Ang Pagkayab sa Ginuu Ngadtu sa Langit

Busa aku nga binilanggu tungud kay nag-alagad sa Ginuu, mag-awhag kaninyu sa pagkinabuhi nga takus gayud ingun nga mga tinawag sa Dyus. Pagmapaubsanun kamu, pagmaaghup ug pagmapailubun kanunay. Ipakita ang inyung gugma sa usag-usa pinaagi sa pagtinabangay. Paningkamuti arun mutunhay ang inyung panaghiusa nga hinatag sa Ispiritu diha sa panagdait nga nagbugkus kaninyu. May usa lamang ka lawas ug usa ka Ispiritu ingun nga may usa lamang ka paglaum ug alang niini gitawag kamu sa Dyus. May usa lamang ka Ginuu, usa ka pagtuu ug usa ka bunyag; may usa lamang ka Dyus ug Amahan sa tanang mga tawu. Siya mau ang labaw sa tanan ug nagbuhat pinaagi sa tanan ug anaa sa tanan.

Ang matag usa kanatu gihatagan ug gasa sumala sa kabubut-un ni Cristo. Kay nag-ingun ang kasulatan,

“Sa pagkayab niya ngadtu sa kahitas-an,
nagdala siyag daghang mga bihag;
ug gihatagan niyag mga gasa ang mga tawu.”

Unsa may gipasabut sa giingung “pagkayab niya”? Nagpasabut kini nga mikunsad una siya ngadtu sa kahiladman sa yuta. Busa siya nga mikunsad mau ra usab ang mikayab saylu pa sa kalangitan arun lukpun niya ang tibuuk kabuhatan sa iyang prisinsya. Ang mga gasa niya mau nga ang uban iyang gihimung mga apustulis, ang uban mga prupita, ang uban mga tigsangyaw sa Maayung Balita, ang uban mga pastur ug mga magtutudlu. Gihimu niya kini arun sa pag-andam sa tibuuk katawhan sa Dyus alang sa buluhatun sa Kristuhanung pag-alagad arun mutubu ang lawas ni Cristo hangtud magkahiusa kitang tanan diha sa pagtuu ug sa atung kahibalu mahitungud sa Anak sa Dyus. Unya mahingkud kita sama sa kahingkud ni Cristo. Dili na unya kita sama sa mga bata nga maanud-anud sa mga balud ug mapadpad ngadtu-nganhi sa nagbalibali nga hangin sa pagtulun-an sa malimbungung mga tawu nga magpasalaag sa uban pinaagi sa mga tanghaga nga ilang binuhat. Kinahanglan hinuung mutubu kita sa tanang paagi ngadtu kang Cristo nga mau ang ulu pinaagi sa pagsulti sa kamatuuran uban ang gugma. Diha kang Cristo magkahaum ang tanang mga bahin sa lawas ug magkadugtung ang tibuuk lawas pinaagi sa tagsatagsa ka lutahan niini. Busa kun mulihuk ang tagsatagsa ka bahin sumala sa katungdanan niini, ang tibuuk lawas mutubu ug mulig-un sa iyang kaugalingun pinaagi sa gugma.

Busa, sa ngalan sa Ginuu, awhagun ku kamu nga dili magkinabuhi sama sa mga dili magtutuu kansang mga hunahuna walay hinungdan ug kansang kaisipan anaa sa kangitngit. Nahimulag sila sa kinabuhi nga gihatag sa Dyus kay wala man sila mahibalu niini tungud kay wala man sila mamati. Nawad-an na sila sa kaulaw; nagpatuyang na lang sila sa bisyu ug nagbuhat sa tanang kalaw-ayan.

Apan dili kini mau ang inyung nakat-unan kang Cristo! Sa walay duhaduha nakadungug kamu mahitungud kaniya ug gitudluan diha sa iyang mga pagtulun-an kay ang kamatuuran anaa man ni Jesus. Busa hukasa ninyu ang daang pagkatawu nga mauy hinungdan sa inyung dautang kinabuhi kaniadtu. Ang maung kinabuhi nag-anam kangil-ad tungud sa malimbungung mga kailibgun niini. Kinahanglang bag-uhun gayud ninyu ang inyung mga kasingkasing ug hunahuna. Isul-ub ninyu ang bag-ung pagkatawu nga gibuhat sa Dyus sama sa iyang dagway nga makita diha sa matuud nga kinabuhing matarung ug balaan.

Niining adlawa mikayab sa langit ang atung Ginuung Jesucristo; paubana kaniya ang atung mga kasingkasing. Pamatia ang mga pulung sa Apustul: Kun nabanhaw kamu uban ni Cristo, panganduya ninyu ang mga butang nga anaa sa kahitas-an diin anaa si Cristo nagalingkud sa tuu sa Dyus; pangitaa ninyu ang mga butang nga langitnun, dili ang mga butang nga kalibutanun. Kay sama nga nagpabilin siya uban kanatu bisan human na siya mukayab, kita sab atua na sa langit uban kaniya bisan wala pa matuman nganhi sa atung mga lawas ang gisaad.

Gibayaw na si Cristo ibabaw sa kalangitan, apan nganhi sa kalibutan nag-antus gihapun siya sa tanang mga kasakit nga giantus natung mga sakup sa iyang lawas. Gipadayag niya kini sa iyang pagtiyabaw gikan sa kahitas-an: Saulo, Saulo, nganung gilutus mu man aku? ug sa pag-ingun niya: Gigutum aku ug gipakaun mu aku.

Nganu man nga kita’ng ania sa yuta dili man maningkamut nga makapahulay bisan karun dinha kaniya sa langit pinaagi sa pagtuu, paglaum, ug gugma nga naghiusa kanatu nganha kaniya? Samtang atua siya sa langit, nagauban gihapun siya kanatu, ug kita nga ania sa yuta nagauban kaniya. Ania siya kuyug kanatu pinaagi sa iyang pagkadyus, sa iyang gahum, ug sa iyang gugma. Dili kita mahimung maatua sa langit sama nga ania siya sa yuta pinaagi sa iyang pagkadyus, apan dinha kaniya mahimu kita’ng maatua sa langit pinaagi sa gugma.

Wala siya mibiya sa langit sa dihang mikanaug siya nganhi kanatu, ni mibulag siya kanatu sa dihang misaka siya pagbalik ngadtu sa langit. Ang iyang kaugalingung gipamulung ang nagmatuud nga atua siya sa langit bisan pa kun ania siya sa yuta: Wala’y bisan kinsa pa nga nakasaka sa langit gawas kaniya nga mikunsad gikan sa langit, ang Anak sa Tawu, nga atua sa langit.

Ang atung pagkausa ni Cristo ang nagpasabut niining mga pulunga, kay siya ang atung ulu ug kita ang iyang lawas. Wala pa’y nakasaka sa langit gawas ni Cristo kay kita si Cristo man sab: Anak siya sa Tawu pinaagi sa iyang pakighiusa kanatu, ug kita mga anak sa Dyus pinaagi sa atung pakighiusa kaniya. Sumala pa sa Apustul: Sama nga ang lawas sa tawu, nga may daghang bahin, usa ka panaghiusa, kay ang lainlaing mga bahin niini usa ra man ka lawas, ingun sab niana si Cristo. Siya sab may daghang sakup apan usa lamang ka lawas.

Tungud sa kaluuy niya alang kanatu mikunsad siya gikan sa langit, ug bisan pa kun nag-inusara siya sa pagkayab, mukayab sab kita, kay anaa kita kaniya pinaagi sa grasya. Sa atu pa, wala’y lain gawas ni Cristo ang mikunsad ug wala’y lain gawas ni Cristo ang mikayab; dili tungud kay lahi ang ulu ug ang lawas, apan tungud kay ang lawas, isip usa ka panaghiusa, dili mahimung ibulag sa ulu.