Duminggu sa Pagkabanhaw sa Ginuu

Tulumanun sa Kilumkilum
(Vespers / Evening Prayer)

Sinugdanan

Ay! Dyus, ✠ tabangi aku.

Ay! Ginuu, pagdali sa pagtabang kanaku.

Himaya sa Amahan, ug sa Anak, ug sa Ispiritu Santu. Maingun sa sinugdan, karun, ug sa gihapun, ug sa mga katuigan nga walay katapusan. Amin. Aliluya.

Awit-Pagdayig (Imnu)

Ang imnu (awit-pagdayig) sa ubus usa ka litiral nga hubad sa “Ad Cenam Agni Próvidi,” ang gitakda nga imnu alang sa Tulumanun sa Kilumkilum sa Duminggu sa Pagkabanhaw sa Ginuu.

Sa panihapun sa Karniru nga gitagana,
nanagsul-ub sa saput sa kaluwasan, puting bisti,
tapus sa paglabang sa Dagat nga Pula,
awitan ta si Cristo ang Prinsipi.

Kansang labing balaan nga lawas
nga giugdaw dinha sa altar sa krus,
ug kansang dugu nga daw kapula sa rusas —
sa pagtilaw ta niini, iyaha na kita sa Dyus.

Tinamingan niadtung kilumkilum sa Pagsaylu
gikan sa gahum sa tiglaglag nga manulunda,
gikan sa kapintas sa hari sa Ehipto
gipalingkawas na gayud kita.

Si Cristo gayud ang halad ta sa Pagsaylu,
ang giihaw nga buutang karniru,
ang tim-us nga way libadura nga pan,
nga sa kaugalingun niyang unud mitugyan.

Ay! Halad nga tiunay ug takus,
nga pinaagi kaniya ang impirnu gibungkag,
ug ang katawhang nabihag didtu gitubus,
ug ang ganti sa kinabuhi gibalik ug hatag.

Mibangun si Cristo gikan sa lubnganan,
madaugung mibalik gikan sa kahiladman,
ang malupigun gigapus ug gipukan
ug ang paraisu pag-usab gibuksan.

Magmatunhay’ng kasadya ka sa mga salabutan
ay! Jesus, kalipay sa Pasku sa Kabanhawan,
ug kami nga mga nabuhi pag-usab sa grasya
sa imung mga kadaugan paubana.

Maimu, Ginuung Jesus, ang kahimayaan,
ikaw nga misanag sa pagdaug mu sa kamatayun,
uban sa makabuhi nga Ispiritu ug sa Amahan,
sa kanunay hangtud sa mga katuigang dayun. Amin.

Pag-awit sa mga Salmu (Salmudiya)

Si Maria Magdalena ug ang laing Maria nangadto aron pagtan-aw sa lubnganan sa Ginuu, aliluya.

Salmu 110:1-5,7

Ang Misiyas, hari ug pari

Mulungtad ang paghari ni Cristo hangtud mangapildi na ang tanan niyang mga kaaway (1 Cor 15:25).

Ang Ginuu miingun sa akung ginuu, ang hari, † “Lingkud diri sa akung tuu

hangtud nga himuun kung tumbanan sa imung mga tiil ang imung mga kaaway.”

Gikan sa Sion padakuun sa Ginuu † ang imung harianung gahum.

Miingun siya, “Harii ang imung mga kaaway.”

Sa adlaw nga makig-away ka sa imung mga kaaway,

makig-away usab nga maisugun ang imung katawhan.

Sama sa yamug sa sayung kabuntagun,

ang imung mga batan-ung lalaki muanha kanimu sa balaang kabungturan.

Nanumpa ang Ginuu ug kini dili niya bakwiun, † “Mahimu kang pari hangtud sa kahangturan,

sa laray ni Melquisedec.”

Anaa sa imung tuu ang Ginuu

ug buntugun niya ang mga hari sa adlaw nga siya masuku.

Muinum ang hari diha sa sapa daplin sa dalan;

malig-un siya ug mubarug nga madaugun.

Himaya sa Amahan, ug sa Anak,

ug sa Ispiritu Santu.

Maingun sa sinugdan, karun, ug sa gihapun,

ug sa mga katuigan nga walay katapusan. Amin.

Si Maria Magdalena ug ang laing Maria nangadto aron pagtan-aw sa lubnganan sa Ginuu, aliluya.

Duul ug tan-awa asa gilubung ang Ginuu, aliluya.

Salmu 114

Gipalingkawas ang mga Israelita gikan sa kaulipnan sa Ehipto

Ikaw sab mibiya sa Ehipto, sa dihang sa imung pagbunyag gisalikway mu ang kalibutan nga nakigbatuk sa Dyus (San Agustin).

Sa paggawas sa katawhan sa Israel gikan sa Ehipto

ug sa pagbiya sa mga kaliwat ni Jacob sa katawhang lahi ug pinulungan,

ang Juda nahimung puluy-anan sa Ginuu,

ug ang Israel nahimung iyang gingharian.

Ang Dagat nga Pula mitan-aw ug misibug

ug mihunung pagdagayday ang suba sa Jordan.

Nagluksuluksu ang mga bukid daw mga laking karniru

ug ang mga bungtud sama sa mga nating karniru.

Nganung misibug ka man, ay! dagat?

Ug ikaw, Jordan, nganung mihunung ka man pagdagayday?

Mga bukid, nganung nagluksuluksu man kamu daw mga laking karniru?

Mga bungtud, nganung nagluksuluksu man kamu daw mga nating karniru?

Kurug, ay! yuta, sa atubangan sa Ginuu,

sa atubangan sa Dyus ni Jacob,

nga naghimu sa mga dagkung batu nga mga lim-aw sa tubig

ug sa mga pangpang nga batu nga mga tuburan nga nagdagayday.

Himaya sa Amahan, ug sa Anak,

ug sa Ispiritu Santu.

Maingun sa sinugdan, karun, ug sa gihapun,

ug sa mga katuigan nga walay katapusan. Amin.

Duul ug tan-awa asa gilubung ang Ginuu, aliluya.

Miingun si Jesus: Ayaw kahadluk. Panglakaw kamu ug suginli ang akung mga igsuun nga mangadtu sila sa Galilea; didtu aku makigtagbu kanila, aliluya.

Awit: Tanawa ang Gipadayag 19:1-7

Ang kasal sa Nati’ng Karniru

Ikaw sab mibiya sa Ehipto, sa dihang sa imung pagbunyag gisalikway mu ang kalibutan nga nakigbatuk sa Dyus (San Agustin).

Aliluya.
Ang kaluwasan, ang himaya ug ang gahum iya sa atung Dyus! ✻

(Aliluya.)

Matuud ug matarung ang iyang mga hukum! ✻

Aliluya, (aliluya).

Aliluya.
Dayga ninyu ang atung Dyus, kamung tanan nga mga suluguun niya ✻

(Aliluya.)

ug tanang mga tawu nga mahadlukun sa Dyus, inila ug dili inila! ✻

Aliluya, (aliluya).

Aliluya.
Dayga ang Dyus kay naghari ang Ginuu nga Labing Gamhanan! ✻

(Aliluya.)

Maghugyaw ug maglipay kita ug daygun natu ang iyang pagkagamhanan! ✻

Aliluya, (aliluya).

Aliluya.
Kay miabut na ang panahun sa kasal sa Nating Karniru ✻

(Aliluya.)

ug andam na ang iyang pangasaw-unun. ✻

Aliluya, (aliluya).

Aliluya.
Himaya sa Amahan, ug sa Anak, ✻

(Aliluya.)

ug sa Ispiritu Santu. ✻

Aliluya, (aliluya).

Aliluya.
Maingun sa sinugdan, karun, ug sa gihapun, ✻

(Aliluya.)

ug sa mga katuigan nga walay katapusan. Amin. ✻

Aliluya, (aliluya).

Miingun si Jesus: Ayaw kahadluk. Panglakaw kamu ug suginli ang akung mga igsuun nga mangadtu sila sa Galilea; didtu aku makigtagbu kanila, aliluya.

Mubu nga Pagbasa

Heb 10:12-14

Si Cristo naghalad ug usa ka sakripisyu alang sa mga sala. Ug unya milingkud siya sa tuu sa Dyus. Didtu naghulat siya karun hangtud nga ang iyang mga kaaway himuun sa Dyus nga tumbanan sa iyang mga tiil. Busa pinaagi sa usa ka sakripisyu gihingpit niya hangtud sa kahangturan kadtung nahinluan sa sala.

Tudling-Tubag (Rispunsuryu)

Ang musunud nga antipuna ang litukun inay ang Rispunsuryu (Tudling-Tubag):

Kini ang adlaw nga gihimu sa Ginuu; maglipay ug magmaya kita, aliluya.

Awit Gikan sa Ibanghilyu

Sa pagkakilumkilum na niadtung unang adlaw sa simana nagtigum ang mga tinun-an ug gitrangkahan nila ang pultahan. Unya mitungha si Jesus sa taliwala nila ug miingun, “Mainyu ang kalinaw,” aliluya.

Ang Awit ni Maria (Magnificat)
Lucas 1:46-55

Ang kalag nagmalipayun sa Ginuu

Nagdayig ✠ sa Ginuu ang akung kalag, †
ug nagmalipayun aku diha sa Dyus nga akung Manluluwas,

tungud kay nahinumdum siya kanaku nga iyang ubus nga suluguun!

Ug sukad karun ang tanang tawu mutawag kanakug bulahan,†
tungud sa mga dagkung butang nga gihimu kanaku sa Gamhanang Dyus.

Balaan ang iyang ngalan;

nagpakita siyag kaluuy sa tanan nga may kahadluk kaniya

gikan sa usa ka kaliwatan ngadtu sa tanang kaliwatan.

Gibakyaw niya ang iyang kamut nga gamhanan

ug gipatibulaag ang mga tawu nga mapahitas-un uban sa tanan nilang laraw.

Gipukan niya ang mga hari nga gamhanan gikan sa ilang mga trunu,

ug gitubuy ang mga timawa.

Gibusug niya sa mga maayung butang ang mga gigutum,

ug iyang gipapahawa nga walay dala ang mga datu.

Gituman niya ang iyang saad sa atung mga katigulangan.

Mitabang siya kang Israel nga iyang suluguun

ug nahinumdum siya pagpakitag kaluuy kang Abraham

ug sa tanan niyang mga kaliwat hangtud sa kahangturan!

Himaya sa Amahan, ug sa Anak,

ug sa Ispiritu Santu.

Maingun sa sinugdan, karun, ug sa gihapun,

ug sa mga katuigan nga walay katapusan. Amin.

Mga Pangamuyu

Uban sa malipayung mga kasingkasing, musangpit kita kang Cristo, ang Ginuu, nga namatay ug nabanhaw, ug buhi kanunay arun mangaliya alang kanatu:

℟. Madaugung Hari, dungga ang amung pag-ampu.

Kahayag ug kaluwasan sa tanang katawhan, ipadala nganhi sa amung mga kasingkasing ang kalayu sa imung Ispiritu

samtang kami nagmantala sa imung pagkabanhaw.
(Madaugung Hari, dungga ang amung pag-ampu.)

Makaila unta ang Israel nga ikaw ang iyang dugay na’ng gipanganduy nga Misiyas

ug ang tibuuk kalibutan mapunu sa kasayuran sa imung himaya.
(Madaugung Hari, dungga ang amung pag-ampu.)

Hinaut magpabilin kami sa kahiusahan sa imung mga balaan

ug uban kanila hatagan mu kami sa kapahaluyan gikan sa amung mga pagbudlay.
(Madaugung Hari, dungga ang amung pag-ampu.)

Gipildi mu ang kamatayun, ang imung kaaway; gub-a nganhi kanamu ang gahum sa kamatayun,

arun kami unta magpuyu alang kanimu lamang nga amung madaugun ug walay kamatayun nga Ginuu.
(Madaugung Hari, dungga ang amung pag-ampu.)

Cristo nga Manunubus, nagmasinugtanun ka bisan pa sa pagdawat sa kamatayun, ug gibayaw ikaw ngadtu sa tuuhan sa Amahan,

sa imung dakung kaluuy dawata ang amung mga igsuun nganha sa gingharian sa imung himaya.
(Madaugung Hari, dungga ang amung pag-ampu.)

Ang Pag-ampu sa Ginuu (Pater Noster)

(Ug karun, arun pagtuman sa gisugu sa atung Ginuung Jesucristo, mangahas kita sa pag-ingun:)

Sinugbuanun ⟷ Linatin

Amahan namu nga anaa sa mga langit,
pagdaygun ang imung ngalan,
umabut kanamu ang imung gingharian,
matuman ang imung pagbuut
dinhi sa yuta maingun sa langit.
Ang kalan-un namu sa matag adlaw
ihatag kanamu karun adlawa,
ug pasaylua kami sa amung mga sala
ingun nga nagapasaylu kami sa mga nakasala kanamu,
ug dili mu kami itugyan sa panulay
hinunua luwasa kami sa dautan.

Pater noster, qui es in cælis:
sanctificétur nomen tuum;
advéniat regnum tuum;
fiat volúntas tua, sicut in cælo, et in terra.
Panem nostrum cotidiánum da nobis hódie;
et dimítte nobis débita nostra,
sicut et nos dimíttimus debitóribus nostris;
et ne nos indúcas in tentatiónem;
sed líbera nos a malo.

Katapusang Pag-ampu

Ay! Dyus, nga niining adlawa,

pinaagi sa imung Bugtung Anak,

mibuntug sa kamatayun

ug mihikyad alang kanamu sa agianan paingun sa kinabuhing tunhay,

itugut, nangamuyu kami, nga kami nga nanagsaulug

sa balaang pangilin sa Pagkabanhaw sa Ginuu,

unta, pinaagi sa kabag-uhan nga dala sa imung Ispiritu,

mabanhaw sa kahayag sa kinabuhi.

Pinaagi sa amung Ginuung Jesucristo, imung Anak,

nga buhi ug naghari uban kanimu,

diha sa panaghiusa sa Ispiritu Santu,

Dyus, hangtud sa kahangturan.

Amin.

Pagtapus

Kun pari kundili ba kaha diyakunu ang nangulu sa Tulumanun, pabiyaun niya ang katawhan sa pag-ingun:

Ang Ginuu maanaa kaninyu.

Maanaa sab kanimu.

Manalangin kaninyu ang Dyus nga makagagahum sa tanan, ang Amahan, ✠ ug ang Anak, ug ang Ispiritu Santu.

Amin.

Mahimu sab nga laing panalangin gikan sa Misa ang gamitun. Unya, mudugang siya:

Panglakaw kamu sa kalinaw, (aliluya, aliluya).

Salamat sa Dyus, (aliluya, aliluya).

Kun walay pari ni diyakunu, kundili ba kaha sa inusarang pag-ampu, tapusun ang Tulumanun sa pag-ingun:

Panalanginan ✠ unta kita sa Dyus, panalipdan kita gikan sa kadautan, ug dad-un kita ngadtu sa kinabuhing dayun.

Amin.

Kining hubad Sinugbuanun ni Elmer Montejo pinasubay sa The Divine Office: The Liturgy of the Hours (© 1974, 2023 International Commission on English in the Liturgy Corporation, all rights reserved). Ang hubad sa Oratio (Katapusang Pag-ampu) pinasubay sa The Roman Missal (third typical edition, © 2010, International Commission on English in the Liturgy Corporation, all rights reserved) ug ang hubad sa “Te Deum” pinasubay sa kinabag-uhan ug aprubadung hubad Ininglis niini niadtong tuig 2020. Ang mga Salmu, unud sa Unang Pagbasa, ug pipila ka mubu nga mga tudling sa Ikaduhang Pagbasa dili iya sa taghubad apan kinutlu sa Maayong Balita Biblia (Adunay Deuterocanon), © 1999 Philippine Bible Society, ug gihulad, sama sa ubang bahin, sa gipasayung panitik (simplified spelling).

Kinaulahiang pag-usab: Abril 19, 2025.
Unang paghubad: Abril 17, 2025.