Duminggu sa Pagkabanhaw sa Ginuu

Tulumanun sa Pagtapus
(Compline / Night Prayer)

Sinugdanan

Ay! Dyus, ✠ tabangi aku.

Ay! Ginuu, pagdali sa pagtabang kanaku.

Himaya sa Amahan, ug sa Anak, ug sa Ispiritu Santu. Maingun sa sinugdan, karun, ug sa gihapun, ug sa mga katuigan nga walay katapusan. Amin. Aliluya.

Pagsusi sa Tanlag

Mahimung buhatun ang kadiyut nga pagsusi sa tanlag. Kun tiningub ang pagsaulug sa Tulumanun, ang usa sa mga Aktu sa Pagpinitinsya gikan sa Misa mahimung gamitun.

Nagakumpisal aku sa Dyus nga makagagahum sa tanan
ug kaninyu, mga igsuun,
nga nakalapas aku ug daku uyamut
sa hunahuna, sa pulung, ug sa buhat,
sa wala pagbuhat sa kinahanglang buhatun,

Mamukpuk sa dughan samtang nag-ingun:

kay akung sala,
akung sala,
akung dakung sala.

Mupadayun sa pag-ingun:

Busa, nangamuyu aku kang Santa Maria kanunay’ng ulay,
sa tanang mga anghil ug mga santus,
ug kaninyu, mga igsuun,
arun inyu aku’ng iampu sa Ginuu nga atung Dyus.

Kun may pari, isunud ang paghatag sa absulusyun:

Kaluy-an unta kita sa Dyus nga makagagahum sa tanan,
ug pasayluun sa atung mga sala,
ug dad-un unta kita niya ngadtu sa kinabuhing dayun.

Amin.

Awit-Pagdayig (Imnu)

Ang imnu (awit-pagdayig) sa ubus usa ka litiral nga hubad sa “Jesu, Redémptor Sǽculi,” ang gitakda nga imnu alang sa Tulumanun sa Pagtapus sa Duminggu sa Pagkabanhaw sa Ginuu.

Jesus, Manunubus sa kalibutan,
Pulung sa labing halangdung Amahan,
Kahayag gikan sa Kahayag nga dili makit-an,
Mabinantayung tig-amping sa imung gihuptan:

Ikaw, nga sa tanang butang nagmugna
ug sa tanang takna’g panahun nagpahiluna,
palagsika pinaagi sa pahulay sa kagabhiun,
ang mga lawas nga sa pagbudlay nagmaluyahun.

Ikaw nga milaglag sa kahiladman sa impirnu,
sa amung kaaway kami palingkawasun mu,
arun dili na siya makapanglingla’g makapanglipat
kanila nga sa giula mu’ng dugu gilukat,

Buhan, bisan sa lawas nagbaguud kami
ug mulungtad sa makadiyut lamang dinhi,
ang amung lawas makatulug nga malinawun
arun ang kalag dili mahulug sa katulugun.

Maimu, Ginuung Jesus, ang kahimayaan,
ikaw nga misanag sa pagdaug mu sa kamatayun,
uban sa makabuhi nga Ispiritu ug sa Amahan,
sa kanunay hangtud sa mga katuigang dayun. Amin.

Pag-awit sa mga Salmu (Salmudiya)

Aliluya, aliluya, aliluya.

Salmu 91

Ilawum sa panalipud sa Labing Halangdun

Gihatagan ku kamu’g gahum arun makahimu kamu pagyatak sa mga bitin ug sa mga tánga (Luc 10:19).

Ang mudangup sa Labing Halangdun,

ang magpabiling ubus sa pagbantay sa Labing Gamhanan,

makaingun sa Ginuu, † “Ikaw ang akung manlalaban ug tigpanalipud,

ikaw ang akung Dyus, ug kanimu nagsalig aku.”

Gikan sa tanang katalagman nga wala mu hisayri,

ilikay ka gayud niya ingun man sa tanang sakit nga makamatay.

Tabunan ka niya sa iyang mga paku †
ug dili ka gayud maunsa ubus sa iyang pag-atiman.

Ang iyang pagkamaunungun manalipud ug magbantay kanimu.

Dili ka unya mahadluk sa mga katalagman sa kagabhiun

u sa mga udyung nga naghadyung panahun sa adlaw

u sa mga sakit nga muhampak diha sa kangitngit

u sa kadautan nga mulaglag panahun sa adlaw.

Mahimung mangapukan ang usa ka libu diha sa imung kiliran,

napulu ka libu libut kanimu

apan dili ka gayud maunsa.

Makita mu unya unsaun pagsilut ang mga dautan.

Kay gihimu mu mang dalangpanan ang Ginuu,

ang Labing Halangdun nga imung tigpanalipud,

walay katalagman nga mudangat kanimu

ug walay kadaut nga muabut duul sa imung puluy-anan.

Pabantayan ka sa Dyus sa iyang mga anghil

arun pagpanalipud kanimu bisag asa ka paingun.

Sapwangun ka nila sa ilang mga kamut

arun dili maunsa sa mga batu ang imung mga tiil.

Tumban mu ang mga liyun ug mga bitin,

mga mapintas nga liyun ug mga bitin nga malala.

Ang Dyus nag-ingun, “Luwasun ku kadtung nahigugma kanaku,

ug panalipdan ku kadtung miila sa akung ngalan.

Sa dihang sangpitun aku nila,

tubagun ku sila.

Mag-uban aku kanila sa dihang sila anaa sa kalisdanan.

Luwasun ku sila ug pasidunggan.

Gantihan ku silag taas nga kinabuhi

ug luwasun ku gayud sila.”

Himaya sa Amahan, ug sa Anak,

ug sa Ispiritu Santu.

Maingun sa sinugdan, karun, ug sa gihapun,

ug sa mga katuigan nga walay katapusan. Amin.

Aliluya, aliluya, aliluya.

Mubu nga Pagbasa

Gipadayag 22:4-5

Makakita sila sa nawung niya ug ang iyang ngalan isulat diha sa ilang agtang. Didtu wala nay gabii ug dili na sila magkinahanglan ug mga suga ni kahayag sa adlaw kay ang Ginuung Dyus mau may ilang kahayag, ug maghari sila hangtud sa kahangturan.

Tudling-Tubag (Rispunsuryu)

Ang musunud nga antipuna ang litukun inay ang Rispunsuryu (Tudling-Tubag):

Kini ang adlaw nga gihimu sa Ginuu; maglipay ug magmaya kita, aliluya.

Awit Gikan sa Ibanghilyu

Panalipdi kami, Ginuu, samtang nagmata pa kami; bantayi kami samtang natulug kami; arun magtukaw kami uban ni Cristo ug mupahulay nga malinawun, aliluya.

Ang Awit ni Simeon (Nunc Dimittis)
Lucas 2:29-32

Si Cristo ang kahayag sa kanasuran ug ang himaya sa Israel

Karun, Ginuu, kay imu na mang gituman ang imung saad,

itugut na nga ang imung suluguun mupanaw nga malinawun.

Kay sa kaugalingun kung mga mata nakita ku ang imung kaluwasan,

nga imung giandam atubangan sa tanang katawhan:

Usa ka kahayag nga magpadayag sa imung dalan ngadtu sa mga dili Judio

ug maghatag sa himaya ngadtu sa imung katawhan, ang Israel.

Himaya sa Amahan, ug sa Anak,

ug sa Ispiritu Santu.

Maingun sa sinugdan, karun, ug sa gihapun,

ug sa mga katuigan nga walay katapusan. Amin.

Panalipdi kami, Ginuu, samtang nagmata pa kami; bantayi kami samtang natulug kami; arun magtukaw kami uban ni Cristo ug mupahulay nga malinawun, aliluya.

Katapusang Pag-ampu

Mag-ampu kita.

Ang amung tingug mapaubsanun unta’ng mangaliyupu kanimu, ay! Ginuu,

nga, kay nasaulug na karung adlawa ang mistiryu sa pagkabanhaw sa Ginuu,

dinha sa imung kalinaw mupahulay unta kami nga luwas sa tanang dautan,

ug mubangun pag-usab arun malipayun nga magdayig kanimu,

pinaagi ni Cristo nga amung Ginuu.

Amin.

Panalangin

Ang Dyus nga makagagahum sa tanan maghatag unta kanatu ug malinawun nga kagabhiun ug usa ka hingpit nga pagkatapus.

Amin.

Antipuna sa Mahal ng Birhin Maria

Regína Cæli

Rayna sa langit, paglipay, aliluya.
Kay siya nga naghimu ka nga angayan sa pagdala, aliluya.
Nabanhaw, sumala sa iyang giingun, aliluya.
Iampu mu kami sa Dyus, aliluya.

Pagsadya ug paglipay, Birhin Maria, aliluya.

Kay tinuud nga nabanhaw ang Ginuu, aliluya.

Pag-ampu

Mag-ampu kita.

Ay! Dyus, nga naghatag sa kalibutan ug kalipay

pinaagi sa pagkabanhaw sa imung Anak,

si Jesucristo nga amung Ginuu,

itugut, nangamuyu kami,

nga pinaagi sa iyang Inahahan, ang Birthin Maria,

makaangkun kami sa mga kalipay sa kinabuhing dayun,

pinaagi sa maung Cristo nga amung Ginuu.

Amin.

Kining hubad Sinugbuanun ni Elmer Montejo pinasubay sa The Divine Office: The Liturgy of the Hours (© 1974, 2023 International Commission on English in the Liturgy Corporation, all rights reserved). Ang hubad sa Oratio (Katapusang Pag-ampu) pinasubay sa The Roman Missal (third typical edition, © 2010, International Commission on English in the Liturgy Corporation, all rights reserved) ug ang hubad sa “Te Deum” pinasubay sa kinabag-uhan ug aprubadung hubad Ininglis niini niadtong tuig 2020. Ang mga Salmu, unud sa Unang Pagbasa, ug pipila ka mubu nga mga tudling sa Ikaduhang Pagbasa dili iya sa taghubad apan kinutlu sa Maayong Balita Biblia (Adunay Deuterocanon), © 1999 Philippine Bible Society, ug gihulad, sama sa ubang bahin, sa gipasayung panitik (simplified spelling).

Kinaulahiang pag-usab: Abril 19, 2025.
Unang paghubad: Abril 19, 2025.