalala ang kamatayun imung giilugan,

ug gibuksan ang Langitnung Gingharian

alang kanila nga ikaw ang gisaligan.

Sa tuu sa Dyus ang imung lingkuranan

uban sa himaya sa Amahan.

Nagatuu kami nga ikaw ang Hukum nga muanhi.

Ug busa nangaliyupu kami,

ang imung mga alagad tabangi,

nga sa labing mahal mung dugu gitubus.

Paubana sila sa imung mga santus

ngadtu sa himayang walay pagkatapus.

¶ Ang musunud nga mga tudling mahimung dili apilun:

Luwasa ang katawhan mu, Ginuu, ug ang imung kabilin panalangini.

Ibayaw sila sa kinabuhing dayun ug sila tultuli.

Nagdayig kami kanimu sa adlawng tanan,

ug nagsimba sa imung ngalan sa walay katapusang mga katuigan.

Magmapuangurun ka niining adlawa, Ginuu, ug sa tanang sala kami panalipdi.

Ay! Ginuu, kanamu maluuy ka, kaluy-i kami.

Maamua unta ang kaluuy mu, Ginuu,

kay misalig man kami kanimu.

Ay! Ginuu, kanimu ku gipahiluna ang akung paglaum:

Ayaw gayud aku pakyasa intawun.

Pag-ampu

Mag-ampu kita.

Dungga nga mapuangurun ang amu’ng mga pangamuyu, ay! Ginuu,

arun kami, nga nagatuu nga ang Manluluwas sa katawhan anaa kanimu sa imung himaya,

makatagamtam unta, sumala sa iyang gisaad,

hangtud sa katapusan sa kalibutan,

sa iyang malungtarung prisinsya taliwala kanamu.

Siya nga buhi ug naghari uban kanimu,

diha sa panaghiusa sa Ispiritu Santu,

Dyus, hangtud sa kahangturan.

Amin.

Pagdayig

Daygun ta ang Ginuu.

Salamat sa Dyus.

Kining hubad Sinugbuanun ni Elmer Montejo pinasubay sa The Divine Office: The Liturgy of the Hours (© 1974, 2023 International Commission on English in the Liturgy Corporation, all rights reserved). Ang hubad sa Oratio (Katapusang Pag-ampu) pinasubay sa The Roman Missal (third typical edition, © 2010, International Commission on English in the Liturgy Corporation, all rights reserved) ug ang hubad sa “Te Deum” pinasubay sa kinabag-uhan ug aprubadung hubad Ininglis niini niadtong tuig 2020. Ang mga Salmu, unud sa Unang Pagbasa, ug pipila ka mubu nga mga tudling sa Ikaduhang Pagbasa dili iya sa taghubad apan kinutlu sa Maayong Balita Biblia (Adunay Deuterocanon), © 1999 Philippine Bible Society, ug gihulad, sama sa ubang bahin, sa gipasayung panitik (simplified spelling).

Kinaulahiang pag-usab: Hunyu 2, 2025.
Unang paghubad: Mayu 22, 2025.

Liturgy of the Hours Mga Hubad